PANGERANGU 3
3
Na lii panaungu la bidi tau
1Àmbu mbula-dunya nggàraya na pambàda papeka-nggunggau, ha ananggu. Unamu mànu-maya na hupu liinggu, 2ka peku malaina na lurimu dàngu ka peku luri hàmumu. 3Màtawa kau pa-daingu pawaiya dàngu pa-tuturu lai Ala hamanai la angumu patau. Namu-yawa nuna dàngu pakàpa-yawa la etimu, 4ka peku hàmu-nanggau eti i Ala dàngu na angumu patau.
5Mbuha paweli eti-nyawa i MIRI, àmbu pangia pinu duya na pingu wikimu. 6Patanda mànunya i MIRI la pawunda-muka mbuu ndàbana, ka peku paita-nanggau huri luri na mahàmu. 7Àmbu kakadu wikimu la parihi papingu welingu la tuda na maninya lai nyumu; karadaku-nyawa i MIRI dàngu marau-nyawa na ma-akatu. 8Na pawunda-mu nuna beri hama tuna tàda ai na ma-palànga-ya na ihimu dàngu na ma-pahayandalu-ya na eti dalumu. 9Tembi-yawa i MIRI bau wàngu pawotu-ha da hupu mahàmu welingu la ihi paraï-muka mbuu hàlada, 10napa da uma erimu dambinu wàngu uhu nggàndumu; dàngu da wai angguru-mu da-làndangu hi nda datoma da kanaingu ngia pa-paihi-nja.
11Jàka era ràmbahu-nanggau i MIRI, ha ananggu, kataku-yawa nuna ba panamu haha-nanggau, dàngu àmbu nahuda wànya na etimu nu ba na-papeka-nggau. 12I MIRI duna na-ràmbahu-ya na tau pambuha-na, hama tuna na haàtu ama na ma-ràmbahu-ya na ana panamu-na. 13Oha-anaka duna na tau ma-manggàna dàngu na ma-jàngapu kanandingu-na. 14Na utuna narihi bokulu-pa welingu la àmahu bara; narihi pawilingu-pa welingu la àmahu rara. 15Na manggàna narihi pawilingu-pa welingu la watu matika pa-pawilingu; mbuu ndàba-naka na parinju etimu nda jia hama-ananya. 16Na manggàna nawua-nggau malai luri, pawulu wàngu dàngu tembi maraku. 17Na manggàna na-pahàmu-ya dàngu na-papeku-ya na lurimu. 18Na tau na-mapaundungu la manggàna napa naera-nya na luri ma-palangatàkangu dàngu na-pa-ohangu.
19I MIRI na-padika-nya na tana wàngu manggàna-na;
na-wàlahu-ya na awangu la pangia-na wàngu eti diha kanandingu-na.
20Wàngu pinguna natuha da matawai daa la tana wàka hi na-pawiti-nya pa-lulungu na waina
hamanai na karumangu la awangu na-paliri-nya wai na pinu tana.
21Jia ba tuna, pa-undungu-wa la manggàna dàngu la pa-dihangu manyanga hàmu, ha ananggu! Àmbu jia pahàla-dumunya, 22napa na lurimu na àhalu – na manandangu dàngu na-pahàmu eti. 23Napa ulaku mambiru dàngu ndau tunjuru-a. 24Ndau mangàdatu-a jàkau laku pa-katuda, dàngu ukatuda minjalu lundu kanjupu-ya na rudungu. 25Àmbu jia mangàdatu-dumunya na hanggàmaru na matàka harabànda-nggau beri hama tuna làpuru, hi na-làndahu-nja da tau akatu. 26I MIRI napa namangga-nggau. Nda napuli-anggau pa-hanjubulu la lambongu kahili.
27Jàkau màka pawunda-ya na mahàmu la tau ma-kalana-nya na hàmumu, àmbu hinggilu-dunya la pawunda-ya nuna. 28Àmbu paràha-dunya na angumu pa-patiangu lupa tàkanya na lodu haromu, jàka peku ndula bia-munyai la lodu nàhu. 29Àmbu ngga - nggàradu pa-pakaka-mu la pa-parunggi wànya na angumu na ma-ndàdiku lihinggau dàngu na mawaikau nyumu. 30Àmbu palumu dànya la manda pa-latangu na haàtu tau na manda ana wundana ma-akatu lai nyumu. 31Oha-naika nyuna àmbu jia wàmu-nyaka na tau na ma-pajanggilu dàngu àmbu tundu-dunya. 32Nadu na-karaü-nya eti i MIRI na tau mawunda ma-akatu, tàka na-panggolu dànya na tau ma-patànjingu la lurina. 33I MIRI naràtu-nya na uma tau akatu, tàka na-pa-maringu-ya na uma tau ma-karadaku-nya. 34I MIRI na-karaü-nya eti na tau jangga eti, tàka hi na-pamaringu-ya na tau karàda eti. 35Na tau manggàna na-bonjangu pawuwa na tamuna, tàka na tau nduba duna pa-paakangu-ya.
Currently Selected:
PANGERANGU 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)