Hoseya 8

Cim ni Israel kum Rwo Migi ni mungu m’araga

1Keth agwara i dhogi. Calu acur ebino kum ot pa Yehova, kum gituro lembariba para, man gidubo kum cik para. 2Gibiywak i bang’a kumae, Mungu para, wan Israel wang’ei. 3Israel uwanyu gin ma ber woko: jadegi biriemo toke. 4Giting’o ubimo malu, ento ku lembe para ngo: giketho judongomawijo, man ang’eyo ngo: gitimo mungu m’araga ku mola ma tar man mola ma kwar migi, kara jukabgi woko. 5Ebayu nyathi dhiang’ peri woko, E Samaria; ng’ecwiny para opo i kumgi; ebibedo rokani ma fodi gikutundo ngo kum bedo ma leng’i? 6Kum cil maeni ai bang’ Israel; jabodho time en, man en e Mungu ngo; eyo, nyathi dhiang’ mi Samaria jubituro nziki nziki. 7Kum gicoyo yamu, man gibikayu vira: ebedo ku cam ma wi tiende ngo; twine biwodho mogo ngo; tek ecego, juwirok bimwonye.

8Jumwonyo Israel: kawono gini i kind thek calu combo ma nyayu mutoro i ng’atu moko ngo, 9Kum giidho malu bang’ Ascur, calu kana m’i thim e kende gire: Efraim ulonyo jumer. 10Eyo, kadok gilonyo i kind thek, kawono abicokogi; man gimaku jwik ni kum ter p’ubimo mi judongomawijo.

11Kum Efraim umedo pemblam pi dubo, pemblam ubedo ire pi dubo. 12Agoro ire gin mi cik para rubanga apar; ento jukwanugi calu gin mi juwirok. 13Pi girathiera mi lam para, gilamu ring’o man gicame; ento Yehova jologi ngo: kawono ebipoi kum dubo migi, man ebiliewo dubo migi; gibidwogo i Misiri. 14Kum Israel wie wil kum Jacwicne, man egomo udi ma dwong’; man Yuda medo adhura ma tek; ento abioro mac wi adhura pare, man ebiwang’u udi ma tekne.

Currently Selected:

Hoseya 8: AB1970

Highlight

Copy

Compare