Amos 8

Ginmawokiwang’ Mir Ang’wende: Katoko mi Nying’ Cwir

1Rwoth Yehova nyutho ira kumeni: man, nen, katoko mi nying’ cwir. 2Man ewacu kumae, Amos, ineno ang’o? man awacu kumae, Katoko mi nying’ cwir. Yehova lund uwacu ira kumae, Kajik uwok wi dhanu para Israel; abikadhu akadha kud i ng’etgi kendo ngo. 3Man wer mi hekalu bibedo goyonduru i ceng’ maeca, Rwoth Yehova wacu: avu bibedo dupa; gibibayugi woko ling’ ling’ i kaka ceke.

Nyoth mi Israel ni Ceng’ni

4Wuwinj maeni, E wun ma wuyenyo wumwony jucanpiny, man wuvoi jucan mi ng’om, 5ma wuwacu kumae, Dwi ma por bibedo umbe awene, kara walok cami? man sabatu, kara wawodh nganu, ma wadwok ko katoko nok, man cekel dit, ma watim ko ku ndra ku mukero mir abombi de: 6kara wang’ieu jucan ku mola ma tar, man jucanpiny ku wara ario, man walok cung’ nganu? 7Yehova kwong’o ku dwong’ pa Yakobo kumae, Andha wia biwil ki ngo kum tic migi moko. 8Kum ng’om bimiel kum maeni ngo, man ku ba dhanu ku ba dhanu m’ubedo i ie biywak ungo? eyo, ebiai dho calu Kulo; man ebisendre e ebidok kendo, calu Kulo mi Misiri. 9Man ebitimbre i ceng’ maeca, Rwoth Yehova wacu, nia abiketho ceng’ umwony dieceng’, man abiyutho ng’om i ceng’ ma terere. 10E abiloko agba mu ni ywak, man wer mu ceke ni goyonduru; man abikelo gonia wi pier ceke, man lunywic i wie kubang’e kubang’e; man abikethe calu ywak mi wodo ma kulong’, man kajikne calu ceng’ ma kec.

11Nen, ceng’ ubino, Rwoth Yehova wacu, nia abioro ndru i ng’om, ndru mi kwen ungo, kadi rieupi de ngo, ento mi winjo lembe pa Mungu. 12E gibiwotho gambre ba nam cil kum nam, man gambre yor ariwa ma malu cil yo nyangu; gibiringo kun ku kun kara giyeny lembe pa Yehova, e gibinwang’e ngo. 13I ceng’ maeca nyir ma wang’gi leng’ kud awobi bivoc ni rieupi. 14Ju ma kwong’o kwong’ ku dubo mi Samaria, man giwacu kumae, Calu mungu peri bedo kwo, E Dan, man, Calu yo mi Ber-ceba bedo kwo; gibipodho, e gibiai kendo ngo.

Currently Selected:

Amos 8: AB1970

Highlight

Copy

Compare