Bisekyelo bia Ba-Lewi 4
4
Mbeka yʼetungwelo lima baoyiʼobe
1Ko Yawe aotefela la Mose, aokela, 2“Sangela bana ba Yisalaele, Nga bonto akelʼobe lʼosamba wa njea, ko atendolosise bomo wa Yawe la nkakela ea joi limo jʼaoyi baki Nzakomba ofekaka wae batakelake, wae akele limo ja baoyiʼako: 3nga bontʼoko okelʼobe ale nkanga oisama la loiso, ko bobe bokelʼende ieza ekwa ea likambo elʼanto, kelʼende alekyʼele Yawe ndʼeloko ea bobe bokiʼndʼokelaka, mbeka ea ngombo ea jende eʼonolu efa lʼolema. 4Ayele ngombʼeko nda wiso wʼilombe ya bito yʼetakano nda joso ja Yawe; ko ende afya likata likae ndʼotsa wa ngombo, ko aome ngombo eko nda joso ja Yawe. 5Ko nkanga oisama loiso akole balongo ba ngombo eko, ko ayelʼako ndʼilombe ya bito yʼetakano; 6ko nkanga atufe bosaiʼokande ndʼalongo, ko asanzele balongo bamo nda joso ja Yawe besanzela nsambo, nda joso jʼeto ea bolelo wʼitenela yʼoeko wʼeeko. 7Ko nkanga ile balongo bamo ndʼeongo bia nkinda ca baimi ele nda joso ja Yawe ndʼilombe ya bito yʼetakano; ko uteza balongo baciki ba ngombo eko ndʼompempe wa ncina ea nkinda ea mbeka ea ntatumba ele nda wiso wʼilombe ya bito yʼetakano. 8Ko imole lima ngombo eko bauta bauma nda mbeka ea baoyiʼobe: lʼauta bakuka besofo, ko lʼauta batongana la besofo, 9la beloko biʼaaji bekʼefe, ko lʼauta bale ndʼeko nda benyi, la jalo lole ndʼaliko ba lofiko la beloko biʼaaji, imole bako, nsangana la beloko biʼaaji, 10nkʼelenge endimolama bako lima ngombo ea mbeka ea eamanyelo. Ko nkanga atumbe belemo beko nda nkinda ea mbeka ea ntatumba. 11Ko ekoto ea ngombo eko, la wunyu bouma, lʼotsa la bekolo la besofo la nkwa, 12o ngombo euma bonkunju, atomba ndʼanza bʼetakanelo, ndʼitenela ya feto, wiji bobokʼiyo betoko, ko atumbʼeko nda nkoi la tsa. Eko etumbame ndʼitenela ibokʼiyo betoko.
13“Ko nga etakano euma ea Yisalaele bakela joi jʼobe lʼosamba wa njea, ko joi liko jolisama limʼaiso ba banto bʼetakano, ko batendolʼosise bomo wa Yawe ndʼaoyi bakiʼndʼofekaka wae batakelake, ko ngoso baokwa likannbo; 14andeana joi liko jʼobe likʼiyʼokelaka, bantʼauma bʼetakano balekya ngombo ea jende eʼonolu mbeka ndʼewela ea joi liko jʼobe, ko bayelʼeko nda joso jʼilombe ya bito yʼetakano. 15Ko bingambi biʼetakano bafya bakatʼakiyo ndʼotsa wa ngombʼeko nda joso ja Yawe, ko ngombo eko eomame nda joso ja Yawe. 16Ko nkanga oisama loiso ayele balongo bamo ba ngombo eko ndʼilombe ya bito yʼetakano; 17ko nkanga atufe bosaiʼokae ndʼalongo, ko asanzele bako nda joso ja Yawe besanzela nsambo nda joso jʼeto ea bolelo. 18Ko ile balongo bamo ndʼeongo bia nkinda ele ndʼilombe ya bito yʼetakano nda joso ja Yawe; ko uteza balongo baciki ndʼompempe wa ncina ea nkinda ea mbeka ea ntatumba ele nda wiso wʼilombe ya bito yʼetakano. 19Ko imole bauta bauma lima ngombʼeko, ko atumbʼako nda nkinda ea mbeka. 20Akele nkʼelengʼeko la ngombo; o ngokiʼndʼokelaka la ngombo ea mbeka ndʼewelʼea joi jʼobe, akela nkʼelengʼeko lʼene. Elengʼeko nkanga akeelʼiyo, etungwelo lima baoyiʼakiyo bʼobe, ko iyo batungwa lima joi liko jʼobe likʼiyʼokelaka. 21Ko atombe ngombʼeko ndʼanza bʼetakanelo, ko atumbʼeko ngokiʼndʼotumbaka ngombo eki joso; eko ele mbeka ndʼewelʼea joi jʼobe jʼanto bʼetakano.
22“Nga bokonji akela joi jʼobe, wae akela la liunga joi limo ja baoyi baki Yawe Nzakomba ekande ofekaka wae atakelake, ko ngoso ayale lʼekwa ea likambo, 23nga joi jʼobe likiʼndʼokelaka joleana elʼende, ayele nga mbeka ekae nta ea jende efa lʼolema; 24ko afya likata likae ndʼotsa wa nta eko, ko aomʼeko ndʼitenela iomakʼiyo mbeka ea ntatumba nda joso ja Yawe; eko ele mbeka ea joi jʼobe. 25Ko nkanga akole balongo bamo ba mbeka ea joi jʼobe lʼosai bokande, ko abise bako ndʼeongo bia nkinda ea mbeka ea ntatumba, ko uteza balongo baciki ndʼompempe wa ncina ea nkinda ea mbeka ea ntatumba. 26Ko atumbe bauta bʼeko bauma nda nkinda elenge ekelʼende lʼauta ba mbeka eʼeamanyelo. Elengʼeko nkanga akeelʼende etungwelo lima joi likae jʼobe, ko ende atungwa lima joi liko.
27“Ko ngʼontʼomo owa banto nko loswele akela la liunga joi limo jʼaoyi baki Yawe Nzakomba ofekaka wae atakelake, ko ngoso ale lʼekwa ea likambo; 28nga joi likae jʼobe jeanʼelʼende, ayele mbeka ekae, nta eʼomoto efa lʼolema, ndʼewelʼea joi jʼobe likiʼndʼokelaka. 29Ko afya likata likae ndʼotsa wa mbeka ndʼewelʼea bobe, ko aome mbekʼeko ndʼitenela iomamaka mbeka ya ntatumba. 30Ko nkanga akole balongo bamo ba mbeka lʼosaiʼokande, ko ilʼako ndʼeongo bia nkinda ea mbeka ea ntatumba, ko uteza balongo baciki ndʼompempe wa ncina ea nkinda. 31Ko nkanga imole bauta bʼeko bauma, elenge endimolʼiyo bauta lima mbeka eʼeamanyelo; ko nkanga atumbe bautʼako nda nkinda ea mbeka nga mpimbo ea losimo ele Yawe. Elengʼako nkanga akeelʼende etungwelo lima joi jʼobe likiʼndʼokelaka, ko ende atungwa lima joi liko.
32“Ko ngʼayela bona owa mpate ngole mbeka ekae ndʼewelʼea joi jʼobe, ayela bomoto ofa lʼolema. 33Ko afya likata likae ndʼotsa wa mbekʼeko, ko aomʼeko, mbeka ndʼewela ea bobe ndʼitenela iomakʼiyo mbeka ya ntatumba. 34Nkako nkanga akole balongo bamo ba mbeka lʼosai bokae, ko ilʼako ndʼeongo bia nkinda ea mbeka ea ntatumba, ko uteza balongo baciki ndʼompempe wa ncina ea nkinda eko. 35Ko imola bauta bauma ba mbeka elenge endimolʼiyo bauta lima bona owa mpate ea mbeka eʼeamanyelo, ko nkanga atumbe bako nda nkinda ea mbeka, o mbeka etumbama la tsa ele Yawe. Elengʼeko nkanga akeele bontʼoko etungwelo lima joi jʼobe likiʼndʼokelaka, ko ende atungwa lima joi liko.
Currently Selected:
Bisekyelo bia Ba-Lewi 4: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
