PANGERANGU 2
2
Nalingu-na jàka manggàna
1Kataku-yawa na papekangu-nggu, ha ananggu, dàngu unamu mànu-maha da lii panaungu-nggu lai nyumu. 2Eti wànyawa jàka nggàraya na pa-manggàna wàngu dàngu pa-mukarungu-wa la pa-manyàmu-nya. 3Dou na ananggu duku, pa-mukarungu-ma kau mangunya na dàkatu kanandingu dàngu karai-yawa na kanandingu ma-jàngapu. 4Himbu-yawa nuna hama tuna himbumu àmahu rara, dàngu yaulu-yawa nuna hama tuna ba manyàrangu malanja ma-kawiningu. 5Jàka tumuka nu ka pidumu-nyaka nggàraya na ihina na mangàdatu-nya i MIRI dàngu ngala dumu-nyaka papinya na rukuna i Ala. 6I MIRI duna ma-wuangu manggàna; welingu lai Nyunama hi na-ngalangu papingu wàngu dàngu kanandingu ma-jàngapu na tau. 7Na tau ma-manundu ma-patutungu dàngu na manda ningu njalangu, nandula-ya dàngu naopa-nya. 8I MIRI namangga-nya na tau ma-kawana-nya na tànji, dàngu narima-nya na tau na mambuha-nya Nyuna.
9Jàkau tundungga nyungga, ha ananggu, pidumu-nyaka jàka nggàraya na tànji, na pa-deningu dàngu na hàmu. Upimbunya nggiki hamana bàdi bau luri. 10Lupangu-ma bau manggàna dàngu na pingumu nawua-nggau pahàmu eti wàngu. 11Na jàngapu kanandingu dàngu na halimu kotumu namangga rimanggau, 12hamanai na-pabeta-nggau la pakiku-nya na huri luri manda hàmu, dàngu na-pamarau-kau welingu la tau da ma-akatu ngaruda. 13Nda da-mbuhangu-a pakiku-nya na huri luri hàmu, da-namatu niya na ànda ma-kapàtangu dàngu na mambinu njala. 14Nali hàmuya na etida ruku pawunda-da na ma-akatu. 15Da-palapingu dàngu na huri lurida nda na-patuba.
16Nyumu dumu, ha ananggu, upekuma pa-jukaru-nya na kawini nda hàmu ma-pamanda-nggau, ma-mbuhangu pa-paütu-kau wàngu minangu kareuku-na. 17Na kawini nuna nda na-tuturu-a la mini lei wikina dàngu nambula-nyaka na njanjina lai MIRI. 18Jàkau lua la umana hanggangu-munya la meti. Na lakumu lai nu hama biana bau laku la parai mameti. 19Na tau na malaku tomaya nda nahili peku-apa pa-kabeli la ànda ma-hanggangu la luri. 20Jia ba tuna, ha ananggu, kiku-nyawa na huri tau hàmu, dàngu luri tundu-nyawa na pambuha-na i Ala. 21Nadu, na tau maluri tundunya na pambuha-na i Ala, nu da tau matànji etida, jiaha da ma-ndàdiku napa la tana na panjanji-na i MIRI. 22Tàka na tau akatu dàngu na manjala na-paluhu-ha paraïna i Ala welingu la tana nuna, beri hama tuna na rumba pabuta welingu la tana.
Currently Selected:
PANGERANGU 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)