DIHA 22
22
Na hanganji Muapu na-ngàdalu-ya i Mbiliamu
1Nahili laku na banjaru Ihirailu hi da-pamaüngu la ma-ndidaru Muapu la hapapa Luku Yorundangu, la lihina na paraingu Yeriku.
2-3Ba narongu-ka na hanganji Muapu na ma-tamungu Mbalàku, anana i Hipuru, nggiki hamana ba da-palua-nja lima da tau Amori paraï tau Ihirailu, dàngu ba ma-kanjupu danguya na banjaru Ihirailu, kanggupu-danyaka paraï pa-mangàdatu, nyuna dàngu rayatu-na. 4Ka panii-daka da tau Muapu la ngara liku uru tau Mindiangu-ka, “Nda namandai-apa na kalibaru rambangu nuna ba na-kalàmitu-ya mbuu ndàbana la winggiru-nda hama tuna hapi ma-kalàmitu rumba la maràda,” wàda. Tàka i Hanganji Mbalàku 5na-paràhangu papalewa pa-ngàdalu-ya i Mbiliamu anana i Mbeuru, na ma-ngiangu la paraingu Peturo lihina la Luku Epuràtu ngabana la Amau. Pa-paràhangu-ha nyuda pa-patàka-nya i Mbiliamu na lii langu yiana welingu lai Mbalàku, “Kau pinya ninya na hau banjaru na ma-pamaingu welingu la Mehiru; da-tanyalangu la nggi - nggini da tauna, dàngu hawaritu-mada-nyaka la pa-nàhaku-ya na tana ngabama nyuma. 6Darihi kapingatu-mapa nyuda welingu lai nyuma. Ba tuna, maiwa! Kau ràtunja nyuda ndumanggu nyungga. Talànga wanguna pekuma ihu pa-pakàku-ha nyuda dàngu pawàngga-ha welingu la tanama nyuma. Kupii hàmu-manya duku, jàkau pa-kanyurungu, napa na-ngalangu-ma kanyuru na tau, tàka jàkau ràtungu, napa na-ngalangu-ma ràtungu na tau,” wàna wàdanya.
7Ka lua-danyaka ba hapajia-ha da liku uru tau Muapu dàngu Mindiangu ba dàngu ngàndi-danya wundana i Mbiliamu ka nabihu paràtu-nya na tau Ihirailu. Ba datàka-ka lai Mbiliamu hi da-patàka-nya na lii languna i Hanganji Mbalàku. 8Nanapa-ha nyuda i Mbiliamu, “Todu kàdi yiahu. Napa haromu kupeka-nggainya na papanii-nangga i MIRI,” wànanja. Ka todu-danyaka da liku uru Muapu ba hapajia-ha la umana i Mbiliamu.
9Hàla, mai-nanyaka i Ala lai Mbiliamu hi na paàra-nya, “Nggamuha yiada da tau da matodu la umamu, Mbiliamu?” wànanya.
10Nahema i Mbiliamu, “Nyuda yiada papalewa-na i Hanganji Mbalàku-ha welingu la Muapu, pa-patàkangu lii langu 11ba mbàda tanyalangu-naka la nggi - nggini na hau banjaru ma-pamaingu welingu la Mehiru. Na-paràha-ngga nyungga na Hanganji Mbalàku ka kuràtunya nuna na banjaru ndumana nyuna, ka peku bera-naha dàngu ka peku wàngga-nàha,” wàna.
12Napanii i Ala lai Mbiliamu, “Àmbu laku karia-dunja nuda da tau, dàngu àmbu ràtu-dunya na tau Ihirailu, ba mbàda pa-kanyuru-nggunjaka,” wàna.
13La lodu haromu-na napanii i Mbiliamu la papalewa-na i Mbalàku ba hapajia-ha, “Beli-kaiwa, nda nabihu-a i MIRI ka kulaku karia-nggai nyimi,” wànanja. 14Ka beli-danyaka lai Mbalàku hi da-patàka-nya ba nda nabihu-a i Mbiliamu pamai karia-nja nyuda.
15Hàla, paràhangu-nanyaka papalewa marihi dangu i Mbalàku dàngu marihi jangga panggatuna welingu la wungana. 16Da-patàka-nya i Mbiliamu na lii langu yiana welingu lai Mbalàku, “Ku kamahi-nggau welingu la tàbalu wihimu lundu la hupu ruu lunggimu, àmbu jia nda bihumu pamai lai nyungga. 17Napa kuwua pada - daa-manggau duku, dàngu jiapa ka nggàra-yakai na papanii-mu, napa ku-pahàra-manya duku. Mai àru làti kau ràtu-ngganya na banjaru,” wàna.
18Na nyuna nahema i Mbiliamu, “Jiapa-kai ka mbayaru-nggaha mbuu ndàbada da àmahu marara mabara la umana na Hanganji Mbalàku, jiangu-ma ba nda jia ndubaku-anggunya na hupu liina i MIRI, na Ala pa-marubuku-nggu. Ka jiapa la ma-màraku halawàla-ka nda peku-anggu la pa-dubaku-ya. 19Na nyuna itodu kàdi yiahu làti, hama tuda da pawàda ba hapajia-ha da papalewa la mangilu. Kumbuhangu papinya jàka ningu hili hau papanii-nangga i MIRI,” wàna.
20La rudungu nu namai i Ala lai Mbiliamu hi napanii, “Mbàda maidaka da tau yiada pakarai-kau nyumu la palaku karia-nja nyuda. Ba tuna kamomatu-wa palaku. Na nyuna jia-aya na papanii-nggunggau bàdi na pawunda-mu,” wànanya. 21La haromu-na wotu-nanyaka hela na kalandai-na i Mbiliamu, hi nalaku karia-nja ba hapajia-ha da liku uru Muapu.
I Mbiliamu dàngu na kalandai-na
22Tàka ba nalua-ka i Mbiliamu mbeni-nanyaka i Ala. Ba nàhunya la kajia kalandai-na i Mbiliamu, ba dàngu ndàki-danya paraï da madua tau la lihina, ndolaku-nanyaka la mata ànda na papalewa-na i MIRI la papara - ratahu-nya nyuna. 23Ba naita-yaka paraïna kalandai, ba na-ndolaku lai nu na papalewa dàngu hapanda pa-binjiru, hiliru-nanyaka welingu la ànda nuna na kalandai, hi na wàihakungu la woka. Ka palu-nanyaka nuna na kalandai i Mbiliamu hi na-pabeli-nya la ànda. 24Tunaka nu ndolaku ningu-nanyaka la ànda ma-kahukulu na papalewa-na i MIRI, la njonga dàmbu woka angguru maningu dindi watungu la hapapa - hapapa-na. 25Ba naita-yaka na papalewa-na i MIRI paraïna kalandai, li ningu-nanyaka la halinggi hi lupa na-pandehangu la dindi watu na wihina i Mbiliamu. Ka hili palu-nanyaka na kalandai i Mbiliamu. 26Ka hili ndàharu-nanyaka na papalewa-na i MIRI, hi na-ndolaku ningu la marihi kahukulu, hi lupa nda ningu ànda ngia palii la kalai la kawana. 27La rehi nu ba naita-yaka na papalewa-na i MIRI paraïna kalandai, ka maràbaku-nanyaka nuna na kalandai. Ka mbeni-madua-nanyaka i Mbiliamu hi lupa napalu wànya tokungu na kalandai. 28Tàka i MIRI nawua-nya pingu na kalandai ka na-kareuku. Hi napanii nuna na banda lai Mbiliamu, “Ka nggàraya na pambàda wundanggu lai nyumu Umbu, hi lupa upandailu wundangu papalu-ka Umbu?” wàna.
29Nahema i Mbiliamu, “Rukuna bau pajulu waadungga! Làti jàka ningu hapanda-nggu jiangu-ma ba ku-pameti-kau!” wànanya.
30Nahema na kalandai, “Ka nda mbàda dira mandaiya ba kalandai pakàli kaliti-mungga Umbu? Mbàda malihu-ngguka nu hanggangu lai nyumu Umbu?” wàna.
“Ndia-a,” wàna ba nahema i Mbiliamu.
31Tàka i MIRI na-paharii-ya na matana i Mbiliamu la paita-ya na papalewa-na i MIRI ba na-ndolaku lai nu dàngu hapanda pa-binjiru. Ka ailulu maràbaku-nanyaka la tana i Mbiliamu pa-marubuku-nya. 32Na-paàrangu na papalewa-na i MIRI, “Ka nggikina hi lupa upandailu wundangu papalu-ya na kalandai-mu? Mai-nggunyaka papara - ratahu-nggau ba nda na hamua jàkau lua, wànggu. 33Ba naita-ka Nyungga na kalandai-mu, hi lupa na-pandailu wundangu palii ningu la halinggi. Jàka ndia, jiangu-ma ba mbàda pameti-nggunggauka làti, na nyuna na kalandai ku-pamara-ya,” wànanya.
34Nahema i Mbiliamu, “Njala-manggu-nyaka. Nda kupi-anggau ndolaku-mu Umbu la mata ànda la papara - ratahu-ngga nyungga. Tàka nàhu jàka nda nahàmu la patandangu-mu na pawunda-nggu ba kulaku pangalangu, beli wàngguka,” wàna.
35Na nyuna napanii na papalewa-na i MIRI, “Kiku-bianja duna nada da tau. Na nyuna na papanii-mu, jia-ma-aya bàdi na papanii ba wànggunggau,” wànanya. Ka laku pangalangu-nanyaka i Mbiliamu dàngu nuda da papalewa-na i Mbalàku.
Ba nalua pa-hàmburu-ya i Mbiliamu i Mbalàku
36Ba narongu-ka i Mbalàku ba nàmunya i Mbiliamu, lua-nanyaka pa-hàmburu-ya i Mbiliamu la paraingu Muapu la hingi Luku Àrunongu la padira tana ngaba Muapu. 37Napanii i Mbalàku lai nyuna, “Ka nggikina hiu ndau mai la kawunga ngàdalu-nggunggau? Bau kakaya nda ku màkama nu pa-mbayaru-nggau wundamu?” wànanya.
38Nahema i Mbiliamu, “Kanii, hi mai-madunggu-nyaka, ma ndia. Na nyuna, nyungga duku nda ningua kawaha-nggu la papanii ngga - nggàra, hinggilu-na na papanii ba wànangga i MIRI,” wànanya. 39Ka laku-danyaka i Mbiliamu dàngu i Mbalàku la paraingu Huhutu. 40Lai nu nawotu kameti maraku hapi dàngu mbimbi i Mbalàku, tàka hawiangu welingu la tolungu nuda nawua-nya i Mbiliamu dàngu ba hapajia-ha da liku uru karia-na.
Na kawunga manyura-na i Mbiliamu
41La lodu haromu-na na-karia-nya i Mbiliamu pa-kandekalu la tandula Mbamutu-Mbaàlu paraïna i Mbalàku. Welingu lai nu peku ita-nanya hawiangu na banjaru Ihirailu i Mbiliamu.
Currently Selected:
DIHA 22: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
