Daniel 10

Giranena ma Daniel Uneno Dhu Kulo Hidekel

1I rundi mir adege pa Kuro m’ubimo mir Ajemi gin moko nyuthre ni Daniel, ma julwong’o nyinge Beltecazar; ginduni en e andha, en e ali ma dit: man eng’eyo ginduni, man eng’eyo ginmawokiwang’. 2I ceng’ maeca, an a Daniel, aywak yenga adek bo. 3Acamu kwen ma mit ungo, kadok ring’o kadi pigulok de gimondo i dhoga ngo, kadi mo de awiro ki ngo, maram yenga adek uthum ko. 4Man i ceng’ pier ario wi ang’wende mi dwi ma kwong’ane, kan ani dhu kulo ma dit, ma en e Hidekel, 5#Nyu 1:13-15; 2:18; 19:12Ating’o wang’a malu, man aneno, man, nen, ng’atu moko m’uronyo bongu ma nwang’, ma piere bedo atwia ku mola ma kwar ma leng’ mir Ufaz: 6kume bende e calu kidi ma mar mar, man wang’e calu lukoth, man tong’ wang’e calu thala m’uliel, bote ku tiende ke calu mola m’urieny, man dwand lembe pare calu dwand udul dhanu. 7Man, an a Daniel, a kenda m’aneno ginmawokiwang’ne; kum ju ma wabedo wakugi gineno ginmawokiwang’ne ngo; ento mielkum ma dit umakugi, e giringo kara gipondi. 8Ka kumeno juweka adong’ a kenda, man aneno ginmawokiwang’ ma dit maeni, man tego moko mbe m’udong’ i ia; kum bero para lokre i ia ni nyoth, man tego moko mbe m’udong’ i ia. 9Ento awinjo dwal mi lembe pare; e kan awinjo dwal mi lembe pare, e nindo ma pek unura, wang’a de lokre yor i ng’om.

10Man, nen, cing’ umulo kuma, m’uketha wi conga, man wi uthen cinga. 11Man ewacu ira kumae, E Daniel, in i ng’atu ma jumaru dit, dong’ ing’ei lembe m’ayero iri, man icung atira; kum juora i beng’i kawono. Man kan eyero lembe maeni ira, acungo ma kuma bemiel. 12Elund ewacu ira kumae, Lworo kud unegi, Daniel; kum ugambre i ceng’ ma kwong’a m’iketho ie adundeni kara ing’ei, man kara ijwigri giri i wang’ Mungu peri, lembe peri winjre: man abino kum lembe peri. 13#Nyu 12:7Ento jaditmawijo mi ker mir Ajemi jai ira ceng’ pier ario wi acel; ento, nen, Mikael, ng’atu acel ma kind judongomawijo ma gi judongo, ebino kara ekonya: man adong’ keca kud ubimo mir Ajemi. 14Kawono abino kara aketh ing’ei gin ma biwok ma cen kum juthu; kum ginmawokiwang’ne fodi en e mi nindo dupa. 15E kan edaru yero ira calku lembe maeni, akulo wang’a i ng’om, man adoko ajuba. 16Man, nen, ng’atu acel ma calu wod dhanu emulo dendhoga: e alund aalu dhoga, man ayero awacu ni ng’atu m’ucungo i wang’a kumae, E rwoth para, ni kum ginmawokiwang’ can para dwog i wia, man tego dong’ umbe kuda. 17Kum jatic pa rwoth para maeni copo weco ku rwoth para maeni nenedi? kum pira, aruca ruca tego moko mbe m’udong’ i ia, kadok yuyo de mbe m’udong’ i ia.

18Ng’atu acel ma calu ayi dhanu lund umulo kuma kendo, e emio ira tego. 19Man ewacu kumae, E ng’atu ma jumaru dit, lworo kud unegi: kwiocwiny ubed iri, bed ku tego, eyo, bed ku tego. E kinde m’eyero ira, judwoka tek, man awacu kumae, Wek rwoth para weci, kum idwoka tek. 20Elund ewacu kumae, Ing’eyo nia abino i beng’i pir ang’o? man kawono abidok nikiedo ku jaditmawijo mir Ajemi: man kan acidho, nen, jaditmawijo mi Yunani biwok. 21Ento abiyero iri maeno m’ukieure i lembagora mi lemandha: man ng’atu moko mbe m’ubedo ku tegocwiny karacelo kuda kum ju maeni ndhu Mikael ma jaditmawijo mu.

Currently Selected:

Daniel 10: AB1970

Highlight

Copy

Compare