Daniel 6

Daniel i Odumvor

1Ebedo ber ni Dario nia eketh jubim dak acel ku pier ario wi ker, ma gibed i ker ceke; 2man judongo adek ni i wigi, ma Daniel en e acel m’i kindgi; kara jubim maeni copo mio kwan migi igi, man kara ruvwa moko kud ukwany ubimo. 3Daniel maeni julund judode wi judongo ku jubim, kum tipo ma ber hai ni i ie; man i ubimo pido ya ekethe wi ker ceke.

4Judongo ku jego gilund giyenyo ginwang’ lembe kum Daniel pi ker; ento gicopo nwang’u lembe moko ngo kadok lem ma rac, kum en e mandha, kadok kier moko kadi lem ma rac de junwang’u i ie ngo. 5Dhanu maeno gilund giwacu kumae, Wabinwang’u lembe moko ngo kum Daniel maeni, tek wakunwang’e i kume pi cik pa Mungu pare ngo. 6Judongo maeno ku jubim maeno gilund gicoko dhoggi karacelo bang’ ubimo, man giwacu ire kumae, Ubimo Dario, bed nja. 7Judongo ceke mi ker, ku jego man judongo, juporthelembe, man jubim, giporo lembe karacelo kara giketh cik ucungi, man kara giketh cik ubed tek, kara ng’atu ma tek bipenjo penji moko ba mungu moko kadi dhanu mi ceng’ pier adek, ndhu i beng’i, E ubimo, jubibole i odumvor. 8Nie, E ubimo, keth cik ubed tek, man kieu ayi wi lembagora, kara kud elokre, calku cik mi Jumedi ku Juajemi, ma lokre ngo. 9Kum kumeno ubimo Dario kiewo ayi wi lembagora man wi cik.

10Man ka Daniel ung’eyo nia jugoro ayi wi lembagorane, ecidho i ot pare (nwang’u wang’ot pare bedo thwolo yo ba Yerusalem); man erum wi conge wang’ adek ku ba ceng’, e erwo, man emio foyofoc i wang’ Mungu pare, calu naka ebedetimo. 11Dhanu maeno gilund gicokri karacelo, man ginwang’u Daniel ubepenjo man ebekwayu i wang’ Mungu pare. 12Gilund gibino ceng’ni, man giyero i wang’ ubimo pi cik p’ubimo kumae: Igoro ayi wi cik ungo, nia ku ba dhanu nzu ma bipenjo penji ba mungu moko kadi ba dhanu i nindo mi ceng’ pier adek, ndhu i beng’i, E ubimo, jubibole i odumvori? Ubimo loko lembe man ewacu kumae, Lembe maeni en e andha, calku cik mi Jumedi man Juajemi, ma lokre ngo.

13Gilund giloko lembe man giwacu i wang’ ubimo kumae, Daniel maeno, ma en e mi nyithindho mi ng’eca mi Yuda, ewori ngo, E ubimo, kadok cik m’igoro ayi i wie, ento epenjo penji pare wang’ adek ku ba ceng’. 14E kan ubimo winjo lembe maeni, eton i ie dit, man eketho adundene kum Daniel kara ebodhe; e etimo ma tek cil ma ceng’ upodho kara ebodhe. 15Dhanu maeno gilund gicoko dhoggi karacelo bang’ ubimo, man giwacu ni ubimo kumae, Ng’ei E ubimo, nia en e cik mi Jumedi ku Juajemi, nia cik kadi lembang’ola m’ubimo ketho ecungi lokre ngo.

16E ubimo lund ung’olo, man jukelo Daniel, e gibole i odumvor. Nie ubimo yero man ewacu ni Daniel kumae, Mungu peri m’itimo ire thiri thiri, ebibodhi. 17E jukelo kidi, man jujenge dhu odumvor; man ubimo mwono ayi i wie kud ayi pare ma dhe, man kud ayi mi judongo pare; kara lembe moko kud ulokre kum Daniel. 18Ubimo lund ucidho i odker pare, man ekwiro cam ku diewor soro; kadok adungu de jukelo i wang’e ngo: nindo de lal i wang’e.

19Ubimo lund uai pir kugweno, man ecidho pio ba odumvor. 20Man kan etundo ceng’ni odumvome ba Daniel, ekok ku dwande mi can; ubimo yero man eweco ni Daniel kumae, E Daniel, jatic pa Mungu ma kwo, Mungu peri, m’itimo ire thiri thiri, ecopo bodhi ni umvori? 21Daniel ulund uwacu ni ubimo kumae, E ubimo, bed rondo ku rondo. 22Mungu para oro malaika pare, man emio dhu umvor, man gitima rac ungo; kum junwang’u gin moko ma rac i ia ngo i wang’e; man i weng’i bende, E ubimo, atimo gin moko ma rac ungo. 23Anyong’a ma dit ulund unego ubimo, man eng’olo nia juting’ Daniel malu kud i odumvor. Ka kumeno juting’o Daniel malu kud i odumvor, e gin moko ma rac umbe ma jungwang’u i kume, kum egeno Mungu pare.

24E ubimo ng’olo, man jukelo dhanu maeno ma gidoto Daniel, man gibologi i odumvor, gin, ku nyithindho migi, ku mon migi; man umvor usagugi, man gituro cogo migi ceke nziki nziki, ma fodi gitundo the odumvor ungo. 25Ubimo ma Dario lund ukiewo ni kodhidhanu ceke, ku thek ceke, man dhok ceke, m’ubedo i ng’om yu kumae, Kwiocwiny umedre iwu. 26Atimo cik, nia i bimobim ceke mi ker para kum dhanu miel man lworo neggi i wang’ Mungu pa Daniel; kum en e Mungu ma kwo, man ebedo tek mi nja, ker pare de en e ker ma binyothre ngo; bimobim pare de bibedo cil i kajikne. 27Ewodho man ebodho, man etimo giranyutha ku musana i polo man i ng’om m’ebodho Daniel ni tego mir umvor.

28Kum kumeno Daniel maeno lembe bedo ire miero i camuker pa Dario, man i camuker pa Kuro ma Jaajemi.

Currently Selected:

Daniel 6: AB1970

Highlight

Copy

Compare