Obadia 1

Jwigri mi Edom

1Ginmawokiwang’ pa Obadia.

Rwoth Yehova wacu kumae, pi Edom: Wawinjo rwonglembe m’uai ba Yehova, man juoro jadhulembe i kind thek, m’uwacu kumae, Wuai, man dong’ waeyu wakiedu kude, 2Nen, adwoki nok i kind thek: jucei dit. 3Kuhaya mir adundeni bombi, E in m’ibedo i odcana, ma kabedo peri ni malu; m’uwacu i adundene kumae, Ng’a ma bikela piny i ng’omi? 4Kadok iidho malu pamir acur, man kadok juketho ot peri kind cero, abikeli piny ku kuca, Yehova wacu.

5Tek jukwo bino i beng’i, tek weg ayeki bino ku diewor (ei maram ithumbri woko!), gibikwalu kende cil m’eromogi ngo? tek jupon ulok ubino i beng’i, gibiweko nyingulok moko m’udong’ ungo? 6Ei maram juyenyo ko gin pa Esau! ei maram juyenyo ko piny m’akana pare m’upondo! 7Dhanu ceke mi lembariba peri gikeli i yo peri, cil i kieu: dhanu ma cwinywu kwio wukugi gibombi, man gisegi; ju m’ucamu kwen peri giketho uwic i theri: ng’eyothelembe mbe i ie. 8I ceng’ maeca, Yehova wacu, abinyotho jurieko ku i Edom ungo, man ng’eyothelembe ku wi got mir Esau de ngo? 9Man dhanu peri ma tek, E Teman, cwinygi bing’abre, kara juthum dhanu kubang’gi nzu ku nek ku wi got mir Esau.

10Kum rop m’utimbre kum umeru ma Yakobo, lewic biumi, man ibithumbri woko mi nja. 11I ceng’ m’icungo ie lokaca, i ceng’ ma juwirok gitero ie piny pare cen, man juwirok gimondo i dhugola pare, man gigoyo jara wi Yerusalem, in de i calu acel m’i kindgi. 12Ento kud inen wi ceng’ p’umeru i ceng’ mi ruvwa pare, man anyong’a kud unegi kum nyithindho pa Yuda i ceng’ mi nyoth migi; kadok aweca de kud iwec ku kuhaya i ceng’ mi masendi. 13Kud imond i dhugang’ mi dhanu para i ceng’ mi ruvwa migi; eyo, kud inen wi can migi i ceng’ mi ruvwa migi, kadok cingwu de kud wuketh wi piny migi i ceng’ mi ruvwa migi. 14#Isa 34:5-17; 63:1-6; Yer 49:7-22; Eze 25:12-14; 35:1-15; Amo 1:11, 12; Mal 1:2-5Man kud icung i akarayo, kara juthum woko dhanu pare m’uboth; man kud wucib dhanu pare m’udong’ i ceng’ mi masendi.

15Kum ceng’ pa Yehova ni ceng’ni wi thek ceke: calu itimo, ebitimbre iri; cul peri bidwog i wii giri. 16Kum calu wumadhu wi got para ma leng’, thek ceke bimadhu kumeca thiri thiri; eyo, gibimadhu, gibimwonyo, man gibibedo calu gimbe.

Yung mi Israel

17Ento i got Sayuni ju m’uboth bibedo nuti, man ebibedo leng’; man ot pa Yakobo bimwonyo piny migi. 18E ot pa Yakobo bibedo ni mac, man ot pa Yusuf ni lebmac, ot pa Esau de ni soka, man gibiliel i kindgi, e gibiwang’ugi; man ng’atu moko mbe ma bidong’ ni ot pa Esau; kum Yehova yero maeni. 19Man ju ma yor ariwa ma piny bimwonyo got mir Esau, man ju mi poga bimwonyo Jufilisti; man gibimwonyo podho pa Efraim, man podho mi Samaria; man Benyamin bimwonyo Gilead. 20Man ng’eca mir udul maeni ni nyithindho mir Israel, ma gini i kind Jukanani, gibimwonyo cil kum Zarefath; man ng’eca mi Yerusalem, ma gini i Sefarad, gibimwonyo adhura ma yor ariwa ma piny. 21Man jubodh biidho malu wi got Sayuni kara gipok lembe mi got mir Esau; e ker bibedo pa Yehova.

Currently Selected:

Obadia 1: AB1970

Highlight

Copy

Compare