PANGERANGU 4
4
Na pautu wàngu na pa-ngalangu welingu la manggàna
1Oi anakeda, patingi-nyawa na panaungu-na na amamu! Eti wànyawa nuna, napa kau kaminaku manggàna. 2Na papeka-nggunggau yiana mahàmu-ya, jia ba tuna àmbu jia pa-halela-munyaka. 3Ba anakeda-kapa, ana kamehanguda da maana-ngga, 4na-papeka-ngga na amanggu: “Namuha da lii panau-papekangu-nggu, àmbu jia mbula-dumunja. Palaku-hawa da pa-paita-nggunggau, ka peku luri hàmumu. 5Màtawa kau kaminaku manggàna dàngu kau halimu kotumu! Namu mànu-maha da lii panau papekangu-nggu, àmbu dunjaku-dunja,” wànangga. 6Pawili-nyawa na manggàna, napa namangga-nggau; mbuha-nyawa, napa narima-nggau hi peku pa-daingu mambiru-mu. 7Na ma-papingi na pa-palaku-mu jiaya kau pamukarungu pa-manggàna. Nggàra biaya na payaulumu, na ma-paihikungu jiaya kau pamukarunguma la pangala-nya na kanandingu ma-jàngapu. 8Tidu-nyawa na manggàna, napa na-pajangga-kau. Rohu-yawa nyuna, napa na-patàka-nggau tembi maraku. 9Napa nawua-nggau wàla ai paki pajilungu ka tubuku-munya.
10Patingi-ngga, ha ananggu! Katàmbalu pahàmu-nja da lii panau papekangu-nggu, napa namalai na lurimu. 11Mbàda hàla-ngguka pa-papeka-nggaunya na manggàna dàngu mbàda paita-nggunggauka luri tànji. 12Jàka tumu nu bau luri, nda ningua ma-pabeta-nggau ba talànga lakumu, dàngu ndau tunjuru-mbu ba talànga palaimu. 13Namu mànu-maya nggàraya na pambàda papekangu-kau. Mangga hàmu-nyawa nuna, nadu bau wànya nuna na papekangu napa mu-ondungu la lurimu. 14Àmbu kikunya na huri luri tau akatu, dàngu àmbu tundu-dunya na pawunda-da. 15Àmbu katana niduha nyuda. Wiliru-manja dàngu laku pangalangu! 16Na tau akatu nda peku katuda-ana ba ndedipa nawunda-ya na manda hàmu. Nda jia tàtiku-ada jàka ndedi, dapahanggàmaru-ya na tau hawiangu. 17Na luri akatu dàngu mbana eti hama tuna pangangu dàngu pa-ngunungu-ha lai nyuda.
18-19Na ànda ngia palina na tau akatu hama tuna na kapàta rudungu. Da-tunjuru hi danjoru dàngu nda pidanya. Tàka hauya duna, na ànda ngia palina na tau hàmu hama tuna hunga loduya; na-bonjangu na mandaina bonjangu mananya na hambila-na hi lupa kanjupu handaraku-ya.
20Eti wamanya na kareuku-nggu, ha ananggu! Katàmbalu patingi-manya na panau papekangu-nggu. 21Àmbu wàru-dunya, na nyuna pakàpa mànu-maya la etimu. 22Na tau ma-manyàmu-nya jiangu-ma naluri dàngu na-hayandalu. 23Mangga pahàmu-nya na etimu nadu ba jia duya na ma-kawuku-ya na ànda lurimu. 24Àmbu jia tiki dumu kareuku nda pa-deningu. Wiliru-nya na kareuku kambàliku dàngu da kareuku da mawuku-ya la papanjàrangu tau. 25Màtawa na matamu ka napahandaraku-ya na tànji etimu; àmbu nggàradu ma-pamuku la etimu. 26Kanandi hàmu pàkunya ba ndedi upalaku-ya, ka peku ngalangu-mu wua paràma-mu. 27Wiliru-manya na ma-akatu, dàngu luriwa la luri tànji. Àmbu jia hiliru-dumu welingu la ànda ma-padeningu.
Currently Selected:
PANGERANGU 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)