ROMA 9
9
I Ala dàngu na banjaru-na na papindi
1Yiana na papanii-nggu ni taï ma-padeningu-maya maa ba manguna i Karitu-ka. Nda kambàliku-anggunya. Na eti dalunggu na pa-kapipi-na na Ngahuna i Ala, na pamàndu-manya la etinggu ba ma-padeningu-maya yiana na papanii-nggu. 2Kanjupu hawina-ka dàngu na-haruka na etinggu 3lumuda da angu dedinggu da angu banjaru-nggu. Nadu jiapa-kai ka naràtu-ngga i Ala dàngu ka kahika-ka welingu lai Karitu lumuda nyuda màlawa nyuna wàngguma duku. 4Nyuda banjaru papindi-ha hi natuha ana wikina paraïna i Ala, màlamai ba na-paloha-nya na kawaha-na lai nyuda. Natura pa-njanjingu#pa-njanjingu; da lawiti ndai da manda pirada: da pa-njanjingu. dàngu nyuda, hi nawua-nja uku anggama. Napeka-nja paraïna i Ala nggikina bàdi na huri lumungu-da dàngu mbàda ngala-mada-njaka da panjanji-na. 5Ana umbuku-da da boku la mangilu-mandaha nyuda. I Karitu la hada tauna paweli-na la banjaru-da nyudama. Nu i Karitu nalàpa ndàbaya mbutana. Pa-wotungu-ya i Ala lundu nu - nu!#Pa-wotungu-ya i Ala lundu nu - nu!: jàka ndia jiaya Nyuna-maka na Ala na ma-kawaha-ya mbutana; pa-wotungu-ya Nyuna lundu nu - nu. Amingu.
6Nda nanjadi-apa na pa-njanjingu-na i Ala ka wànggu nda wànggua; tàka nda banjaru papindi ndàbana i Ala-aha mbutada da tau Ihirailu. 7Nda ana ndàbana i Ala-aha mbutada da ana umbuku-na i Ambarahàmu. Maa ba napanii-du i Ala lai Ambarahàmu, “Jiaha da ana umbuku-na i Ihàku-a duda da patiki ngeru ba ana umbuku-munja,” wànanya. 8Da ana umbuku-na i Ambarahàmu da manjadi Ana Ala, jiaha da madedi ruku pa-njanjingu-na i Ala-a wàna-duka nu; nda nanggàna ndàba-aha da ana umbuku-naka.#nda nanggàna ndàba-aha da ana umbuku-naka; Yiana laananja da ana umbuku-na i Ambarahàmu da madedi welingu lai Ihimailu na pa-paana-na i Hanggaru (tàngaru-ya la Ngga. 4:22-23). 9Maa ba tuna yia na pa-njanjingu-na i Ala, “La rehi pa-kawuku,#La rehi pa-kawuku; jàka ndia la rehi tungu nàhu la ndaungu na manàmu-nya. napa kumai beli, la rehi nu ninguka anana mini i Hara,” wàna.
10Dàngu yiana-mbu: Na-paanangu tau madua anakeda mini i Ripuka ba haàtu ama-aha nu i Ihàku na boku la mangilu-nda. 11Ba ndedi dadedi nu da anakeda mbàda tiki haha-mana-nyaka na papindi pangala-na paraïna i Ala. Nu ba napindi i Ala nda na-palata nianya la paràma tau, tàka na-palata ninya la paaungu-mana duna. Nadu ba ndedi nggàra papida la pawunda mahàmu jàka ndia ma-akatu nu da anakeda mini tau madua da anana i Ripuka, 12mbàda panii-nanyaka i Ripuka paraïna i Ala, “Napa na ma-maaya na-tangara la ma-maeri,” wànanya. 13Ninya na pa-tulihu la Huratu Matua ba tuna yia na paniina i Ala, “I Yakupu kumbuha-nya, tàka i Ehaü ku-karaü-nya eti,” na mawàna.
14Nggikina wàndaka nàhu nyuta na-pambulu-ndanya? Nda na mola-a i Ala? wàndaka nu. Ma-langatàka-ya namola-ma duna i Ala! 15Maa ba napanii-du i Ala lai Muha, “Napa ku-paloha-nya na pa-namungu-nggu la tau pa-palohangu pa-namungu ba wànggu dàngu napa kumila-nya eti na tau na pa-milangu eti ba wànggu,” wànanya. 16Jia ba tuna, na ratana i Ala nda na-panamatungu-a la pambuha tau, jàka ndia la paràma tau, tàka pa-namatu-nanya na hàmu eti-ma-ana duna i Ala la tau papindi-na. 17Nadu ba ninya na pa-tulihu la Huratu Matua, “Napanii-nya na hanganji Mehiru paraïna i Miri, ‘Hangia jua-ma-ana na pawotu wànggunggau la pa-hanganji, nu màta ka jiakau nyumu pa-pajiliku wànggunya na mbihanggu dàngu pa-kawulangu wànggunya na tamunggu la panggubulu awangu,’ wànanya,” ba wàna. 18Jia ba tuna, namila-nya eti na haàtu tau i Ala jàka nawuku-ya na matungu nu. Dàngu na-pawiti-nya pa-malihu na haàtui, jàka nawuku-mbuya na matungu nu.
Na hànggana dàngu nahàmu etina i Ala
19Nu ba tuna angu dedi, tuna yia-maka duna na paniimu lai nyungga, “Jàka tu-maduna nu, ka nggikina duna hi na-panjala-yaipa na tau paraïna i Ala? Ba nda ninguki haàtu tau ma-ngalangu pa-pabeta-nya na pambuha-na i Ala?” wàngguka, jiangu-maka nu ba wàmungga. 20Na nyuna angu dedi! Ka ni ba tau pàku-akau nyumu. Jia ba tuna angu dedi àmbu jia toru mbeni ànga dumu la pa-papa ngaru dànya i Ala! Pekuna-kaka nu na kanai wàla ai na papipi, ka na-paàra-nya na tau na mapipi-ya, “Ka nggikina hi tumungga yia bau pipika?” ka wànanya. 21Ka ni hi ngera-mana duna ba nawàngu etina paràma-ya na tana wurungu nu na tau na ma-pandoi-ya na kanai wàla ai wàngguka? Welingu la hau kabànda tana wurungu ngera-mana duna pa-pandoi dua ngia hada kanai wàla ai; mahàmu-ya na hangia dàngu maràka hàmuya na hangiai.
22Tuna numbudu jàka nggàraya na pawunda-na i Ala. Na-patikingu la pa-hanubuku-nya na hànggana dàngu la pa-pajiliku-nya na mbihana. Nu ba tuna na-lerangu eti-manai la tau da pa-hukungu làti rukuna ba da pa-karaü-ya na etina. 23Na-patikingu-mbu i Ala pa-paita-ndanya na pa-ohangu na mabundu làndangu, na pa-paliri-nanda nyuta tau pambuha-na. Mbàda hawanjiru-mana-ndaka la pangala-nya nu na pa-ohangu. 24Jiata nyuta-maka pambàda paauna, nda mbulungu welingu la banjaru Yahundi bia, tàka welingu la ba - banjaru hawiangu-mbu. 25Nadu la mbukuna i Wunangu Hohia napanii i Ala,
“Da tau la nda banjaru-nggu napa,
‘banjaru-ngguha,’ wànggunja.
Na banjaru panda mbuhanggu napa,
‘pambuha-ngguha,’ wànggunja.
26Dàngu la hau pangia na ngia pa-paningu-ha da tau, ‘Nda banjaru-anggunggai, ba wànggu,
da tau lai nu anana i Ala maluri-ha, wànanja tau,’ ” wàna.
27Napanii pa-jorutungu i Wunangu Yahaya, “Jiapa-kai ka hama wara tehiku-ya danguna na banjaru Ihirailu, tàka hakudu-ana na pa-pamànangu; 28maa ba rengga rata-mananya hukungu-na napa na ihi pinu tanaka paraïna i Miri,” wàna. 29Tuna yiambu na paniina i Yahaya, “Ngera hama tuna jàka nda nabii-manda làti ana umbuku paraïna i Ala Hupu Mambiha, nda ta-màtangu-apa làti nyuta mbuu ndàbanda la pahama-nya la Hondumu dàngu la Nggomora,” wàna.
Na pakeingu-na na banjaru-na i Ala dàngu na Lii Mànangu welingu lai Ala
30Jia ba tuna, tuna yia na mbulungu-na: Da-banjaru hawiangu da nda banjaru Yahundi, nda da-pamukarungu-a ka nahàmu beli na pa-puingu-da dàngu i Ala. Tàka rukuna ba dapawai, na pahàmu beliya paraïna i Ala na papuingu-da nyuda dàngu Nyuna. 31Tàka da tau Yahundi duda, da-ringgitu mànuma la panunju-ya na uku, ka nahàmu beli na papuingu-da dàngu i Ala. Tàka nda datàka-anya na hàmu belina na papuingu-da dàngu i Ala. 32Ka nggikina hi ndia? Maa ba nda dawàngu pawai duda lai Ala ba dawunda-ya nuna, tàka wàngu-danya àtalu wiki-ma-ada. Ka njoru-danyaka ba da-tunjuru la “Watu Tunjuru”. 33Rukuna nuna na Watu, tuna yia na pa-tulihu la Huratu Matua,
“Eti wamanya yiana: Mbàda bànjalu-ngguka hau watu la Hiungu
na ma-pawiti-nya napa pa-tunjuru na tau;
nu na hau watu bokulu na ma-pawiti-nya napa panjoru na tau.
Na nyuna na tau na mapawai lai Nyuna nda jia hala-ana na etina,” wàna.
Currently Selected:
ROMA 9: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
