PANGERANGU 6
6
Na lii panau papekangu hawiangu
1Ha ananggu, talànga wanguna hiu pa-njanjingu bia la angumu la patanggu mbayaru-ha da wutangu-na. 2Raï hi mbàda kàna biamu la hiru kareuku wikimu dàngu hi na-pahandànga-kau paraï panjanji wikimu. 3Jàka deningu-na nu, ha ananggu, ninggauka nu la limana nuna na tau. Tàka yiana-ya na ànda luhumu: urengga palaku tomaya na tau nuna, kau kamahi langatàka-manya ka nabihu la pa-pahàla-kau. 4Àmbu lua kàdi pa-katuda, dàngu àmbu hangahu-mbu. 5Pamara-wa wikimu welingu la kambia nuna beri hamana na ma-hawurungu jàka ndia na bai hawurungu ma-pahàla wikina welingu la ma-patamangu.
6Na tau mayau eti lupangu-ma na panauya na huri luri kahoduku ka na-papekangu welingu lai nyuna. 7Da kahoduku nda ningua liku uruda, nda ningua ma-kuaha-ha jàka ndiakai ma-hamata-ha, 8tàka la ngala rehi muti da-kangutungu bàlada nduma wula rimbangu. 9Lundu pirangu-mapa nu na tau mayau eti ba na-mahuru pangalangu? Lundu pirangu-mapa hi na-mbuhangu pahada-ngu? 10Na-mandapu hangoturu la pa-hangahu, hi napanii, “Ai, màta kuluu mahuru hawutu, ba tàtiku-manggu-nyapa,” wàna. 11Tàka ba talànga mahuru-na, jengi-nanyaka majapu-nya, dàngu na pamila wàngu na matàka hama tuna tau rambangu mambinu madàka-na.
12Na tau akatu, na ma-katadaku nakakòlulu la nggi - nggini. 13Na-pakamàdikungu mata ba na-paitangu tanda la pa-panyonga tau. 14Na kanandingu nda hàmuna nambinu wàngu pawuku akatu dàngu na-patumbu-ya na pa-palumungu wàngu la nggi - nggini. 15Mbuu ndàbada nuda na-pawiti-nya na hanggàmaru la wikina na matàka harabàndangu, hi na-làjaru ailulu.
16-19Ninja pihu batada da pa-karaü-na eti i MIRI dàngu da panda màtana:
Na ngànjangu,
na ngaru ma-kambàliku,
na lima pameti tau nda ningu njalangu,
na kotu mawuku-ya na lii ma-akatu,
da wihi ma-nyanyaru la ma-akatu,
hakahii ma-nutakungu pa-kambàliku,
dàngu tau ma-patumbu-ya na pa-muhungu dàngga angu.
Lii kamahingu rukuna na njuraku
20Ha ananggu, palaku-yawa na pa-paràha-nanggau na amamu, dàngu àmbu mbula-dunya na pa-panau-nanggau na inamu. 21Ngàda mànuha da kareuku-da dàngu pakàpa-maha daa la etimu. 22Da panau papekangu-da dalonda limakau la ànda ngara ngia, damangga rimanggau la rudungu, dàngu da-paita-nggau ngerangu la rehi pawàla-mu. 23Da ngerangu welingu la ina amamu beri hama palita ma-hambila-ha; na kanyàngi-danggau paita-danggau paluri hàmu wàngu. 24Tuna nuduka ba da-pamarau-kau welingu la kawini ànga, welingu la pamandangu ma-paupahungu-da da papaha tau hawiangu. 25Àmbu na-pakabàliku-kau paraï na manandangu-da, àmbu na-kameni-kau paraï wua matada da ma-panggeli. 26Na kawini pahunda napeku la pahewa wànya uhu hau kawinga, tàka na njuraku dànya na papaha tau hawiangu lupangu-ma pa-palimbangu wàngu luriya.#Na kawini pahunda ... luriya; jàka ndia: na pahimbu-na na kawini pahunda jiaya na hau kawinga pangangu-ma-a, tàka na pakeha-na na kawini ningu leingu jiaya na luri ma-pawilingu.
27Napeku nu na tau la pababa epi dàngu nda mutungu-na na kalembi-na? 28Napeku nu na tau la paliti wàla epi hi nda na-mutungu biai na wihina? 29Nuna nu hama harui-mana la pa-katuda dànya na papaha tau hawiangu. Nggamu ma-palaku-ya nuna nda jia pahàla-ana welingu la hukungu. 30Jàka na-bohungu pangangu na tau jiapakai ka ruku rimbangu-na, jianguma ba payudi-ya. 31Tàka jàka yàpa-yaka lupangu-mbui na-mbayaru beliha ba na-papihu hama danja, hi lupa nawua hàlaha da maninja-ka la limana. 32Tàka ka nggiki-naika duna na ngerana na tau na ma-njuraku? Nyuna-duna paruha-nanya wikina! Kanjupu ndubaya! 33Jiangu-ma ba pa-mayila-ya dàngu ba paaka-nya. Na-iraku wànyaka na tamuna lundu nu - nu. 34Nadu na pawunda-na nu natunya pawuhu wàna na mini leina nuna na kawini, hi lupa kanjupu mbumbaru-ya na ma-karaü. Tàka jàka na-kulingu patungu kiringu nda jia paaï-anapa. 35Nda peku-ana nyuna la pa-pamanda wànya ndui; jiapa ka pirada da pawua juanya nda na-ngalangu-mbu pa-pawadaru-ya na karaü etina.
Currently Selected:
PANGERANGU 6: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)