DIHA 21
21
Ba datalu-ha da tau Kanaàngu
1Na Aràtu hau paraingu la Kanaàngu mbàra luruya. Ba narongu-ka na hanganji-na nuna na paraingu, ba la Atarimu-ha napa dalii ningu ba nàmunja da tau Ihirailu, lua-nanyaka pahada-nja hi na-tanawa-nja ba nda ana mapira-ha la hongada.
2Ka paràkingu-nanyaka na tau Ihirailu dapanii-nya i MIRI, “Jàkau wua-nggamanya na talu hanggangu la banjaru nuna, napa ma-pamolu-nja nyuda dàngu da paraingu-da lundu damànji,” wàda. 3I MIRI na-kataku-ya na pakarai-da da tau Ihirailu hi nandula-ha la pa-pakàku-ha da tau Kanaàngu. Ka patàlaru-dahaka da tau Kanaàngu papohu-nja da paraingu-da paraï da tau Ihirailu, hi da-patamu-nya Hòruma#Hòruma: Yiana na tamu la hilu Imbarani “molungu,” wàna. lai nu.
Na kataru wudu
4Tunaka nu dunjaku-danyaka na Palindi Hòru da tau Ihirailu, hi dalii ningu la ànda na ma-hanggangu la Njobu Akamba, ka winggiru-nya na Endumu wàda da pawuku-da. Na nyuna nàhu la ànda dira-naka na torungu-na nuna na banjaru, 5hi da-hoputu-nya i Ala dàngu i Muha, “Ka nggikina dumu nyumu hiu luhu ngàndi-kama welingu la Mehiru? Ka pameti-ha yiahu la maràda telangu wàmu-nggama? Lai yiahu nda ningua pangangu dàngu nda ningumbu wai. Mawàngu pa-makinahu bia-njaka yiada da pangangu manda palingu!” wàda. 6Ka patàka-nanjaka da kataru pa-upahungu i MIRI la hongana nuna na banjaru. Nadangu na tau Ihirailu na mameti pakati kataru. 7Hi damai da tau Ihirailu lai Muha hi dapanii, “Njala-mama-nyaka ba ma-hoputu-nya i MIRI dàngu nyumu. Kamahi-nyawa nàhu i MIRI, ka payila-nja yiada da kataru welingu lai nyuma,” wàda. Ka hamaya-nanyaka tungguna na banjaru i Muha. 8Hàla, paràha-nanyaka i Muha i MIRI pa-pandoi heu kataru welingu la wudu hi tuya la hapungu ai pa-àkingu. Nimbihu-na na tau pakati kataru, napa nahàmu jàka na-tàngaru-ya nuna na kataru wudu. 9Ka pandoi-nanyaka kataru welingu la wudu i Muha hi natuya la hapungu ai pa-àkingu. Nimbihu-na na tau pakati kataru pekuna pahàmu jàka na-tàngaru-yaka nu na kataru wudu.
Welingu la Palindi Hòru hanggangu la Lolangu Muapu
10Tunaka nu hili laku-nanyaka na tau Ihirailu hi da-pamaüngu la paraingu Ombutu. 11Ba da-dunjaku-nyaka na pangia lai nu, da-pamaüngu la tanyungguru watuna na Ambarimu la maràda telangu la pahunga lodu welingu la ngabana na Muapu. 12La malamiri-na da-pamaüngu la Lolangu Heritu. 13Welingu lai nu dahili laku hi da-pamaüngu la hapapa Luku Àrunongu, la maràda telangu na ma-tayilingu lundu natoma la tana ngaba tau Amori. Na Luku Àrunongu jiaya na padira tana ngaba tau Muapu dàngu tana ngaba tau Amori. 14Tuna nuduka hi ningu pa-tulihu daa la ‘Mbuku Pabera-na i MIRI’: ”... na Ndeha Wahipu, la ngabana la Huapa dàngu da lolangu-na; na Luku Àrunongu 15dàngu la karaha-da da lolangu da ma-tayilingu lundu datoma la ndeha Àru hi na-hanggangu la padira tana ngaba tau Muapu,” ba wàna.
16Welingu lai nu da hanggangu la hau pangia la Mbeyiru ba wàdanya, da humuru wàna-duka nu. Lai nu napanii àmangu i MIRI lai Muha, “Paràha-nja pa-pauhi da tau; napa wua-nggunja wai nyuda,” ba wàna. 17La rehi nu na banjaru Ihirailu daludu wànya na ludu yiana,
“Ha dimi humuru, màtawa da waimi ka da-kabubalu,
tàka nyuma duma ka mayema wànya ludu.
18Humuru paàki-da da ma-pangora
dàngu paraï da liku uru banjaru-ka
ba daàki wàngu tokungu pa-irungu-da
dàngu wàngu tokungu tanda kawaha-da,” wàda.
Welingu la maràda telangu da lelingu-ha la Matana, 19tàka welingu lai nu la Nahalialu, hàla la Mbamutu, 20la malamiri-na la lolangu tana ngaba tau Muapu, la wawana na pinu Palindi Pinggàhu na ma-hanggangu la maràda telangu.
Ba taluha i Hanganji Hihungu dàngu i Hanganji Onggu
(Bel. 2:26–3:11)
21Tunaka nu paràha-nanjaka da papalewa-na na banjaru Ihirailu lai Hihungu, na hanganji Amori pa-patàka-nya yiana na lii langu, 22“Ma-kamahi-nggau Umbu, pahia-ki nggama làti ka malii ningu la tana ngabamu Umbu. Nyuma dàngu da bandama nda jia hiliru-ama duma welingu la ànda dàngu nda jia tama-ama duma la wo - woka jàka ndia la wo - woka angguru, dàngu nda jia unungu-ama wai la hu - humuru-mu nyumu Umbu. Nda jia hiliru-ama duma welingu la tana pahàka lundu maluhu welingu la tana ngabamu Umbu,” wàda. 23Na nyuna nda nabihu-a i Hihungu pa-pahia-nja da tau Ihirailu ka da lii ningu la tana ngabana nyuna. Pauhi-nanjaka da pamba tanatara-na hi nalaku la Yahàhu la maràda telangu, hi nahada-nya na tau Ihirailu lai nu. 24Na nyuna nu la pa-hànjalungu dadangu da tanatara Amori pa-pameti tau Ihirailu. Hàla, hi da-mandapu-nya na tana ngabada nyuda paraï da tau Ihirailu, piti welingu la Luku Àrunongu lundu la Luku Yambuku, nu na padira tana ngaba tau Amungu, nadu na padira lai nu ma-kanjupu kapingatu ngia pa-torungu-nanya. 25Tuna nuduka ba dawàhi ndàbaha tau Ihirailu da paraingu tau Amori, papohu-nya na Hehimbungu dàngu da paraingu kudu la winggiru-na, hi dandàdiku lai nu. 26Na Hehimbungu jiaya na parai puhu pareta-na i Hanganji Hihungu. Mbàda pabera da-nanyaka nyuna àmangu na hanganji Muapu dàngu mbàda wàhi-nanyaka na tana ngabana lundu la Luku Àrunongu. 27Tuna nuduka hi tuya lawiti lududa da mapingu lawiti,
“Maingu-wa la Hehimbungu,
la paraingu-na i Hanganji Hihungu.
Ma-mbuhangu nyuma paita-ya na paraingu yiana
ba pahada-nya dàngu ba pahàmu beliya.
28Handàkangu welingu la paraingu yiana
da pamba tanatara-na i Hihungu da ndàharungu beri epiha.
Ma-pakabu-ya na paraingu Àru la Muapu,
dàngu hi na-kawaha-ha da tandula la Àrunongu.
29Ai, ha dumu banjaru Muapu, hanggàmaru-munyaka!
Ha dumu malumu-nya na marapu Kamuhu, tàlaru-munyaka!
Na alamu namàta-nggau panjadi tau ma-yilangu,
na-tanawa-nja hanganji Amori da kawini-mu.
30Tàka nàhu tàlaru-danyaka da ana umbuku-da,
la ànda welingu la Hehimbungu hanggangu la Ndimbungu,
welingu la Nahimu hanggangu la Nopa lihina la Mandemba,” wàna.
31Ka pa-engangu-nanyaka la tana ngaba tau Amori na banjaru Ihirailu. 32Tunaka nu paràhangu-nanyaka tau i Muha palua pahimbu ànda mahàmu halawàla ka hadanya na paraingu Yaehiru. Tàka da tau Ihirailu da wàhiya nuna na paraingu dàngu da parai kudu la winggiru-na, hi dawàngga-ha da tau Amori da ma-ngiangu lai nu.
33Hàlaka nu, punjilungu-danyaka da tau Ihirailu, hi dalii ningu la ànda ma-hanggangu la Mbahàngu. Na-ndàharungu dàngu pamba tanatara-na i Hanganji Onggu welingu la Mbahàngu pahada-nya na tau Ihirailu la paraingu Endirei. 34I MIRI napanii-nya i Muha, “Àmbu mangàdatu-dunya nyuna. Napa kuwua-nggau talu. Napa upakàku-ya nyuna nggubulu-na na rayatu dàngu na tanana. Palua-nya lima hama tuna bau palua-nya lima i Hanganji Hihungu na ma-pareta la Hehimbungu,” wànanya. 35Tàka da tau Ihirailu da pameti-ya i Onggu, da anana dàngu nggubulu-na na rayatu-na; nda ningua ma-kanjepi. Tunaka nu mandapu-danyaka nuna na tana.
Currently Selected:
DIHA 21: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
