Lembrieko 2
2
Mugisa mi Yenyo Rieko
1Woda, tek ibijolo lembe para,
Man ikan lembang’ola para i beng’i;
2Kara iketh ithi kum rieko
Man iketh adundeni kum ng’eyothelembe;
3Eyo, tek iywak pi ng’iolembe,
Man iting’ dwendi malu pi ng’eyothelembe;
4Tek iyenye calu mola ma tar,
Man iyenye calu piny m’akana m’upondo:
5Ibuund ng’eyo lworo pa Yehova,
Man ibinwang’u ng’eyong’ec pa Mungu.
6Kum Yehova mio rieko;
Ng’eyong’ec ku ng’eyothelembe ai kud i dhoge:
7Ekanu rieko ma cu ni ju m’atira;
En e ban ni ju ma wotho i bedocu;
8Kara egwok yo mi ng’ololembe ma pwe,
Man egwok yo mi jumaleng’ pare.
9Ibilund ng’eyo bedopwe ku pokolembe,
Man lembatira, eyo, ku ba yo ceke ma ber.
10Kum rieko bimondo i adundeni,
Man ng’eyong’ec binyayu mutoro ii;
11Lembapora bikuri;
Ng’eyothelembe bigwoki:
12Kara ubodhi ni yo ma rac,
Ni dhanu ma yero lem ma kite mbe;
13M’uweko yo m’atira,
Kara giwoth i yo mi mudho;
14Ma anyong’a negogi kum timo rac,
Man anyong’a negogi kum lem ma kite mbe pa jadubo;
15M’ugondre i yo migi,
M’ukier de i yo migi:
16Kara ubodhi ni dhaku ma nyawirok,
En e ni nyawirok ma nang’u lembe ku dhoge ma mit;
17Ma weko jarimbe mir aradu pare,
Ma wie wil de kum lembariba pa Mungu pare:
18Kum ot pare lengre yo ba tho
Man yo pare ba ju m’utho;
19Ng’atu moko mbe ma cidho i bang’e ma dwogo kendo,
Kadok ba yo mi kwo de gitundo ngo;
20Kara iwoth i yo mi dhanu ma ber,
Man imok kum yo mi ju ma pwe.
21Kum ju m’atira bibedo i ng’om,
Man ju ma cu bibedo i ie.
22Ento judubo jubikabu woko kud i ng’om,
Man weg abombi jubimugo woko kud i ie.
The Holy Bible In Alur (Lur), Revised Orthography © United Bible Societies, 1970.