Mika 6
6
EWURADZE Nye Ne Man Dzi Asɛm
1Afei hom ntsie dza EWURADZE se ɛ:
Soɛr, bɔ wo nkuro wɔ mbepɔw enyim,
na ma nkoko no ntse wo ndze.
2Hom mbepɔw, hom ntsie EWURADZE no nkurobɔ, na hom asaase mfapem a wɔwɔ hɔ daa no:
na EWURADZE nye ne man enya ham,
na ɔnye Israel beyi atsɛn.
3Ao me man, mayɛ wo dɛn,
na mafona wo ebɛnadze mu? Dzi dase tsia me ɛ.
4 #
Eks 4.10-16; 12.50-51; 15.20 Na emi na medze wo fii Egypt asaase do bae,
na mopoon wo fii nkowaayɛ fi no mu;
na mosomaa Moses,
Aaron, na Miriam dzii w’enyim.
5 #
Nka 22.2—24.25; Jos 3.1—4.19 Ao me man, kaa egyina a Moabhen Balak tui,
na dza Beor ba Balaam dze buaa no;
kaa ofitsi Sittim kodu Gilgal,
ama hom eehu EWURADZE ne ndzeyɛtsenenee.
6Ebɛnadze na memfa mbra EWURADZE enyim,
na mombɔkotow ɔsorsor Nyankopɔn no?
Aso memfa ɔhyew afɔr,
nye anantwimba a woedzi afe kor mbra?
7Aso EWURADZE n’enyi bɔsɔ nguannyin mpempem,
anaa ngo esutsen mpem du du?
Aso memfa m’abakan mma wɔ me mbrato ntsi,
mo honam mu aba memma wɔ me kra no bɔn ntsi?
Dza EWURADZE N’enyi Sɔ
8Ao onyimpa, wɔakyerɛ wo dza oye; na ebɛnadze bio
na EWURADZE rohwehwɛ no wo hɔ,
dɛ ebɛyɛ tsenenee na ebɔdɔ mbɔbɔrhu ara,
na enye wo Nyankopɔn bɛnantsew ahobrɛadze mu?
9EWURADZE ne ndze refrɛ kurow no,
na hɔn a wosuro no no yɛ enyansafo:
hom nnyɛ aso mma ntsea no,
na nyia ɔahyɛ no.
10Aso emumuyɛ akoradze wɔ emumuyɛ fi no mu,
na esusudze a ɔnnso a ɔyɛ ekyiwadze no.
11Aso mubobu nyia emumuyɛ nsɛn na foto
a nsisi abrambo wɔ mu wɔ ne nsamu no bem anaa?
12Osiandɛ emimdzi ahyɛ no mu ahonyafo no amaama,
na no mu atsefo no aka atorsɛm,
na hɔn gyirama daadaa wɔ hɔn anomu.
13Dɛm ntsi na mepira wo pira dzen;
wo bɔn ntsi na mayɛ wo afoafo.
14Ɔwo ibedzidzi, na eremmee;
na ebɛtse kɔm yerɛyerɛɛyerɛw:
ibeyi, na ennkɛfa no tɔtrɔtɔ akɔ;
na dza edze bɔkɔ no, medze bɛma afona.
15Ibodua, na innkobu:
ibetsiatsia ngoaba do, na ennkɛsera woho ngo;
na ebɛtsetsew wenyinaba, naaso eronnom nsa no bi.
16 #
1 Ahe 16.23-34; 21.25-26 Osiandɛ edzi Omri ahyɛdze
na Ahab fifo nyɛe nyina do,
na enantsew hɔn apam mu: mebɛma aayɛ amamfo,
na wo mu atsefo so aayɛ asesardze;
na aasoa me man n’enyimguase.
Currently Selected:
Mika 6: MFANBRP
Highlight
Share
Copy
Want to have your highlights saved across all your devices? Sign up or sign in
Mfantse Bible © Bible Society of Ghana, 2011.
