Hoseya 4

Piem pa Yehova ku Israel

1Wuwinj lembe pa Yehova, wu nyithindho mir Israel; kum Yehova bedo ku piem ku dhanu m’i ng’om, kum lemandha mbe i ng’om, kadi bero, kadi ng’eyong’ec pa Mungu. 2Gin moko mbe ndhu kwong’ ma kadhukuwilembe, ku negonek, man kwalukwo, ku dubriswa; gimojo rop, man rimo mulo rimo. 3Ka kumeno ng’om biywak man ku ba dhanu ceke m’ubedo i ie bibedo ng’ic, karacelo ku yedi m’i thim ku winyo ma kor polo; eyo, rec m’i nam bende bikabre woko. 4Ento ng’atu moko kud ujai, kadok ng’atu moko de kud ujuki; kum dhanu peri gi calu ju m’ujai ni jalam. 5Man ibikier ku dieceng’, man jabila bende bikier karacelo kudi ku diewor; man abinyotho meru.

6Dhanu para ginyothri kum ng’eyong’ec m’urem: kum ikwero ng’eyong’ec, an bende abikweri, kara kud ibed jalam ira: kum wii wil kum cik pa Mungu peri, an bende wia biwil kum nyithindho peri. 7Calu gimedri, e gidubo ira kumeno; abidwoko dwong’ migi ni lewic. 8Gikakri ku dubo mi dhanu para, man giketho adundegi kum kier migi. 9Man ebibedo, nia calu dhanu bedo, jalam bibedo kumeca; man abisendogi kum yo migi, man abiculo igi wang’ tic migi. 10E gibicamu, man gibiyeng’ ungo; man gibitimo tarwang’, e gibinyai ungo; kum giweko ketho cwinygi kum Yehova.

11Asara ku pigulok ku pigulok ma nyasa kabu ng’eyothelembe. 12Dhanu para gipenjo lembapora ba dundyen migi, man uluth migi yero igi; kum tipo mir asara ketho gikier, e gitimo tarwang’, ma giai ko ku the cing’ Mungu migi. 13Gilamu lam wi bith gudi, man giwang’u udok ma ng’wice ng’ar wi ungulu gudi, the bongu ku kalafuru ma tar kud ulam, kum tipone ber: ka kumeno nyigwu timo tarwang’, man mugole mu dubri swa. 14Abisendo nyigwu ngo kinde ma gitimo asara, kadi mugole mu kinde ma gidubri swa; kum co gigi gicidho cen ku weg tarwang’, man gilamu lam karacelo ku weg asara; e jubing’ielo dhanu ma ng’eyothelembe mbe kugi.

15Kadok in, Israel, itimo tarwang’, ento Yuda kud ukier; man kud wubin i Gilgal, kadok kud wuidh Beth-aven, kadi kud wukwong’ kwong’ kumae, Calu Yehova bedo kwo. 16Kum Israel utimbre gire ku co, calu rwaya ma jaco: kawono Yehova bikakugi calu nyathi rombo i ka ma lac. 17Efraim umoko kum mungu m’araga; weke e kende. 18Giramadha migi doko wac; gitimo tarwang’ thiri thiri; jubim pare maru lewic dit. 19Yamu wire i bombe; e jubiketho lewic umakugi kum lam migi.

Currently Selected:

Hoseya 4: AB1970

Highlight

Copy

Compare