PANGERANGU 26
26
1Hama tuna na urangu la rehi wandu, dàngu na ura kamba la mbana lodu,
tuna numbu ba nda ràkana na wotungu la tau nduba.
2Hama ma-hawurungu ba da-hawurungu la kuru awangu,
tuna numbu na harangu ba nda nanggàna-ya na tau manda njala.
3Na kalandai rapa-maya bàdi, na njara ràmbahu-maya bàdi,
tuna numbu na tau nduba ba palu-maya bàdi.
4Na tau na mahema-ya na paàrangu tau manduba,
hama nduba-nanya na tau nuna.
5Na paàrangu manduba lupangu ba hema wànya hema ndubambu,
ka peku pàda-nanya ma-paàrangu ba nda napingu-a hama tuna na pakaka-na la etina.
6Palewa-ya na haàtu tau nduba la pangàndi lii langu,
hamana ba pata wihi wiki dàngu ba himbu hanggàmaru.
7Hama tuna tau kaliparu mapaki-ha da wihina,
tuna numbu na tau nduba na ma-wuangu lii panaungu.
8Wotunya na tau nda pingu,
hamana ba hondu pamàndu-nya watu na kapitu.
9Hama tuna tau maüku ma-mbuhangu pa-paluhu-ya na kàna la limana,
tuna numbu na tau nduba na ma-wuangu lii panaungu.
10Nggamu ma-paràma-nya na tau nduba jàka ndia àtalu tau bia
parunggi-nanya tau dangu.
11Hama tuna na ahu na mabeli la mutana,
tuna numbu na tau nduba na mabeli-nya na ndubana.
12Na tau na manduba halawàla narihi hàmupa
welingu la tau na makaka wikina ba pingu-nanya.
13Na tau mayau na-mbuhangu pa-ndàdiku la uma;
napanii, “Ningu hinga la hambeli, nahoba-duka nàhu la ngarangia,” wàna.
14Hama tuna pindu na mawingu la punduku-na,
tuna numbu na tau mayau ba na-pambe - mbelingu la ngia pa-katuda-na.
15Ningu tau ma-kanjupu mayauya;
la pahoba panga-ana nda nabihu-mbu.
16Na tau mayau nakaka wikina ba narihi kaminaku-pa
welingu la tau mapihu da mahema pa-deningu.
17Na tau na ma-patama korungu daa la pahànggangu nda ngerana
beri hamana na tau na mayàpa ahu rumba la kahilu-na.
18-19Na tau na ma-panyonga anguna,
“Tangeji-anggunya,” ba wàna, na-pahama la tau katoba na ma-pajulu wàngu madàka pa-hanggàmaru wàngu.
20Jàka nanjàpu-ka na ai, mbàda-nanyaka na epi;
jàka nda ninyapa na tau mbàdi ngaru, pànjangu-mbunanya na pa-lumungu.
21Hama tuna arungu dàngu ai ba da-paroka mànuya na epi;
tuna numbu na tau ma-mbuhangu pa-palumungu ba na-padukulu-ya na pahànggangu.
22Na pawau angu nahàmu ba pàdanya;
narengga kawàluku-nya tau.
23Hama tuna wuru tana pa-apihu wàngu àmahu bara,
tuna numbu na tau na ma-minangu la ngaru, tàka hi na-akatu la etina.
24Na tau ma-paumbingu na-minangu kareuku-na
tàka na etina ma-kambàliku ju - juaya.
25Jiapa-kai ka na-kamàhaku, àmbu waiduya;
nadu ma-paumbingu ju - juaya la etina.
26Jiapa-kai ka na-kawini-nya na paumbingu-ma,
naita-maya duna na akatu-na paraï mbuu ndàbana.
27Nggamu maàki lambongu nduma tau hawiangu,
napa nyuna wiki ma-hanjubulu hu daa.
Nggamu ma-kilungu watu, ka na-pinjalu-ya na tau hawiangu,
nyuna wikima duna na pa-pinjalu paraïna na watu na pakilu-na.
28Na kambàliku-nya na tau hama biana ba karaünya eti.
Na ngaru minangu pa-hanggàmaru wànguya.
Currently Selected:
PANGERANGU 26: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)