PANGERANGU 24
24
– 19 –
1Oha-anai-ka nyuna àmbu jia wàmu-nyaka na tau akatu, dàngu àmbu rinjungu-du pa-paangu dànja nyuda. 2Nyuda ba kanandingu-danya la pambana eti dàngu la pabata-ya jàka nggàraya duna na ma-pahanggàmaru.
– 20 –
3Na kuru uma pa-pahada wànya manggàna dàngu kanandingu ma-jàngapu. 4Dàngu jàka ningu papingu wàngu, da kurungu damàtu wàngu malanja pa-wilingu ma-manandangu ihida.
– 21 –
5Na tau manggàna narihi pangaru-pa welingu la tau kapàru, na papingu wàngu narihi papingi-pa welingu la àtalu. 6Nadu ba ndedi pabera namemi hàmu-dupa bàdi na pambàda kaka hahangu, pa-bonjangu padangu da ma-panaungu, na-bonjangu-mbu pa-bokulu na patalu wàngu.
– 22 –
7Na manggàna lalu tanjiku-na la hangga tau nduba. Nda ana nggàrama patiki-na jàka talànga panii wànguda ma-papingi na tau.
– 23 –
8Na tau na makaka mànuya na ma-akatu, ma-pakubaru-ya wànanya tau. 9Nimbihu-da da kahili-na na tau nduba manjala-ha. Na tau makàli pa-akangu tau hawiangu, nda ningua mambuha-nya.
– 24 –
10Jàka mumbota monungu-mu daa la ma-kanggupuku, tau lamanga halawàla-kau.
– 25 –
11Àmbu kanodaru-du pa-pahàla-ha da tau da pambàda botangu hukungu meti; pamara-ha da tau da pa-dundilu la ngia pa-tiwalu-nja. 12Peku-manai bau panii, “Nda ngera-anggunya,” ba wàmu. Tàka i Ala hamata-mananggau. Napi-manya dàngu na-patanda-nya ngerana na-kanandingu-mu, na-palimba-nya na tau tudana na pawunda-na.
– 26 –
13Ha ananggu, mungangu-wa manggaluangu, ba mahàmu-duya. Hama tuna na manggaluangu welingu la hibu manggaluangu ba nalàngga ba nganya, 14tuna numbu na kaminaku ba nahàmu nduma hamangu-mu. Jàkau manggàna, na-habola na lodu lurimu na manàmu-nya.
– 27 –
15Àmbu hama dunya na tau akatu na ma-pahamangu la paramba-nya na tau patutungu dàngu pawàhi-ya na umana. 16Nadu, jiapa-kai ka naingu njoruna na tau patutungu, nahada beli mànungu-ma duna. Tàka hauhai duda, da tau akatu na-pa-làjaru-ha paraï harui mayila.
– 28 –
17Àmbu nambaha-du na etimu jàka na-hanggàmaru na muhumu, dàngu àmbu hawola-du jàka nanjoru. 18Maa ba jiangu-ma duna ba naita-ya paraïna i MIRI na pawunda-mu nuna dàngu hi natàpu-ya ba akatu-ya, hi nda nahuku-anyaipa na muhumu.
– 29 –
19Àmbu huda-dunya jàka ndia oha-naika nyuna àmbu wàmu-dunya na tau akatu. 20Na tau akatu duna nda nggàraa pamonu-na la rehi na manàmu-nya.
– 30 –
21Ha ananggu, mangàdatu-nyawa i MIRI, dàngu tembi-yawa na hanganji. Àmbu ita kiku-dunja da tau da mapapa-nja nyuda. 22Ba ndedi nggi tuna-a mandaina na tau tungu nu ba na-ngalangu pa-làjaru, nadu na harui pa-patàka-na i Ala jàka ndia na hanganji ba nda lii makudu-aya.
Da pahili papekangu wàngu
23Nakàli panii na tau kaminaku:
Na hakimu nda napeku-a la pambotu hapapa. 24Jàka nanjala na tau nda nanjala-a hi wàna bianyai, nuna na hakimu naràtu-nya dàngu napulu-nya paraï tau mbuu ndàbana. 25Tàka na hakimu na mahuku-nya na tau njala, napa pa-kanyuru-ya dàngu patembi-ya.
26Na hema na ma-tubangu jiaya na tanda pa-kandua weli etingu.
27Àmbu pakuru umangu-du, jàka ndedipa mu-paloku wokamu dàngu ndedi ningumbu paluri wàmu.
28Àmbu hakahii-dunya na angumu patau la manda palata hàmungu; àmbu kambàliku-mbu rukuna nyuna. 29Àmbu paniidu, “Ku-papapa-manya bàdi nggàraya na pambàda wundana lai nyungga!” àmbu wàmudu.
30Talànga handàka-na kulaku li la wokana dàngu woka angguru-na na haàtu tau mayau na manduba. 31Da paita-nggu lai nu jia-maaha da pingi rii paketu dàngu da witu. Da oka kilimbatu-na danjoru-mbuka. 32Ba ku-hamata-haka dàngu ku-pangàda-nja nuda, ka ngala-nggunyaka yiana na lii panaungu: 33La tàtiku dàngu la mbàpihu hakudu, la mandapu anggu-luku dàngu la ana hangahu hakudu, 34namai pa-panàhaku na manjaka dàngu na pamila wàngu beri hama tuna na tau rambangu ma-katangu madàka.
@LAI 1995 Indonesian Bible Society (Lembaga Alkitab Indonesia)