PANGERANGU 1
1
Na pa-wilingu-da da panau-papekangu-na i Halomu
1Yiada-haka da lii panau-papekangu-na i Halomu, anana i Ndautu, na maràmba Ihirailu.
2Na pawuku-na jiaya ka peku ndulaya na tau la papinya nggikina bàdi ka manggàna, dàngu la papinya na kalaratu huri luri, dàngu la pa-jàngapu-ha da lawiti ma-tanjiku. 3Da lii panau-papekangu yiada da-papeka-nja da tau nggiki hamana bàdi na tau ka naluri manggàna, patutungu, mola dàngu pa-deningu. 4Na tau na manda njara kabu ruku na-papeka-nya ka napingu, hamanai na bidi tau na-papeka-nya ka ningu papina dàngu ka na-matua kanandingu-na. 5Wànja yiada da lii panau-papekangu, na tau manggàna peku bonjangu-na na papina, dàngu na tau pambàda papekangu-mbu hi na-ngalangu lii kapipi. 6Jia ba tuna peku-daka pa-manginjiru-ha da ihi tanjiku-da da lii panaungu dàngu la pa-jàngapu-ha da patiki tau manggàna dàngu da ma-kalutu pa-patàka-da.
Na lii panaungu la bidi tau
7Ka peku ngalangu wàngu pingu ma-palangatàkangu, lupangu-ma bàdi na tau ba na-pamangilu-ya na tembi dàngu na karadaku lai MIRI. Na tau nduba na-pahalela-ya na papingu wàngu dàngu nda nabihu ka papeka-nya.
8Ukatana-maya jàka nggàraya na papeka-nanggau na amamu na inamu, ha ananggu, 9nadu na lii panaungu-da nabonja-ya na huri hàmumu beri hama tuna tera la katiku-munya dàngu kanataru la nggoru-munya na ma-pamananda-nggau.
10Jàka na-pamanda-nggau tau akatu, ha ananggu, àmbu tundu-dunya na pamandangu-da. 11Jàka era hi ningu bia na mawàna-nggau, “Màla, mai ka tahimbu tau, ka ta-nggukuru-nya. Ka ta-maràna wàngu, màla ka ta-nàhaku tau manda njala. 12Nàhu nahàmu na lurida dàngu da-hayandalu, tàka napa hama tau meti widiha. 13Tapiti-ha da malanja pa-wilingu-da, ka peku mbinuda da umanda malanja pa-rambangu. 14Mai kai kikungu! Da pangala-nda ba ta-manganga napa ta-paberi pahama-manja!” jàka wàdanggau.
15Àmbu laku karia-dunja da tau tungu nu, ha ananggu! Màtawa kau wiliru-nja. 16Nda jia ngudu-ada nyuda jàka ndedi dawunda-ya na ma-akatu. Darengga ninguma la pa-pameti tau. 17Jiapa-ki da ma-hawurungu duda nda datama kadu la remba pa-batangu la hangga matada, 18tàka da tau akatui duda batangu bia-danya hiru nduma wikida – hiru na ma-pahanggàmaru-ha nyudama. 19Deningu-mana, na tau na mahimbu luri wàngu pa-janggilu napa na-mbayaru wànya na luri wikina.
Na talia lii manggàna
20Patingingu-wa! I Manggàna napaa - aungu la a - ànda dàngu nawara la mambi - mbila! 21Nawara la pi - pindu bokulu dàngu la pangia - pangia madangu tauna:
22“Ha tau nduba! Lundu pirangu-mapa nu bai pa-daingu panduba? Pirangu-mapa ipànjangu la pa-halela-ya na pingu dàngu la pa-tebuku-ya na papekangu? 23Patingi-nggawa nyungga jàka kuhàngga nàrunggau, napa kuràba-nggaunya na ihi etinggu dàngu ku-papeka-nggaunya na papingu wàngu. 24Mbàda paau-nggunggaika, tàka tebuku-minyai na paaungu dàngu ndai bihua pa-kawelangu. 25Mbuu ndàbada da lii panaungu-nggu ndai wàrihu-aha dàngu nahàngga nàrungu-nggu mi-jukaru-nya. 26Jia ba tuna, jàkai hanggàmaru, kuriki-nggai. Jàkai mangàdatu, ku-paaka-nggai. 27Langatàka napa ku-paaka-nggai jàka dahala da etimi dàngu jàkai mayila ba nanggàna-kai tàparu na matàka hama tuna làpuru. 28La rehina nu napa mipaau-ngga, tàka nda kuhema-akai. Manyàra-dimi-nggaka la nggi - nggini, tàka ndai hunggu-aka. 29Ndedima imbuhanya na papingu wàngu, dàngu ndai bihu pa-karadaku-nya i MIRI. 30Nda ana mbuhangu-mami pa-kataku lii panau lii papekangu-nggu jàka ndiakai la pa-katana-ya na hàngga nàrungu-nggu. 31Jia ba tuna, lupangu-ma mi-itaya na injana da pawunda-mi dàngu da pa-pakaka-mi da maànga. 32Na tau manda lerangu papina lupangu nameti-ma ba nda na-ihili-ngga Nyungga, dàngu na tau na manduba lupa na-talàpu-ma ba nda na-wàrihu-ka nyungga. 33Tàka na tau na marongu-ka jiangu-ma namara. Na-mambiru na lurina dàngu nda nahili mangàdatu-apa,” wàna.
Currently Selected:
PANGERANGU 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)