Bisekyelo bia Ba-Lewi 16
16
Esekyelo ea Mbile eʼEtungwelo ea wengi mbula
1Ko Yawe aotefela la Mose ndʼafeka bʼiwa ya bana ba Alona bafe bʼaende, akʼiyʼotutamaka nda joso ja Yawe ko bawaki; 2ko Yawe aokela Mose, “Sangela Alona, botomolo oke wete atotswake bikeke nko loswele nda ntena ea boeko ndʼetei ea eto ea bolelo, nda joso ja mbata eʼisei ele ndʼaliko ba sanduku eʼokolo, nyango afowa; elʼemi njifenya nda litute nda mbata eʼisei. 3Lolo Alona ayake nda ntena ea boeko elengʼene; la ngombo ea jende eʼonolu, mbeka ndʼewelʼea baoyiʼobe, ko la mpate ea jende, mbeka ea ntatumba. 4Alote bonkoto wʼokakya wa lin wʼoeko, ko la caleçon ea lin nda jonge likae; alembame ndʼonkeke la bombembe wa lin, ko alote likuka ja lin; bene bele benkoto biʼoeko. Asole jonge likae lʼasi, ko afote beko. 5Ko akole hmʼetakano ea bana ba Yisalaele nta yʼaende ife, mbeka ndʼewelʼea baoyiʼobe, ko la mpate ea jende, mbeka ea ntatumba
6“Ko Alona alekya ngombo mbeka ndʼewelʼea baoyiʼobe, eko ele ndʼeloko ekande mongo, ko akele etungwelo limʼaoyiʼobe ndʼeloko ekae mongo, la ndʼeloko ea ilongo ikande. 7Ko akole nta ikʼife, ko emyʼiko nda joso ja Yawe nda wiso wʼilombe ya bito yʼetakano. 8Ko Alona asone ndatsa nta ikʼife la esike, esike emo ea Yawe, ko esike emo ea nta ea nkakenza. 9Ko Alona ayele nta eki esike ea Yawe okwelaka, ko alekyʼeko mbeka ndʼewelʼea baoyiʼobe. 10Lolonde emya nta eki esike ea nta ea nkakenza okwelaka nko eyoike nda joso ja Yawe wae etungwelo lima baoyiʼobe ekelame lʼeko, ko ekenzama nd ete keleke nga nta ea nkakenza.
11“Ko Alona ayele ngombo ea jende ea mbeka ndʼewel ea baoyiʼobe, o ndʼeloko ekae mongo, la ndʼeloko eʼilongo ikae, ko aome ngombo ea mbeka ndʼewelʼea baoyiʼobe ndʼeloko ekae mongo. 12Ko akole etumbelo eyola la baala ba tsa lima nkinda nda joso ja Yawe, ko akole bakata bakae to la baimi ba mpimbo batokama nga biucu, ko ayele toma toko ndʼetei ea eto eʼolelo. 13Ko ile baimiʼako nda tsa nda joso ja Yawe, ndʼewela wae bolinga lima baimi bakuke mbata eʼisei ele ndʼaliko ba sanduku eʼokolo, nyangʼende afowa. 14Ko akole balongo bamo ba ngombo, ko asanzela bako lʼosai bokande nda mbata eʼisei ndʼokala wa est, ko asanzela balongo bamo nda joso ja mbata eʼisei lʼosai bokande besanzela nsambo.
15“Nkako aome nta ea mbeka ndʼewelʼea baoyiʼobe, eko ele ndʼeloko ea bantʼauma, ko ayele balongo ba nta eko wijʼeto ea bolelo; mpanga akele lʼalongo ba nta eko ngokiʼndʼokelaka lʼalongo ba ngombo ea jende, wae asanzelʼako nda mbata eʼisei, la nda joso ja mbata eʼisei. 16Lʼelengʼeko akele etungwelo limʼaoyiʼobe ndʼeloko ea ntena ea boeko, la ncina ea linyamo ja bana ba Yisalaele, la besesengano bekiyo, wae baoyiʼobe bakiyo bauma. Ko akele nkʼelengʼeko ndʼeloko eʼilombe ya bito yʼetakano, isekwa lʼiyo nda ntoku ea linyamo likiyo. 17Bontʼomo atayalake ndʼilombe ya bito yʼetakano andotswa nkanga wae akelʼetungwelo nda ntena ea boeko, elaka nko aolola, ko aosilʼokela etungwelo lima baoyiʼobe ndʼeloko ekae mongo, la ndʼeloko ea ilongo ikande, ko la ndʼeloko ea etakano ea Yisalaele euma. 18Limʼako ole, ko acwe nda nkinda ele nda joso ja Yawe, ko akelʼetungwelo limʼaoyiʼobe ndʼeloko ea eko; akole balongo bamo ba ngombo eko ea jende, ko bamo ba nta eko, ko ilʼako ndʼeongo bia nkinda njingola. 19Ko asanzela nkinda eko lʼalongo bamo lʼosai bokande besanzela nsambo, wae afetolʼeko, ko abuzʼeko ndʼoeko lima linyamo jʼana ba Yisalaele.
20“Ko aʼendʼosiza okela etungwelo limʼaoyiʼobe ndʼeloko ea ntena eʼoeko, lʼilombe ya bito yʼetakano, ko la nkinda ea mbeka, mpanga ayele nta eyoike. 21Ko Alona afya bakataʼakae bakʼafe ndʼotsa wa nta eyoike, ko aandole bebe beuma bia bana ba Yisalaele ko la besesengano bekiyo, wete baoyiʼobe bakiyo bauma; ko ilʼako ndʼotsa wa nta, ko asokoza nta eko ndʼete keleke la likata jʼonto ondelama lʼolemʼoko. 22Ko nta eko atombe bebe bekiyo beuma ndʼokili wa bolalengo: ko atungole nta eko ndʼete keleke.
23“Limʼako Alona otswa ndʼilombe ya bito yʼetakano, ko alotole benkoto bia lin bekiʼndʼolotaka akiʼndʼotswaka nda ntena ea boeko, ko acike beko nkʼeko. 24Ko okʼasi ndʼitenela yʼoeko, ko alote benkoto bemo bekae, kela ole ko alekya mbeka ea ntatumba ekande, ko la mbeka ea ntatumba eʼantʼauma, ko akele etungwelo limʼaoyiʼobe ndʼeloko ekande mongo la ndʼeloko eʼanto. 25Ko atumbe bauta ba mbeka ndʼewelʼea baoyiʼobe nda nkinda ea mbeka. 26Ko bontʼosʼotungola nta nga nta ea nkakenza, asole benkoto bekae, ko okʼasi, ko ndʼafeka aye ndʼetakanelo eʼanto. 27Ko ngombo ea mbeka ndʼewelʼea baoyiʼobe, la nta ea mbeka ndʼewelʼea baoyiʼobe, baki balongo otombamaka nda ntena ea boeko okela etungwelo lima baoyiʼobe, bifotombama ndʼanza bʼetakanelo eʼanto, ko bifotumbʼiko la tsa, wete bikoto biʼiko, ko la wunyu, ko la nkwa yʼiko. 28Ko endʼotumbʼiko asole benkoto bekae, ko okʼasi, ko ndʼafeka aye ndʼetakanelo eʼanto.
29“Esekyelo ene esekyama elʼinyo seko; wete nda nsanza ea nsambo, nda mbile ea jom ea nsanzʼeko, lifasisozʼinyo mongo, ko lofaokamba belemo nye, la bomongʼola ko la bofaya oyala ndʼetei ekinyo. 30Ele etungwelo lima baoyiʼobe ekelama ndʼeloko ekinyo nda mbilʼene, wae lofetswa; ko lofetswa limʼaoyiʼobe bakinyo bauma nda joso ja Yawe. 31Mbilʼene ifoyala sabata ea jomo mongo elʼinyo, ko lifasisozʼinyo mongo; eko ele esekyelo ea bikeke biuma.
32“Ko nkangʼeko oisama loiso, ko oekyama boeko wae asulungane ise ekande nda mpifo ea nkanga akele etungwelo limʼaoyiʼobe, ko alote benkoto bia lin, wete benkoto bia boeko. 33Ende akele etungwelo lima bobe ndʼeloko ea ntena ea boeko, ko akele etungwelo lima bobe ndʼeloko ea ilombe ya bito yʼetakano la ndʼeloko ea nkinda ea mbeka, ko akele etungwelo lima bobe ndʼeloko ea nkanga ko lʼea banto bauma bʼetakano. 34Ko ene eyale elʼinyo esekyelo ea bikeke la bikeke; wete etungwelo lima baoyiʼobe ekelame ndʼeloko ea bana ba Yisalaele bokela bomoko wengi mbula.” Ko Mose akelaki o ngoki Yawe osisakʼende.
Currently Selected:
Bisekyelo bia Ba-Lewi 16: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
