Zekaria 8

Jerusalɛm Ho Anohoba

1Na dɔm EWURADZE n’asɛm baa mo hɔ, dɛ, 2Mbrɛ dɔm EWURADZE se nye yi: Motwe Zion ho nyinkun kɛse, na enyiber kɛse na medze twe no ho nyinkun. 3Mbrɛ EWURADZE se nye yi: Meresan aba Zion nkyɛn, na mebɛtsena Jerusalɛm mu: na wɔbɛfrɛ Jerusalɛm Nokwar kurow no; na dɔm EWURADZE ne bepɔw no, Bepɔw krɔnkrɔn. 4Mbrɛ dɔm EWURADZE se nye yi: Nkɔdaa na mberwa bɛda ho atsenatsena Jerusalɛm abrɔn mu, na onyin dodow ntsi, nyimpa biara bekitsa poma wɔ ne nsamu. 5Na mbanyimbasiaba na nkataasia bɛhyɛ kurow no n’abrɔn no amaama, na woedzi agor wɔ abrɔn no mu. 6Mbrɛ dɔm EWURADZE se nye yi: Sɛ ɔyɛ ɔman yi ne nkaa no nwanwa wɔ nda no mu a, aso ɔbɛyɛ nwanwa wɔ emi so m’enyi do anaa? Dɔm EWURADZE na ɔse. 7Mbrɛ dɔm EWURADZE se nye yi: Hwɛ, mebɛgye me man nkwa efi boka asaase no do, na anee asaase no do: 8na medze hɔn aba, na wɔabɛtsena Jerusalɛm mu; na wɔbɛyɛ me man, na emi so mayɛ hɔn Nyankopɔn, wɔ nokwar na tsenenee mu. 9Mbrɛ dɔm EWURADZE se nye yi: hom nhyehyɛ hom nsamu dzen, hom a hom tse nsɛm yi wɔ nkɔnhyɛfo anomu wɔ nda yi mu, hɔn a wɔwɔ hɔ da no a wɔtoow dɔm EWURADZE ne fi fapem no, dɛ worisi asɔrdan no. 10Na ansaana da no reba no, na apaabɔ ho akatua nnyi hɔ mma nyimpa bi, eso apaabɔ nnyi hɔ mma abowa; eso asomdwee biara nnyi hɔ mma nyia opue anaa nyia ɔba mu osian ɔhohiahiafo no ntsi: na memaa nyimpa nyina obiara nye ne nyɛnko dzii esi. 11Na afei dze mennkɛyɛ dɛ nkan no ama ɔman yi nkaa no, dɔm EWURADZE na ɔse. 12Na asomdwee aba bɛba hɔ; wenyindua bɔsow n’aba, na asaase ama no ndɔbaa, na sorsor bɔtɔ no bɔsu; na mebɛma ɔman yi ne nkaa no enya ndzɛmba yinom nyina edzi. 13Na ɔbɛba dɛ, dɛ mbrɛ hom yɛɛ ndom wɔ amanaman mu no, ao Juda fifo na Israel fifo, dɛmara na mebɛgye hom nkwa, na hom ayɛ nhyira: mma hom nnsuro, na mbom hom nhyehyɛ hom nsamu dzen. 14Na mbrɛ dɔm EWURADZE se nye yi: Dɛ mbrɛ modween dɛ mebɛyɛ hom bɔn wɔ ber a hom egyanom yii me ebufuw no na mannsesa m’adwen no; 15dɛmara so bio na madwen nda yi mu dɛ mebɛyɛ Jerusalɛm na Juda fi yie: mma hom nnsuro. 16#Efe 4.25 Iyinom nye ndzɛmba a hom nyɛ; Hom mu nyimpa biara nkasa nokwar nkyerɛ ne nyɛnko; hom mbua nokwar na asomdwee atsɛn wɔ hom mbobokɛse mu: 17na mma hom mu obiara nndwen n’akoma mu bɔn wɔ ne nyɛnko ho; na mma hom mmpɛ ator ntanka: na iyinom nyina yɛ ndzɛmba a mikyir, EWURADZE na ɔse.

18Na dɔm EWURADZE n’asɛm baa mo hɔ, dɛ, 19Mbrɛ dɔm EWURADZE se nye yi: Bosoom a otsia anan, enum esuon na du no mu akɔnkyen no, bɛyɛ enyigye na ahosɛpɛw, na ahotɔ afahyɛ ama Juda fi; dɛm ntsi hom ndɔ nokwar na asomdwee. 20Mbrɛ dɔm EWURADZE se nye yi: Ɔbɛba no dɛmara, dɛ aman, na nkurow pii mu atsefo bɛba: 21na kurow kor mu atsefo bɔkɔ kor so mu akɛse dɛ, Hom mma yɛnkɔ ntsɛmara nkɔtotɔ nserɛ EWURADZE n’enyimpa, na yɛnhwehwɛ dɔm EWURADZE n’ekyir kwan: na mara so morokɔ. 22Nyew, aman pii na amanaman a wɔyɛ dzen bɛba abɔhwehwɛ dɔm EWURADZE n’ekyir kwan wɔ Jerusalɛm, na wɔatotɔ aserɛ EWURADZE n’enyimpa. 23Mbrɛ dɔm EWURADZE se nye yi: Nda no mu na ɔbɛba dɛ mbanyin du a wofi amanaman kasaa nyina mu bosusuo Jewnyi baako n’atar ano, dɛ, Yɛnye hom bɔkɔ, osiandɛ yɛatse dɛ Nyankopɔn nye hom wɔ hɔ.

Currently Selected:

Zekaria 8: MFANBRP

Highlight

Copy