Daniel 7

Lek pa Daniel pi Yedi Ang’wen

1I rundi ma kwong’ane pa Belcazar m’ubimo mi Babeli Daniel uneno lek ku giranena m’uwok i wie wi kavuto pare: elund egoro lekne man eyero min giki maeni. 2Daniel uyero man ewacu kumae, Aneno i gin m’uwok i wang’a ku diewor, man, nen, yamu ang’wen mi polo ukoto wi nam ma dit. 3#Nyu 13:1; 17:8Man yedi ang’wen ma dongo giwok kud i nam, ma gi tung’ tung’ ku wagi. 4#Nyu 13:2Ma kwong’ane calu umvor, man ebedo ku bomb acur: aneno maram bombe luny ko, man juting’e malu kud i ng’om, juketho ecungo wi tiende ario de calu dhanu; man maram jumio ko ire adunde dhanu. 5Man nen, yedi mange, mir arionde, calu wai; man etingre malu wi ng’ete kurucel, man wel ng’et adek ni i dhoge i kind lake: e giwacu ire kumae, Ai malu, cam ring’o dit. 6Yo ng’ei maeni aneno, man, nen, yedi mange, calu ng’u, m’ebedo ku bombe ang’wen mi winyo i ng’eye; yedine bedo ku wie ang’wen bende; man bimobim umire ire. 7#Nyu 12:3; 13:1Yo ng’ei maeni aneno i ginmawokiwang’ ku diewor, man, nen, yedi mir ang’wende, ma jang’oi ndiri man ma tek, man won tego ma dit; man ebedo ku lake ma dit mi nyunyu; ecamu man eturo nziki nziki, man enyono donge ku tiende: man e tung’ ku yedi ceke m’ular uwok ire; man ebedo ku tunge apar. 8#Nyu 13:5, 6Ia pido pi tunge, man, nen, tunge mange ma nok uidho malu i kindgi, i wang’e tunge adek ma kwong’a jufudho kud ulaggi: man, nen, i tunge maeni wang’e nuti calu wang’ dhanu, man dhoge ubeyero gin ma dit.

9 # Nyu 20:4; Nyu 1:14 Aneno maram juketho ko komker, man ng’atu m’uti mi ceng’ ujany: kendi pare tar calu pei, man yukwie calu yuk rombe ma leng’; komker pare lebmac m’uliel, ukobrene mac m’uliel. 10#Nyu 5:11; Nyu 20:12Kulo mi mac ukadhu uai i wang’e: rubanga mi rubanga gitimo ire, man rubanga apar bang’ rubanga apar gicungo i wang’e: e juketho pokolembe, man juyabu kitabu. 11Aneno i nindo maeca um dwal mi lembe ma dit ma tunge yero; aneno maram junego ko yedine, man maram junyotho ko kume de, man maram jumie ya juwang’e ku mac. 12Man pi dong’ yedi m’udong’, bimobim migi jukabu woko: ento nindo mi bedo migi jumedo mi oro man nindo.

13 # Mt 24:30; 26:64; Mk 13:26; 14:62; Lk 21:27; Nyu 1:7, 13; 14:14 Aneno i ginmawokiwang’ mi diewor, man, nen, ng’atu acel ubino kind afuru m’i polo calu wod dhanu, man ebino cil ba ng’atu m’uti mi ceng’, man gikele ceng’ni i wang’e. 14#Nyu 11:15Man jumio ire bimobim, ku dwong’, man ker, kara kodhidhanu ceke, man thek ceke, ku dhok ceke gitim ire: bimobim pare en e bimobim mi nja, ma bikadhu woko ngo, man ker pare en e ker ma jubinyotho ngo.

15An a Daniel, can unega i tipona i kuma, man ginmawokiwang’ mi wia ng’abu cwinya. 16Acoro ceng’ni ng’atu acel m’i kind ju m’ucungo ceng’ni, man apenje pi lemandha mi maeni ceke. Ka kumeno eyero ira, man eketho ang’eyo thelembe mi ginduni. 17Ewacu kumae, Yedi ma dongo maeni, ma gin ang’wen, gin ubimo ang’wen, ma biai kud i ng’om. 18#Nyu 22:5Ento jumaleng’ pa Ng’atu ma Malu Ngbir bijolo ker, man gibibedo wi ker nja, cil mi rondo ku rondo. 19Alund ayenyo ang’ei lemandha pi yedi mir ang’wende, ma en e tung’ ku wadi ceke, jang’oi ndiri apila, ma lake nyunyu kwa, man wi lwete mola kwa; ma camu, ma turo nziki nziki, man ma nyono donge ku tiende; 20man pi tunge apar ma ni i wie, man tunge mange m’uidho malu, ma adek de podho i wang’e, cil tunge maeno m’ubedo ku wang’e, ku dhoge m’uyero gin ma dit, ma nenne dit ma sagu juwagi. 21#Nyu 13:7Aneno, e tung maeno timo ali ku jumaleng’, man esagugi; 22#Nyu 20:4maram ng’atu m’uti mi ceng’ uwok ko, e lembapoka mire ni jumaleng’ pa Ng’atu ma Malu Ngbir, man nindo wok ma jumaleng’ ucamu ie ker.

23Ewacu kumae, Yedi mir ang’wende bibedo ker mir ang’wende wi ng’om ma bibedo tung’ ku ker ceke, man ebicamu ng’om yu, man ebinyone piny, ebiture de nziki nziki. 24#Nyu 17:12Man pi tunge apar, en e ubimo apar ma biwok i ker maeni: man mange biwok yo ng’eigi; man ebibedo tung’ ku ma kwong’ane, man ebiredho ubimo adek. 25#Nyu 12:14; 13:5, 6Man ebiyero lembe kum Ng’atu ma Malu Ngbir; man ebiolo jumaleng’ pa Ng’atu ma Malu Ngbir; man ebipido ya elok nindo ku cik; man jubimiogi i cinge cil nindo ku nindo moko man ng’et nindo. 26Ento jubiketho pokolembe, man jubikabu bimobim pare woko, kara girwinye ginyothe cil i kajikne. 27#Nyu 20:4; Nyu 22:5Man ker ku bimobim, ku dwong’ mi ker ma the polo dho, jubimio ni dhanu mi jumaleng’ pa Ng’atu ma Malu Ngbir: ker pare en e ker ma rondo ku rondo, man bimobim ceke gibitimo ire man gibiwore. 28Maeni kajik mi lembene. An a Daniel, pidoic para ng’abu cwinya dit, man wang’a lokre i ia; ento akanu lembene i adundena.

Currently Selected:

Daniel 7: AB1970

Highlight

Copy

Compare