Nahum 3
3
EWURADZE Ne Ntsea wɔ Ninive Do
1Due, bɔgya kurow!
Ɔwo a nsɛmfun na epoobɔsɛm ahyɛ wo ma;
na ewudzi so mmpa wo mu da.
2Apɔnkɔbaa ne gyegyee, na ntseaseanam anan ne kyirdidi;
mpɔnkɔ hɔn kwam kwam tutu, na ntseaseanam hɔn ehuruhuruw da no edzi dɛ;
3ɔpɔnkɔdofo dze rokɔbɔ enyi,
na afona rinyinam, na peaa reyerɛyerɛw;
na atɔfo pii,
na efun kuw kɛsenara a efun no wonnhu ewiei;
na wofintsifintsiw hɔn efun no do mpo.
4Iyi nyina fir Ninive,
edwaman fɛɛfɛw, abayifo wuraba no, no ndwamansɛm dodow ntsi,
ɔno a ɔdze ndwamansɛm tɔn amanaman,
na ɔdze n’abayisɛm tɔn mbusua.
5Hwɛ, menye wo enya,
dɔm EWURADZE na ɔse,
na mebɛpa w’asetam egu w’etsifi,
na mama amanaman ehu w’adagyaw,
na ahenman ehu w’ahoto.
6Na mobɔtow fi tantanntan egu wo do,
na mama adan atantandze,
na medze wo esi hɔ dɛ ahwɛdze.
7Na ɔbɛba dɛ hɔn a wɔhwɛ wo nyina befi wo nkyɛn eguan, na wɔase dɛ,
Ninive ayɛ ekurofo: woana na obosu ama no?
Henfa na mobɔhwehwɛ ɔwerɛkyekyefo ama wo?
8Aso ɔwo iye sen No-amon
a osi esutsen ntamu
a esu etwa no ho ehyia no;
na po yɛ ne ban
na n’afasu no?
9Etiopia na Egypt nye n’ahoɔdzen,
a nna hɔn tum nnyi mbanano;
na Put na Lubim so nye n’aboafo.
10Naaso wɔdze no kɔree,
wɔfaa no kɔr ndɔmmum:
hɔn mbɔtowaba so wɔdze hɔn abobɔ
abrɔn nyina do ekuku hɔn:
na wɔtwee n’enyimnyamfo ho tonto,
na ne nyimpa etsitsir nyina woguguu mpokyerɛ mu.
11Ɔwo so ahoguan bɔbow wo,
ibosuma,
na ɔwo so bɔhwehwɛ
guansumabew wɔ ɔtamfo no ntsi.
12W’abankɛse nyinara bɛyɛ dɛ adɔmbandua
no do wɔ adɔmbakan beree:
sɛ wɔwosow a,
ɔtsetsew totɔ odzifo no n’anomu.
13Hwɛ, wo akofo
ayɛ mbaa wɔ wo mu;
woebuebue w’asaase no mbobokɛse no pataa
ama w’atamfo:
na gya ahyew w’abokɛse ekyir adaban.
14Sesaw nsu sie ntuae no,
miamia w’abankɛse no mu:
tsia dɛtse, na wɔw kaadow dɛtse,
ma ntayaa fononoo no nyɛ dzen.
15Hɔ na gya bɛmen wo;
afona botwa wo akyen,
ɔbɛmen wo dɛ mbrɛ nkonyinko memen dza wohu biara:
na kaansa ema wo dodow yɛ pii dɛ nkonyinko,
anaadɛ mbɛbɛw mpo a.
16Ama w’eguadzifo adɔɔ so
asen ɔsor nworaba;
naaso tse dɛ nkonyinko no, wɔfa wo afo, na wotu kɔ.
17Wo dɔm a wɔbobɔ abɔtsir tse dɛ mbɛbɛw,
na w’asafohemfo tse dɛ mbɛbɛw mintsimintsi
a wɔsensam ban ho
wɔ awɔw da mu,
na sɛ ewia fir a, wotu kɔ,
na wonnhu fakor a wɔkɔ.
18Ao Asiriahen,
w’aweɔmfo atotɔ nkom:
w’akofo regye hɔn ahom:
wɔabɔ wo man apetse mbepɔw do,
na obi nnyi hɔ a ɔboaboa hɔn ano.
19Wo kur no nnyi mbotowee;
wo pirakur no yɛ dzen:
hɔn a wɔtse wo nka nyina
bɔ hɔn nsamu gu wo do;
osiandɛ woana koraa do
na emmfaa wo daadaa emumuyɛ no nkɔree?
Currently Selected:
Nahum 3: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
