Daniel 9
9
Kwac pa Daniel pi Juthugi
1I rundi ma kwong’ane pa Dario ma wod Ahasuerus, mi kodhi Jumedi, ma juketho ni ubimo wi ker mi Jukaldayo, 2#Yer 25:11; 29:10i rundi ma kwong’ane mi camuker pare, an a Daniel ang’eyo wel rundi ni kum kitabu maram lembe pa Yehova bino ko ba Yeremia ma jabila, mi daru uvuru mi Yerusalem, en e rundi pier abiro.
3Man aketho wang’a yo ba Rwoth Mungu, kara ayeny ku rwo man kwac, ku wekocam ku kendo usuba man vuru. 4Man a rwo ni Yehova Mungu para, man atimo lembatuca, awacu de kumae, A, Rwoth, Mungu ma dwong’ ma jang’oindiri, m’ugwoko lembariba man mer mi bero ku ju m’umare m’uworo lembang’ola pare de, 5wadubo, man watimo kier, man watimo gondri, man wajai, cil kuweko cik peri ku lembapoka peri; 6kadok awinja wawinjo jutic peri ma jubila de ngo, m’uyero ku nyingi bang’ ubimo mwa, ku judongo mwa, man ku kwaruwa, man ni dhanu ceke m’i ng’om. 7E Rwoth, bedopwe en e peri, ento iwa lewic mi wang’, calu i ceng’ maeni; ni dhanu mi Yuda, man ni dhanu m’ubedo i Yerusalem, man ni Israel ceke, ma gi ceng’ni, ku ma ni bor de, i ng’om ceke m’iriemogi i ie, kum dubo migi ma gidubo iri. 8E Rwoth, lewic mi wang’ ubedo iwa, ni ubimo mwa, ni judongomawijo mwa, man ni kwaruwa, kum wadubo iri. 9Kisa ku wekodubo en e pa Rwoth Mungu mwa; kum wajai i kume; 10kadok awora de waworo dwand Yehova Mungu mwa ngo, mi wotho i cik pare, m’eketho i wang’wa ku jutic pare ma jubila. 11Eyo, Israel ceke gidubo cik peri, cil ku lokri cen, kara ku giwor dwendi: kum kumeno kwong’ ukonjre i wiwa, ku kwong’ m’ugore i cik pa Musa ma jatic pa Mungu; kum wadubo lembe ire. 12Man etimo lembe pare kakare, m’eyero i kumwa, man i kum jupoklembe mwa ma gipoko lembe i wiwa, ku kelo lembe ma’rac dit i wiwa; kum the polo ceke gin moko mbe m’utimbre calu m’utimbre kum Yerusalem. 13Calu egore i cik pa Musa, lembe ma rac maeni ceke ubino i kumwa: ento wakwayu ngisi ba Yehova Mungu mwa ngo, kara walokra kud i kier mwa, man wabed ku ng’eyong’ec i lemandha peri. 14Ka kumeno Yehova kuro wi lembe ma rac, man ekele i wiwa; kum Yehova Mungu mwa e pwe i tic pare ceke m’etimo, man waworo dwande ngo. 15Man kawono, E Rwoth Mungu mwa, m’iwodho dhanu peri woko kud i ng’om Misiri ku cingi ma tek, man inwang’u pak iri, calu ebedo tinuni; wadubo, watimo rac. 16E Rwoth, calku bedopwe peri ceke, akwei, dong’ iwek ng’ecwiny peri ku kwinyo peri lokre woko ku kum adhura peri Yerusalem, got peri ma leng’; kum ni kum dubo mwa, man ni kum dubo pa wegwa, Yerusalem ku dhanu peri gidoko ni cac ni dhanu ceke m’utiekowa gbur. 17Ka kumeno kawono, E Mungu mwa, winj rwo pa jatic peri, man ba kwac pare, man keth weng’i rieny wi kamaleng’ peri m’udong’ ni uvuru, pi Rwoth. 18E Mungu para, leng’ ithi, man iwinji; yab weng’i, man inen uvuru mwa, kud adhura m’ulwongre ku nyingi: kum wa wodho kwac mwa ngo i weng’i ni kum bedopwe mwa, ento ni kum kisa peri ma dwong’. 19E Rwoth, winji; E Rwoth, wek dubo; E Rwoth, winji man itim, kud igal, piri giri, E Mungu para, kum adhura peri ku dhanu peri gilwongri ku nyingi.
Ewolembe pi Yenga Pier Abiro
20Man kinde m’abeweco, man aberwo, abetuco dubo para ku dubo mi juthuwa Israel, ku wodho kwac para i wang’ Yehova Mungu para pi got ma leng’ pa Mungu para; 21#Lk 1:19, 26eyo, kinde m’abeweco i rwo, ng’atu ma Gabriel, m’aneno ku kwong’a i ginmawokiwang’, ma juketho eringo pio, emulo kuma calu nindo mi lam mir uthieno. 22E eponja, man waweco wakude, ewacu kumae, E Daniel, awok woko kawono kara ami iri rieko ku ng’eyothelembe. 23Kan itheko kwac peri lembang’ola wok woko, man abino kara ayer iri; kum in i ng’atu ma jumaru dit; ka kumeno ii pid kum lembene, man ing’ei ginmawokiwang’.
24Jung’olo yenga pier abiro ni juthu man wi adhura peri ma leng’, kara judar dubo, man kara jujig dubo, man kara jutim rib mi kier, man kara jukel bedopwe ma nja, man kara jumwon ayi kum ginmawokiwang’ ku lembila, man kara juwir kamaleng’ ma sagu. 25Ka kumeno ing’ei man inen, nia ugambre kum lembang’ola ma juketho ya juyik man jugom Yerusalem cil kum ng’atu ma juwiro, en e jaditmawijo, bibedo yenga abiro, man yenga pier abusiel wi ario: ebigombre kendo, ku gengi man ora m’atong’a, cil i nindo m’arida. 26Man yo ng’ei yenga pier abusiel wi arionde e ng’atu ma juwiro bithumbre woko, man ebibedo ku gin moko ngo: man dhanu pa jaditmawijone ma bibino gibinyotho adhura ku kamaleng’; e kajikne bibedo ku gin ma eoro piny, man ali bibedo nuti cil i kajikne; jukeco ya judwok piny ni uvuru. 27#Dan 11:31; 12:11; Mt 24:15; Mk 13:14Man ebitimo lembariba ma tek ku dupa mi yenga acel; man i die yenga ebijigo lam ku girathiera; man ng’atu m’utimo uvuru bibino wi bomb ginmajudagu; man cil kum kajikne m’upong’, man ma jukeco, jubikonjo kwinyo wi weg uvuru.
Currently Selected:
Daniel 9: AB1970
Highlight
Copy
Compare
Share
Want to have your highlights saved across all your devices? Sign up or sign in
The Holy Bible In Alur (Lur), Revised Orthography © United Bible Societies, 1970.
