PANGERANGU 18
18
1Na tau ma-kawàri wikina welingu la tau hawiangu hama-mana
ba yaulu-nanya nduma wiki-maana;
nda nabihu-a pa-kataku kanandingu tau hawiangu.
2Na tau nduba nda na-mbuhangu-a ka wuanya lii kaloka;
mbuhangu-nanya pa-wewaru-nya na papi wiki-maana.
3Na njala dàngu na pa-makia wàngu dalaku pa-kariangu;
jàka nawunda-ka manda hàmu, jiangu-maka duna ba paaka-nya.
4Na kareuku-na na tau na-ngalangu panjadi ngia paweli-na na manggàna
na ma-tanjiku hama kuru nduu,
dàngu na ma-mànjaku hama tuna wai na ma-lulungu.
5Nda nahàmu-a ba angu ninya na tau katadaku
tàka hi kapidihu niya na tau manda njala.
6Jàka na-kareuku na tau nduba patumbu-nanya na pa-lumungu,
dàngu karai-nanya ka ràmbahu-ya.
7Na patiki tau nduba palàjaru-nanya wikina;
nahiru-ya kareuku wikina.
8Na pawau tamu tau nahàmu ba ronguya;
na-mbuhangu pa-kawàluku-nya tau.
9Na tau manda pahàrangu wai ngerana
hama nda hàmu-mana dàngu tau na ma-mbuhangu pa-paruha-ma-a.
10I MIRI beri lewatu kapingatu-ya;
lai nàhuya nalaku ningu pamara na tau tànji.
11Tàka na pakaka tau wulu jiaha da pawulu-na da mamangga-nya nyuna
beri hama kilimbatu jangga ma-kapingatu la winggiru-na na paraingu.
12Na tau abungu napa nanjoru,
na tau karàda eti napa patembi-ya.
13Na hema ba ndedi pa-patingingu
pawunda manduba-ya dàngu pa-paakangu.
14Paraï pa-patikingu paluri, na-ngalangu pa-torungu la mayila-na na tau;
jàka na-munangu nuna na patikingu, munangu-mbunanya mbuu ndàbana na monungu-ka.
15Na tau paeti na-kalaura mànunya na papingu wàngu;
na tau manggàna narinju mànungu pa-ngalangu lii papekangu.
16Na pawua juangu nahewa-ya na ànda
dàngu nalua kariangu tau la hanggada da tau bokulu.
17Na ma-kareuku mangilu la hangga batangu ma-patandangu ngera, nakàli pa-deningu-ma ba wàngu paita-ya,
tàka jàka natàka-ka na papana hina-duka hi kanuturu-ya.
18Ba wàngu paundi, na-ngalangu panjàpu na pa-lumungu,
jiapa na pahili-da da tau maningu kawahangu na-ngalangu pa-patangangu.
19Na angu dedi na pambàda hàka eti, narihi harui-mapa la palua tomaya welingu la paraingu ma-kapingatu;
na parau ngaru beri kapala pàtu pindu bokulu paraingu maningu tindingu-ya.
20Ndumada da kareuku maluhu welingu la ngaru lupangu-ma
ba itaya na injana.
21Ningu kawaha-na na làma la pa-pamara-ya jàka ndia la pa-paruha-ya na luri;
na rukuna na kareuku patiki-na na tau lupangu-ma na-handepa-ya.
22Na tau na ma-ngalangu papaha-na, utungu-mananya;
na papaha, pawua juangu ma-pawelingu lai MIRI-ya.
23Na tau mila na-kamahi pamila etingu;
na tau wulu duna nahema wàngu pa-kayàmbakungu-na.
24Ningu kandua manda patutungu,
tàka ningumai marihi hàmu welingu la angu dedi wiki.
@LAI 1995 Indonesian Bible Society (Lembaga Alkitab Indonesia)