Amos 5

Lwong’o ni Lokri

1Wuwinj lembe maeni m’ating’o mi ywak i wiwu, E ot mir Israel. 2Nyaku ma ng’won mir Israel upodho; ebiai kendo ngo: juredhe piny wi ng’om pare; ng’atu moko mbe m’uting’e malu. 3Kum Rwoth Yehova wacu kumae: Adhura ma wok woko rubanga donge bidong’ dak, man ma wok woko dak donge bidong’ apar, ni ot mir Israel.

4Kum Yehova wacu kumae ni ot mir Israel, Wuyenya, e wuibedo kwo; 5ento kud wuyeny Beth-el, kadi kud wumond i Gilgal, man kud wukadh i Ber-ceba: kum Gilgal bicidho i ng’eca andha, man Beth-el bidoko gin mananu. 6Wuyeny Yehova, e wubibedo kwo: emaru moc calu mac i ot pa Yusuf, man ewang’ piny, e ng’atu moko mbe ma binege i Beth-el. 7Wun ma wuloko pokolembe ni yendadra, man wubayu bedopwe i ng’om. 8#Yob 9:9; 38:31Wuyeny ng’atu m’utimo cero ma Kilimia kud Orion, man m’uloko tipo mi tho ni kugweno, man m’udwoko ceng’ col ku diewor; m’ulwong’o pi mi nam, man m’ukonjogi woko i wang’ ng’om (Yehova en e nyinge); 9m’ukelo nyoth pio wi jatego, ketho nia nyoth ubino wi ka ma tek.

10Gidagu ng’atu m’ujuko i dhugang’ man gidagu ng’atu ma weco atira. 11Ka kumeno kum wunyono jacan, man wugamu girawodha mi nganu i bang’e: wugomo udi mi kidi m’apaya, ento wubibedo i igi ngo; wupidho podho mir ulok ma ber, ento wubimadhu pigulokne ngo. 12Kum ang’eyo maram gondri mu dit ko, man maram dubo mu tek ko, wun ma wusendo ju ma pwe, ma wugamu jamng’om, ma wuroco jacanpiny i dhugang’. 13Ka kumeno ng’atu ma paru lembe biling’ i nindo ma kumeni; kum en e nindo ma rac.

14Wuyeny gin ma ber, gin ma rac re ngo, kara wubed kwo; e kumeno Yehova, Mungu mir udul, bibedo kudu, calu wuwacu. 15Wudag gin ma rac, man wumar gin ma ber, man wuketh pokolembe ma pwe i dhugang’: kuno nyo Yehova, Mungu mir udul, bitimo ku bero kum dong’ Yusuf m’udong’.

16Ka kumeno Yehova, Mungu mir udul, ma Rwoth, uwacu kumae: Ywak bibedo i gengi ceke: man gibiwacu kumae i wang’ayo ceke, Akayo! akayo! man gibilwong’o jatipodho ba ywak man wadi ju ma gi riek ku ywak ni goyonduru. 17Man ywak bibedo nuti i podho mir ulok ceke; kum abikadhu kud i kindi, Yehova wacu.

18Can i wiwu wun ma wuyenyo ceng’ pa Yehova! Pirang’o wuyenyo wubed ku ceng’ pa Yehova? En e mudho, der ungo. 19Calu tek dhanu ringo ni umvor, e girombo ku wai; kadi tek emondo i ot man ejengo cinge kor ot, e thwol utong’e. 20Ceng’ pa Yehova bibedo mudho ngo, man der ungo ngo? en e mudho ma bii ngo, man leropiny moko mbe i ie ngo?

21 # Isa 1:11-14 Adagu, acayu agba mu, man anyong’a binega ki ngo kum cokri mu mi rwo. 22Eyo, kadok wuthiero ira lam m’awang’a mu ku lam mi mogo mu, abijologi ngo; kadok lam mi kwiocwiny mu mi lim mu m’ucwe de abiparu pire ngo. 23Kab badwal mi wer peri cen kud i kuma; kum akwero winjo badwand dongo mu. 24Ento wek pokolembe mol piny calu pi, man bedopwe calu kulo ma dit.

25 # Tic 7:42, 43 Wukelo lam man lam mi mogo i bang’a i langa rundi pier ang’wen, E ot mir Israel? 26Eyo, wuyeyo hema mir ubimo mu ku sanduk mir ayi gin m’acwia mu, en e cero mi mungu mu, ma wutimo iwu giwu. 27Ka kumeno abiketho wucidho i ng’eca loka Dameski, Yehova wacu, ma nyinge Mungu mir udul.

Currently Selected:

Amos 5: AB1970

Highlight

Copy

Compare