Bisekyelo bia Ba-Lewi 15
15
Esekyelo eʼefetswelo lima linyamo, la jʼaende la jʼamato
1Ko Yawe aotefela la Mose la Alona, aokela, 2“Losangela bana ba Yisalaele, Wenaka jende ale la cina ca eyaya, ale linyamo ndʼewelʼea eyaya eko. 3Ko ene wae elenge ea linyamo likae lima eyaya eko; nkina cina toko toleka lima jonge likae, nkina tosukama wete tofoleke, tole o linyamo elʼende. 4Wengi ntange endetama bontʼole la cina tʼeyaya eyale linyamo; ko wengi bolemo bokitase bontʼoko boyale linyamo. 5Ko osʼofomwa ntange ekae asolʼenkoto bekae, ko okʼasi, ko ayale linyamo elaka nkʼokolo. 6Ko osʼokitase ndʼolemo boki bontʼole lʼeyaya okitakʼase, asole benkotʼekae, okʼasi, ko ayale linyamo elaka nkʼokolo. 7Ko osʼofomwa jonge likande ole lʼeyaya, asolʼenkoto bekae, ko okʼasi, ko ayale linyamo elaka nkʼokolo. 8Ko nga bontʼole lʼeyaya atufelʼonto ole feto nsoi, bontʼoko asolʼenkoto bekae, ko okʼasi, ko ayale linyamo elaka nkʼokolo. 9Wengi ebonga endafema bontʼole lʼeyaya nda mpunda, eyale linyamo. 10Ko bontʼofomwa bolemo nko loswele boki ndʼase bakande, ayale linyamo elaka nkʼokolo; ko bontʼotomba bolemo boko asole benkoto bekae, ko okʼasi, ko ayaleme linyamo elaka nkʼokolo.
11Ko bonto nko loswele oe bontʼoko ole lʼeyaya ofomwa atafʼende osola bakatʼakae, bontʼoko asole benkotʼekae, ko okʼasi, ko ayale linyamo elaka nkʼokolo. 12Ko ijwa eʼiyomba ee bontʼole lʼeyaya ofomwa eolame, ko wengi ijwa eʼotamba esolame lʼasi.
13“Ko aʼendʼole lʼeyaya ofetswa lima eyaya ekande, ifoanda bembile nsambo ndʼeloko eʼefetswelo ekande, nkako asole benkoto bekae, okya jonge likae ndʼasi bayoleke, ko mpangʼafetswa. 14Nda mbile ea mwambi ifokola bimpompo bife, nkina bimbenga bife biʼanoju, ko aye nda joso ja Yawe nda wiso wʼilombe ya bito yʼetakano, ko akaya nkanga biko. 15Ko nkanga alekya biko, emoko mbeka ndʼewelʼea baoyiʼobe, ko emo mbeka ea ntatumba; ko nkanga okeelʼende etungwelo lima bobe nda joso ja Yawe ndʼewelʼea eyaya ekande.
16“Ko nga balomi baolola lima jonge ja jende, ifokya jonge liuma lʼasi, ko ayale linyamo elaka nkʼokolo. 17Ko wengi bonkoto, ko wengi ekoto efomwa balomi basolame lʼasi, ko bayale linyamo elaka nkʼokolo. 18Nga jende etama lʼomoto, ko alekya balomi, iyʼakʼafe bokʼasi, ko bayale linyamo elaka nkʼokolo.
19“Nga bomoto ale lʼelekelo lima jonge likae, ko eko ele balongo, ayale linyamo bembile nsambo; ko bontʼofomwʼende ayale linyamo elaka nkʼokolo. 20Ko wengi bolemo boʼendʼetama alʼende linyamo, boyale linyamo, ko wengi bolemo boʼendʼokitase boyale linyamo ngoko. 21Ko endʼofomwa ntange ekanae, asole benkoto bekande, okʼasi, ko ayale linyamo elaka nkʼokolo. 22Ko bontʼofomwa bolemo nko loswele bokiʼndʼokitakase, asola benkoto bekande, okʼasi, ko ayale linyamo elaka nkʼokolo. 23Bontʼofomwa yombʼimo ile nda ntange ekande, nkina bolemo bokiʼnde okitakʼase, ayale linyamo elaka nkʼokolo. 24Ko nga jende etama lʼende, ko linyamo likande jofomwʼende, jende loko ayale linyamo bembile nsambo; ko ntange nko loswele eʼendʼetama eyale linyamo.
25“Nga bomoto aleka balongo bembile beuke, afa ndʼekeke endenakʼende nsanza, nkina elekelo eko elekana ekeke ea nsanza ekae, ende ayale linyamo bembile beuma bia elekelo eko, elenge elʼende linyamo ndʼekeke ea nsanza ekae, endʼale linyamo. 26Wengi ntange endetamʼende ndʼembile beuma bia elekelo eko eʼalongo eyale elengʼele nta nge ekae andenʼende nsanza: ko wengi bolemo boʼende okitase boyale linyamo efengʼeki boko linyamo ndʼekekʼekae ea nsanza. 27Ko bontʼofomwʼelemʼeko ayale linyamo; asole benkotʼekae, okʼasi, ko ayale linyamo elaka nkʼokolo. 28Nga elekelo ekande eotena, kela aande bembile nsambo, ko limʼako ale feto. 29Nda mbile ea mwambi akole bimpompo bife, nkina bimbenga bife biʼanoju, ko atombe biko ele nkanga nda wiso wʼilombe ya bito yʼetakano. 30Nkanga alekyʼiko, emo mbeka ndʼewelʼea baoyiʼobe, ko emo mbeka ea ntatumba: ko nkanga akeelʼende etungwelo lima baoyiʼobe nda joso ja Yawe, ndʼewelʼea elekelo ekande endoatelaki linyamo.
31“Elengʼene lifolenola Ba-Yisalaele lima linyamo likiyo, nyango bafowa ndʼewelʼea linyamo likiyo la mpafita ea tabernacle ele ndʼetei ekiyo.”
32Elengʼeko wae esekyelo ea jende ole lʼeyaya, ko lʼeka ea jende londola balomi ko ale linyamo la ncinʼeko; 33ko lʼesekyelo eʼomoto ondokʼeefe ea elekelo ekande ea nsanza endoatela linyamo; ko lʼea jende lʼomoto ole lʼelekelo lima jonge likae; ko lʼea jende ondetama lʼomoto ole linyamo.
Currently Selected:
Bisekyelo bia Ba-Lewi 15: LOL87
Highlight
Copy
Compare
Share
Want to have your highlights saved across all your devices? Sign up or sign in
La Bible en Lomongo © Societe Biblique de la R.D. Congo 1987
