Daniel 1

Juponjo Daniel ku Juwagi

1 # 2 Ub 24:1; 2 Kei 36:5-7 I rundi mir adege mi camuker pa Yehoiakim m’ubimo mi Yuda, Nebukadnezar m’ubimo mi Babeli bino Yerusalem, man etieke kud ali. 2#2 Ub 20:17, 18; 24:10-16; 2 Kei 36:10; Isa 39:7, 8Man Rwoth umio Yehoiakim m’ubimo mi Yuda i cinge, karacelo kud agulu moko mi ot pa Mungu; man eterogi i ng’om mi Cinar ba ot pa mungu pare; e ekelo agulu i ot kanpiny pa mungu pare. 3Man ubimo yero ni Acpanaz ma jego mi judongo pare, ya ekel dhanu moko mi nyithindho mir Israel, ma gi mi kodhi mi ker man mi dhanu ma pigi nuti; 4awobi ma poyo mbe i kumgi, ento ma cu, man ma riu i rieko ceke, ma ng’eyong’ec de ni kugi, ma ng’eyo girang’eya de, man wagi dhanu ma copo cungo i odker p’ubimo; man kara eponjgi ponji ku dhu Jukaldayo. 5Man ubimo ng’olo igi cemo mi cemo p’ubimo ceng’ ku ceng’, man ni pigulok m’emadhu, man nia jutung’gi rundi adek; kara yo ng’eye gicopo cungo wang’ ubimo. 6Nie kind joni gi eni, mi nyithindho pa Yuda, Daniel, ku Hanania, ku Micael, man Azaria. 7Man jego mi judongo ecaku nying’gi; pa Daniel ecaku Beltecazar; man pa Hanania ecaku Cadrak; man pa Micael ecaku Mecak; man pa Azaria ecaku Abed-nego.

8Ento Daniel ukeco i adundene nia ebicidre gire ku cemo p’ubimo ngo, kadok ku pigulok m’emadhu: ka kumeno ekwayu ba jego mi judongo nia kud ecidre gire. 9Nie Mungu ketho Daniel unwang’u bero ku ngisi i wang’ jego mi judongo. 10E jego mi judongo wacu ni Daniel kumae, Lworo benega kum rwoth para m’ubimo, m’eng’olo cemo mu ku giramadha mu: kum ebineno weng’wu bedo rac ma sagu wang’ awobi wedu nedi? ka kumeno wumaru ketho ubimo thum wia. 11Daniel ulund uwacu ni jagwok piny ma jego mi judongo ketho wi Daniel, ku Hanania man Micael, kud Azaria kumae: 12Akwei, ponj jutic peri ceng’ apar; man wek jumi iwa dek wacam, ku pi de wamadhi. 13E ka jukojunen wang’wa i weng’i, man wang’ awobi m’ucamu cemo p’ubimo; man calu ineno, itim de ni jutic peri.

14Ka kumeno ewinjo dwandgi i lembe maeni, man eponjogi ceng’ apar. 15Man ka ceng’ apar uthum wang’gi nen ber ma sagu, man kumgi cwe ma sagu awobi ceke ma camu cemo p’ubimo. 16Kum kumeno jakurpiny ukabu cemo migi cen, ku pigulok ma maku gimadhi, man emio igi dek.

17Nie pir awobi ang’wen maeni, Mungu mio igi ng’eyong’ec ku bodho i ponji ku rieko ceke: man Daniel ubedo ku ng’eyothelembe mi ginmawokiwang’ ku lek de. 18Man ka ceng’ne thum m’ubimo ng’olo ya juroigi, jego mi judongo kelogi i wang’ Nebukadnezar. 19Man ubimo giweco kugi; e i kindgi ceke junwang’u jumoko ngo ma calu Daniel, ku Hanania, man Micael kud Azaria: ka kumeno gicungo i wang’ ubimo. 20Man ku ba lembe ceke mi rieko ku ng’eyothelembe, m’ubimo penjo kogi, enwang’u nia gisagu weg ajoga ku juwodhtho ma ni i ker pare ceke wang’ apar. 21Man Daniel ubedo cil i rundi ma kwong’ane p’ubimo Kuro.

Currently Selected:

Daniel 1: AB1970

Highlight

Copy

Compare