ԱՌ ԵՓԵՍԱՑԻՍ ԹՈՒՂԹ Գլուխ Զ
Գլուխ Զ
ԹԴ.
1Որդիք, հնազանդ լերուք ծնողաց ձերոց ի Տէր, զի այն է արժանն։ 2Պատուեա զհայր քո եւ զմայր, որ է առաջին պատուիրան յաւետիսն, 3զի քեզ բարի եղիցի, եւ երկայնակեաց լինիցիս ի վերայ երկրի։ 4Հարք, մի՛ զայրացուցանէք զորդիս ձեր, այլ սնուցանիջիք զնոսա խրատու եւ ուսմամբ Տեառն։ 5Ծառայք, հնազանդ լերուք տերանց ձերոց մարմնաւորաց ահիւ եւ դողութեամբ եւ միամտութեամբ սրտից ձերոց՝ որպէս եւ Քրիստոսի։ 6Մի՛ առ ականէ ծառայել իբրեւ մարդահաճոյք, այլ իբրեւ ծառայք Քրիստոսի առնել զկամս Աստուծոյ. 7սրտի մտօք ծառայել իբրեւ Տեառն, եւ մի՛ իբրեւ մարդկան։ 8Գիտասջիք թէ իւրաքանչիւր ոք որ զինչ առնէ զբարին, զնոյն ընդունի եւ ի Տեառնէ, եթէ՛ ծառայ, եւ եթէ՛ ազատ։ 9Եւ դուք, տեարք, զնոյն առնիջիք առ նոսա, ներելով առնել զպատուհասն, գիտասջիք թէ ե՛ւ նոցա ե՛ւ ձեր Տէր գոյ յերկինս. եւ ակնառութիւն ոչ գոյ առաջի նորա։
10 # 6։10 Ոմանք. Այսուհետեւ, եղբարք իմ, Այսուհետեւ զօրացարուք Տերամբ եւ կարողութեամբ զօրութեան նորա։ 11Եւ զգեցարուք զսպառազինութիւնն Աստուծոյ, զի կարող լինիջիք կալ ընդդէմ հնարից Սատանայի։ 12Զի ոչ է մեզ պատերազմ ընդ մարմնոյ եւ ընդ արեան, այլ ընդ իշխանութիւնս եւ ընդ պետութիւնս եւ ընդ աշխարհակալս խաւարիս այսորիկ, ընդ այսս չարութեան որ ի ներքոյ երկնից։
ԹԶ.
13Վասն այսորիկ առէք զսպառազինութիւնն Աստուծոյ, զի կարող լինիջիք ի դիմի հարկանել #6։13 Ի Յունին պակասէչարին յաւուրն չարութեան։ 14Եւ իբրեւ զամենայն ինչ կատարիցէք, հաստատուն կացէք, զտեղի կալջիք, պնդեալ զմէջս ձեր ճշմարտութեամբ, եւ զգեցեալ զզրահսն արդարութեան, 15եւ ագուցեալ զոտս պատրաստութեամբ աւետարանին խաղաղութեան։ 16Եւ ի վերայ ամենայնի առէք զվահանն հաւատոց, որով կարող լինիջիք զամենայն նետս մուխս չարին շիջուցանել։ 17Եւ առէք զսաղաւարտն փրկութեան եւ զսուսեր Հոգւոյն, որ է բանն Աստուծոյ. 18ամենայն աղօթիւք եւ խնդրուածովք աղօթս առնել յամենայն ժամանակի Հոգւով, եւ ի նոյն տքնեսջիք ամենայն ժուժկալութեամբ եւ խնդրուածովք վասն ամենայն սրբոց, 19եւ վասն իմ, զի ինձ տացի բան ի բանալ բերանոյ իմոյ համարձակութեամբ ցուցանել զխորհուրդս աւետարանին. 20վասն որոյ պատգամաւորիմ կապանօքս, զի նովին համարձակեցայց որպէս եւ պարտ իցէ ինձ խօսել։
21Բայց զի գիտիցէք եւ դուք զինէն զինչ գործիցեմ, զամենայն ինչ ցուցցէ ձեզ Տիւքիկոս սիրելի եղբայր եւ հաւատարիմ պաշտօնեայ ի Տէր. 22զոր առաքեցի առ ձեզ դմին իրի, զի գիտասջիք դուք զմէնջ, եւ մխիթարեսցէ զսիրտս ձեր։ 23Խաղաղութիւն ընդ եղբարս, եւ սէր հաւատովքն հանդերձ յԱստուծոյ ի Հօրէ եւ ի Տեառնէ Յիսուսէ Քրիստոսէ։ 24Շնորհք ընդ ամենեսին ոյք սիրեն զՏէր մեր Յիսուս Քրիստոս անեղծութեամբ։#6։24 Ոմանք ի Յոյն եւ ի Հայ ձեռագրաց յաւելուն. Ամէն։
Առ Եփեսացիս գրեցաւ ի Հռովմէ ի ձեռն Տիւքիկոսի։
Currently Selected:
ԱՌ ԵՓԵՍԱՑԻՍ ԹՈՒՂԹ Գլուխ Զ: ԳՐԲ1895
Highlight
Share
Copy
Want to have your highlights saved across all your devices? Sign up or sign in
Հայաստանի Աստվածաշնչային Ընկերություն, 2018
Bible Society of Armenia, 2018
