Romefo 6

Kraest mu Anyɛnkoyɛ Ku Bɔn

1Dɛm ntsi afei yɛbɛka dɛn? Ana yɛbɛda ho atsena bɔn mu, ma adom no adɔɔ so anaa? 2Dabida. Ɔbɛyɛ dɛn na hɛn a yewui maa bɔn yɛbɛda ho atsena ase wɔ bɔn mu? 3Ana hom nnyim dɛ hɛn a wonumaa hɛn hyɛɛ Kraest Jesus mu no nyina, wonumaa hɛn hyɛɛ no wu mu? 4#Kol 2.12 Dɛm ntsi wɔnam enuma mu esie yɛnye no wɔ owu mu, ma dɛ mbrɛ wɔnam Egya no n’enyimnyam do nyaan Kraest fii ewufo mu no, dɛmara so na hɛn so yaanantsew nkwa fofor mu.

5Na sɛ wɔatsɛw hɛn nye Kraest abɔ mu kor wɔ no wu mu a, nna yɛnam no wusoɛr no do nye no bɔbɔ mu kor so efifir. 6Na yenyim dɛ wɔbɔɔ hɛn nyimpa dadaw no nye no mbeamudua mu, ma bɔn nyimpadua no eewu, amma yaannyɛ bɔn nkowaa bio: 7na nyia oewu no, woebu no bem wɔ bɔn ho. 8Na sɛ yɛnye Kraest wui a, yɛgye dzi dɛ yɛnye no bɛtsena ase so; 9osiandɛ yenyim dɛ Kraest a wonyaan no fii ewufo mu no runnwu bio, owu nndzi no do tum bio. 10Na owu a owui no, owui maa bɔn prɛko, na ase a ɔtse no ɔtse ma Nyankopɔn. 11Dɛmara so na hom mbubu hom ho dɛ hom ewu ama bɔn, na hom tse ase ma Nyankopɔn wɔ Kraest Jesus mu.

12Dɛm ntsi mma hom mma bɔn nndzi hen wɔ hom nyimpadua a obowu no mu, dɛ hom betsie no wɔ n’akɔndɔ mu; 13eso mma hom nngyaa hom nyimpadua mfafakuwa mma bɔn dɛ brakyew edwindadze, na mbom hom mfa homho mma Nyankopɔn dɛ hɔn a woefi ewufo mu tse ase, na hom ngyaa hom nyimpadua mfafakuwa mma Nyankopɔn dɛ tsenenee edwindadze. 14Na bɔn rinndzi hom do tum bio; osiandɛ hom nnyi mbra ase, na mbom hom wɔ adom ase.

Tsenenee ho Nkowaa

15Afei ebɛn asɛm a? Dɛ yennyi mbra ase na yɛwɔ adom ase ntsi, yɛnyɛ bɔn anaa? Dabida. 16Ana hom nnyim dɛ onyia hom egyaa homho ama no dɛ nkowaa dɛ hom betsie no no, sɛ bɔn a ɔdze kɔ owu mu dze o, setsie a ɔdze kɔ tsenenee mu o, ɔno a hom tsie no no no nkowaa nye hom? 17Na ndaase nka Nyankopɔn dɛ nkyɛ hom yɛ bɔn nkowaa, na afei hom fi hom akoma mu ayɛ setsie ama nkyerɛkyerɛ soronko a wɔdze hom hyɛɛ mu no. 18Na woeyi hom efi bɔn no nkowaasom ase, na hom abɛyɛ tsenenee no nkowaa. 19Mekasa wɔ nyimpa afamu wɔ hom honam ne mberɛwyɛ ntsi dɛ, Mbrɛ hom gyaa hom nyimpadua mfafakuwa dɛ nkowaa maa efifidze nye emumuyɛ dze kɔr emumuyɛ mu no, dɛmara na afei hom ngyaa hom nyimpadua mfafakuwa dɛ nkowaa mma tsenenee nkɔ ahotsewee mu.

20Na hom yɛɛ bɔn nkowaa no, hom twee homho fii tsenenee ho. 21Ebɛn aba na hom nyaa no wɔ ber no mu wɔ ndzɛmba a afei ɔyɛ hom fɛr no mu? Na ndzɛmba no n’ewiei nye owu. 22Na afei hom enya hom fahodzi efi bɔn ho, na hom abɛyɛ Nyankopɔn nkowaa yi, hom wɔ hom aba a ɔdze kɔ ahotsewee mu, na n’ewiei nye onnyiewiei nkwa. 23Na bɔn akatua nye owu, na Nyankopɔn n’adom akyɛdze nye onnyiewiei nkwa a ɔwɔ hɛn Ewuradze Kraest Jesus mu.

Currently Selected:

Romefo 6: MFANBRP

Highlight

Copy