ROMA 8
8
Na luri pa-namatungu la Ngahuna i Ala
1Nàhu nda ningu-apa hukungu ndumada nyuda da maluri pa-mbulungu dàngu i Karitu Yehu. 2Nadu ba mbàda pahàla-na-nggaka#mbàda pahàla-nanggaka;da lawiti ndai da manda pirada: mbàda pahàla-nanggaika; ningumai: mbàda pahàla-nandaka. welingu la uku na ma-pawiti-nya na njala dàngu na pameti wàngu, paraïna na Ngahuna i Ala na ma-pambulu-nda dàngu i Karitu Yehu. 3Jàka nggàraya na panda wu-ndana na uku anggama, ba tau ma-maluputu-ta, mbàda wunda-nanyaka duna paraïna i Ala. Mbàda pakàku-nanyaka paraïna i Ala na ka-wahana njala la huri tolu ba nawàngu papa-lewaya na Ana wikina, na mamai wàngu hada ma-pahama la hada tau njala, ka podahu njala. 4Hi nawunda-ya nuna i Ala matàwa na pambuha-na na pa-paloha-na daa la uku anggama Yahundi ka peku wunda-ndanya daa la wikinda nyuta maluri pa-namatungu la Ngahuna i Ala dàngu ba nda pa-namatu niaya na huri tolu. 5Da tau da maluri pa-namatungu la huri tolu, pangàda pangala-madanya na pa-rinjuna na huri tolu. Tàka da tau da maluri pa-namatungu la Ngahuna i Ala, pangàda pangala-madanya na parinju-na na Ngahuna i Ala. 6Jàka natauku-ya huri tolu na pangà-dangumu, metiya na hupu njàpuna. Na nyuna jàka natauku-ya Ngahuna i Ala, luriya dàngu papeku-ya hanggangu lai Ala. 7Na tau na patauku huri tolu na pangàdangu-na, na-pamuhungu dàngu i Ala; rukuna ba nda nata-ngara la Ukuna i Ala; dàngu nda nanga-languma duna pa-tangara la Ukuna i Ala. 8Da tau da maluri namatu-ya na huri tolu, nda jia li-adanya na etina i Ala.
9Tàka nyimi dimi ndai luri namatu-aya na huri tolu. Jiaya na hurina na Ngahuna i Ala na pa-namatu-mi – jàka langatàka-du ba na-manyori ningu na Ngahuna i Ala daa la wikimi. Na tau na manda mangunya na Ngahuna i Karitu, na tau nuna nda manguna i Karitu-aya. 10Na nyuna jàka ninya i Karitu daa la wikimi, jiapa ka nameti-kai na ihi daami ruku njala na nyuna ba tuna na Ngahuna i Ala nawua-nggai luri,#na Ngahuna i Ala nawua-nggai luri;jàka ndia: na ngahumi nyimi naluri. maa ba mbàda hàmu dunaka na papuingu-mi dàngu i Ala. 11Jàka naluri daa la wikimi na Ngahuna i Ala na ma-paluri-ya i Karitu welingu la meti, Nyuna nu na ma-paluri-ya i Karitu welingu la meti, napa na-paluri-mbuha da ihi daami da ma-ngalangu pameti. Nuna nu nawunda wànya Ngahuna na maluri daa lai nyimi.
12Tuna nuduka dimi angu dedi, hi ningu pakundu dukunda; tàka nda jia-aya na pambuha tolu na pakundu dukunda; nda nggàra taila wàngua la paluri nunjuya na pambuha-na na huri tolu. 13Nadu jàkai luri nunjuya na huri tolu, napa imeti; tàka jàka naingu-mana bai pameti wànya àtalu-na na Ngahuna i Ala da pawunda-mi da manjala, napa iluri. 14Da tau pa-kapipi-na na Ngahuna i Ala, ana Ala-maha duda. 15Nadu na Ngahuna i Ala na pa-wuangu-kai nda na-panjadi-akai ata hi kiri lurimi la mangàdatu. Na nyuna na Ngahuna i Ala na-panjadi-kai ana Ala. Dàngu wàngu àtalu-na na Ngahuna i Ala, “Ama, ou na Amanggu!” hi kiri wanda ba tawara. 16Na Ngahuna i Ala jiaya na ma-angunya na ngahunda nyuta la papekaya ba ana Alata nyuta. 17Nu ba tuna, jàka na-ana-ndaka, ana ma-ngalangu kangeha-dutaka welingu la pa-bànjalu-na, maka-takuha napa da kanyuru pa-payema-na i Ala ndumada da anana. Napa angu nga-langunda dàngu i Karitu jàka nggàraha da pambàda payema-nanya paraïna i Ala; nadu jàka angu ngera-ndanya i Karitu la mayila-na, angu ngera-mbundanya napa la manga-ranguna.
Na mangarangu ma-palupangu
18Pa-namatu-nya ba kuwàngu pakaka-aya, mbuu ndàbada da mayila da padeni-nda nàhu, nda ana pa-topangu-ana dàngu na ma-ngarangu na pa-bowangu-ta ngeru. 19Nggu-buluna na-hanggubu awangu rinjungu nda ukuha ba danedi-nya na rehi pa-itangu-naha da anana paraïna i Ala. 20Nadu ba pamà-tangu-yaka ka namobu na hanggubu awangu nda ruku pambuha wiki-ana duna, taka rukuna ba namàta-nya patuna nu paraïna i Ala. Jiapa-kai ba tuna ningu-mapa pamo-nungu na matuna yia: 21ba pa-pahàla-ya napa la hau rehi na hanggubu awangu welingu la kawaha ma-pamija-ya hi pa-marandeka dàngu pa-bunjuku-ha karia-da da ana Ala.
22Pi-mandanya ba kaingu-da padua-ka lundu nàhu mbutana na hanggubu awangu paraï pa-mayila hama tuna na mayila-na na haàtu ina la rehi habolangu-na anana. 23Dàngu nda didi meha-aya mbutana na hanggubu awangu na ma-kaingu; nyuta wikimbu ta-kaingu daa la eti dalunda. Mbàda ngala-ndanyaka na Ngahuna i Ala ba jiaya na ma-wungangu na pawuana i Ala, jiapa-kai ba tuna, nedi-manda-nyapa duta na-pahàla ndàba-nanya na wikinda nggubulu-na, hi na-ananda.#La lawiti ndai da manda pirada nda ningua kareuku tungu yia: hi na-ananda. 24Maa ba jiaya namonu-ndanya nunadu hi kiri pamara-ta. Na nyuna jàka taita-yaka nuna na pamonu-nda, nuna nu nda hili monungu-ayapa. Nadu ka nggamu-yaipa dimi na ma-padaingu monu bia-nyapa na pambàda itana? 25Na nyuna jàka nggàraya na pamonu-nda na pandedi itanda, pa-torungu-ndanyaka ba tanedi-nya.
26Tuna numbu na Ngahuna i Ala ba na-mai pandula-ta jàka ta-maluputu. Maa ba nda tapi-dunya jàka nggiki wànda bàdi ba ta-hamayangu; na Ngahu wikima duna na ma-hurungu la hanggana i Ala pakarai ndumanda nyuta, ba nawàngu pa-kalijiru kare-nganya hi lupa nda pekuna la patiki-ya. 27Tàka i Ala na mapinya na wini eti tau, na-jàngapu-maya duna na pawuku-na i Ngahu; maa ba karai-nanya lai Ala nduma ba-njaruna i Ala dàngu na-patangangu-ma la pambuha-na i Ala.
28Tapi-manya ba i Ala na ma-patunggu-nya mbuu ndàbana, hi da-ngalangu wàngu mahàmu da tau da mambuha-nya Nyuna#i Ala na ma-patunggu-nya mbuu ndàbana, hi da-ngalangu wàngu mahàmu da tau da mambuha-nya Nyuna;da lawiti ndai da manda pirada: Mbuu ndàba-naka na-patumbu mahàmu ndumada nyuda da mambuha-nya i Ala. dàngu da pa-paauna nunjuya na pawuku memana. 29Nyuda nu da pambàda pindina i Ala, mbàda patunggu haha-mana-njaka la mangilu ka dahama hadanya na Anana, nu i Yehu Karitu. Nu ba tuna, ma-maaya-yaka i Ana la angu dedi da madangu. 30Tuna nuduka i Ala ba napaau-nja nyuda da pambàda patunggu hahana la mangilu; tàka nyuda nu da papaau-na, na-pahia-nja ka dapahà-mungu beli dàngu Nyuna. Tàka nyuda nu da pa-pahia-na ka da-pahàmungu beli dàngu i Ala, ninguma kangeha-da la lurina i Ala wiki.
Na pa-namungu-na i Ala rukuna i Yehu Karitu
31Nggikina wànda-njaka nàhu nuda mbuu ndàbada? Jàka na-angunda i Ala, jia nggamu-yakaka na ma-ndubaku-ta? 32Nda nahindi-mbuya na Ana wikina, tàka napuli-manya lumunda nyuta mbuu ndàbanda; nggikina-kaka hi nda nawua-ndaha hawiangu mbuu ndàbada? 33Nggamu ma-ngalangu pakàla-ta nyuta banjaru papindi-na i Ala, jàka i Ala wikima na ma-jakaru-nya ba nda tanjala? 34Ningu nu tau ma-panjala-ta? Napa i Karitu Yehuma na mapulu angunda! Jiaya Nyuna-maka na mambàda meti, ri - rihi jiaya Nyuna-maka na pambàda paluri welingu la meti, hi na-ngiangu lai Ala la pangia pa-tangara. 35Ningu nu ma-ngalangu pa-pabeta-nya i Karitu la pambuha-nda nyuta? Na-ngalangu nu na handuka pa-pabeta-nya, jàka ndia na ma-kalutu, jàka ndia na ma-pakehangu, jàka ndia na rimbangu, jàka ndia na mila, jàka ndia na hanggàmaru, jàka ndia na meti? 36Ninya na pa-tulihu la Huratu Matua na matuna yia:
“Lundu kanjupu-ya na lodu ba ni-nggama la hanggàmaru ma-orangu la meti lumumu Nyumu.
Pa-paluangu lima-kama hama tuna mbimbi parupu,” ba wàna.
37Ndia-a! La mbuu ndàbada nuda, talu ailulu-mandanya nyuta rukuna Nyuna na mambuha-nda! 38Maa ba kuwai langatàka-maya duku, la nggubulu pinu tana: ka metiya, ka luriya, ka papalewa-ya, ka maningu kawahangu-ya, ka ma-pangàdungu la rehi nàhuya, hamanai ka ma-pangàdungu la rehi na manàmu-nyakai, jàka ndia da ma-kapingatu hawiangu-kai; 39ka maninja la awangu-hakai, hamanai ka maninja la unu tana-hakai, jàka ndia ka ngga - nggàra biaya hawiangu, mbuu ndàbada nuda nda da-ngalangu-a pa-pabeta-nya i Ala la pambuha-nda nyuta, hama tuna na pambàda paloha-nanda lai Karitu Yehu, na Mirinda.
Currently Selected:
ROMA 8: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
