Matayo 2
2
Jurieko Bino Neno Yesu
1Nie kinde ma junyolo Yesu i Beth-lehem mi Yahudi i ceng’ p’ubimo ma Herode, nen, Jurieko m’uai yo nyangu gibino Yerusalem giwacu kumae, 2Ng’atu ma unyolo ni Ubimo mi Juyahudi e, eni kani? kum waneno cero pare yo nyangu, wabino de nirwo ire, 3E ka Herode m’ubimo winjo maeni, cwinye ng’abre, en ku Yerusalem ceke bende. 4E kan ecoko julam ma dongo ceke karacelo ku jugorcik mi dhanu bende, epenjogi pi ka ma jubinyolo ie Kristu. 5E giwacu ire kumae, I Beth-lehem mi Yahudi: kum egore kumeno ni kum jubila,
6 #
Mik 5:2
In i Beth-lehem, ng’om pa Yuda,
In i nok ki ngo i kind juker pa Yuda:
Kum jabim biai i beng’i,
M’ebibedo jakwac mi dhanu para Israel.
7Herode lund ulwong’o Jurieko nyalwe man epenjogi cu pi kanindo ma cero wok i ie. 8Man eorogi Beth-lehem, ewacu kumae, Wuci wuyeny cu pi nyathin ma nok; ka wunwang’e de, wukel lembene ira, kara an bende abin arwo i bang’e. 9E gin, ka gidaru winjo lem p’ubimo, gicidho migi; man nen, cero, ma gineno yo nyangu, ucidho i wang’gi, maram ebino ecungo ko ka wi nyathin ma nok. 10E ka gineno cerone, anyong’a negogi ku mutoro ma dit apila. 11E gibino i ot man gineno nyathin ma nok ku Mariamu ma min mire; e gipodho piny girwo ire; man gigonyo piny migi m’akana githiero ire giramia, mola ma kwar kud udok ma ng’wice ng’ar man mo ma ng’wice ng’ar. 12E ka Mungu poyogi ku wang’ lek ya ku gidok ba Herode, giai gidok thugi ku yo ku mange.
Giringo i Misiri
13Nie ka gidaru ai, nen, malaika pa Rwoth uwok ba Yusuf ku wang’ lek, ewacu kumae, Ai malu iting’ nyathin ma nok ku min mire, man iring i Misiri, ibed kuca de ka fok’ayero iri ngo: kum Herode biyenyo nyathin ma nok maeno enyothe. 14Man eai malu eting’o nyathin ma nok de ku min mire ku diewor, ecidho de i Misiri; 15#Hos 11:1man ebedo kuca rama Herode tho ko: kara gin ma yang’ Rwoth uwacu ku dhu jubila timbre kakare, m’uwacu kumae,
Alwong’o woda kud i Misiri.
Junego Nyithindho
16Ka Herode lund uneno nia Jurieko gicaye, kwinyo ma apila nege, man eoro dhanu ucidh uneg nyithindho ma co ceke ma gini i Beth-lehem, cil ku m’i kieune ceke, ma oro migi ario ku ma fodi de, calu kanindo m’epenjo cu ba Jurieko. 17E maeno lund utimbre kakare m’uyere ni kum Yeremia ma jabila m’uwacu kumae,
18 #
Yer 31:15
Dwal uwinjre i Rama,
Ywak ku can ma dit,
Rahel m’ubeywagu nyithindhe;
Ekwero juk de, kum gimbe.
Dwogo kud i Misiri
19Ento ka Herode tho, nen, malaika pa Rwoth uwok ku wang’ lek ba Yusuf i Misiri, m’uwacu kumae, 20Ai malu iting’ nyathin ma nok ku min mire de, man idok i ng’om Israel: kum ju m’uyenyo gineg nyathin ma nok githo. 21E eai malu eting’o nyathin ma nok ku min mire de, man ebino i ng’om Israel. 22Ento kan ewinjo nia Arkelao bebimo wi Yahudi ka Herode ma won mire, lworo make nidok kuca; e en ma Mungu poye ku wang’ lek, edong’ ecidho i ng’et Galilaya, 23#Mk 1:24; Lk 2:39; Yoh 1:45man ebino ebedo i adhura ma julwong’o Nazareti; kara gin m’uyere ku dhu jubila timbre kakare, nia jubilwong’e Janazareti.
Currently Selected:
Matayo 2: AB1970
Highlight
Share
Copy
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.