PANGERANGU 19
19
1Narihi hàmupa na tau mila na ma-kunduhu lurina,
welingu la tau nduba na ma-mbuhangu pa-kambàliku.
2Nda nahàmu-a ba maràna paràma hi nda ningui papingu wàngu;
na tau na mari - ringana jiangu-ma napa na-hanjàliru.
3Ningu tau ma-parunggi wikina rukuna na ndubana,
hàlaka hi panjala ninanyai MIRI la ngerana nuna.
4Na tau wulu, na-bonjangu mànu padangu da anguna;
na tau mila duna nalaku wàrunya anguna.
5Na tau na ma-kambàliku la hangga ma-patandangu ngera,
nda jia hinggilu-ana welingu la hukungu.
6Nimbihu-na tau nahimbu wihuna ka naora-nya eti paraï tau mangia ngaba;
mbuu ndàbana na tau na-mbuhangu pa-kandua-nya na tau màjangu.
7Na tau mila nda na-ihili-anya paraï angu dedina,
rihi-ipa duna paraï anguna.
Jiapa ka nggiki himbuna wihuna,
nda na-ngalangu-a pa-paütu-ha nyuda.
8Nggamu mayaulu-ya na papingu wàngu, namu-nanya wikina;
dàngu nggamu manamu beliha da pambàda papekangu-ya, naluri pa-ohangu.
9Na tau na ma-kambàliku la hangga ma-patandangu ngera
jiangu-ma ba hukunya dàngu ba pa-tàlaru-ya.
10Nda ràka-ana ba na-mbokaru na lurina na tau nduba,
dàngu nda na-patuba-mbu na ata ba na-pareta-ya na mirina.
11Na tau manggàna na-ngalangu panàdi-ya na mbenina.
Nyuna pa-wotungu-ya ba nda na-ihili-dunya na njala tau lai nyuna.
12Na hànggana na maràmba beri hama kangaü hingaya;
na hàmuna na maràmba beri wai hamburungu mahini-ha da ngara matumbu.
13Na ana na manduba na-ngalangu pa-palàjaru-ya na amana.
Na papaha na ma-mbuhangu pa-kambunguku beri hamana na wai na manda pànjangu pa-kambàtiku.
14Uma dàngu banda malanja pekuna la pangala-nja welingu la ma-kaweda,
tàka na papaha ma-manggàna pawua juana i MIRI-ya duna.
15Na patai eti na-pawiti-nya na tau pa-katuda mangandu,
na tau mamayau napa na-rimbangu.
16Na tau ma-karadaku-nja da hupu liina i Ala napa namara,
na tau na manda tunja wilida napa nameti.
17Na ndula tau mila hama biana ba wua paruta-nya i MIRI;
napa i MIRI-ma duna na matunya himbalu-na.
18Àrapu-ya na anamu ba ningu-ipa pa-monungu;
jàka ndia, rinju-munya na làjaru-na.
19Màtawa na tau na marengga la pambeni
ka napàda wikinya na injana.
Jàkau ndulaya bonja-munya,
na mbeni-maana.
20Jàka mu-mbuhangu pa-ajaru dàngu parongu lii panaungu,
njadi-dumu-nyaka napa tau manggàna.
21Na tau nadangu na pa-pakakangu-na,
tàka jiaya na botangu-na i MIRI duna na ma-hàrangu.
22Na huri na pa-monungu welingu la tau jiaya na tuturu-na.
Narihi hàmupa ka mila welingu ba njadi ma-kambàliku.
23Tembi-yawa i MIRI, napa na-lànyapu na lurimu;
napa muluri patoma dàngu mu-pahàla welingu la hanggàmaru.
24Ningu tau ma-kanjupu mayauya;
nambotu-mbu na etina la pahoba pangangu.
25Jàka hukunya na tau ngànjangu, na-ngalangu lii papekangu na tau manda manyàmungu.
Jàka kanyàngi-nya na tau paeti, napa na-bonjangu pa-manggàna.
26Na ana na ma-pamayila-ha dàngu na mayaulu-ha da ina amana,
jia-yaka na ana na ma-pamakiangu dàngu na pa-payudi.
27Ha ananggu, jàka ndau hili mbuhangu-pa la pa-ajaru,
jiangu-ma muromba-nja da pambàda ajaru-mu.
28Na hakahii nda patuba hamana na pa-halela-ya na uku;
na-pahanggàmaru tau, mahàmu-ya la tau akatu.
29Na tau nduba majangga etina
jiangu-ma ba paluya.
@LAI 1995 Indonesian Bible Society (Lembaga Alkitab Indonesia)