MIKA 3
3
I Mika na-hanobaku-ha da liku uru Ihirailu
1Irongu, ha dimi maningu kawahangu la Ihirailu! Làti lupangu-ma bàdi ipinya jàka nggàraya na mamola, 2tàka huda ni biami-nyai na mahàmu, dàngu hi imbuhanya na ma-akatu. Indina ka-miripu-nya na banjaru-nggu, tàka hi ihiraya na toluna welingu la rina. 3Inganya na banjaru-nggu. Iba - bàriku-ya na manula-na tàka ipamija-ha da rina. Iya - yàluha nyuda hama tuna ba yàlu tolungu patuu la wurungu. 4Napa natàka na rehina bai kaladaku pakarai pa-ndulangu lai MIRI, tàka Nyuna nda nabihu-a pahema. Nda nabihu-a napa pa-patingi-nja da hamayangu-mi, ba mbàda wunda-mika ma-akatu.
5Na banjaru-nggu na-panyonga-ha paraï da wunangu da ma-manyurangu mahàmu la tau na ma-wuangu àmahu, tàka damuhu-nya dàngu nda da-kawela-nya na tau na manda wuangu. La wunangu da matuda nu, napanii i MIRI, 6“Ha dimi wunangu, mareni njàpu-ama-naka na rehimi; tama-nanyaka na lodumi. Ndai hili ngalangu-apa harii mata mabowa-ya da pa-pakaka hahanggu. Nda jia peku-amipa pa-manyura ana ngga - nggàra,” wànanja. 7Da tau da manyura-ya na lodu na manàmu-nya napa da-makia ba nda na-tubangu na manyura-da. Napa nyuda mbuu ndàbada pa-pawawa-ha ba nda nahema-ha paraïna i Ala.
8Tàka jàka jiaya na wikinggu nyungga, mbàda paihi-nanggaka duku Ngahuna dàngu kawaha-na i MIRI. Nawua-ngga la pa-jàngapu-ya rukuna na mola, dàngu nawua-ngga tara ura la papeka-nja njalada da pambàda wundada da tau Ihirailu. 9Rongu-hawa da papanii-nggu, ha dimi maningu kawahangu la Ihirailu mahuda etinya na mola dàngu na ma-panjànga-nya na ma-padeningu. 10Nyimi mi-pahada-nya na Yeruhali, na paraingu-na i Ala, la lata pameti tau dàngu la manda mola. 11Da maningu kawahangu la paraingu da-pareta, ka ngalangu wàngu àmahu pawua pa-runungu, da ratu da-papekangu rukuna na uku, ka ngalangu wàngu nggaji, tàka da wunangu dakarai ngerangu welingu lai Ala ka ngalangu wàngu àmahu – dàngu dakaka-ya ba na-karaha-ha nyuda paraïna i MIRI. Dapanii, “I MIRI ninya la pahiku-nda nyuta; nda jia nggàna-ananda ura mila,” wàda.
12Rukuna na akatu-mu nuna, napa pa-kabànda wokanya na Hiungu, na Yeruhali napa nanjadi-ya pabundu watu tanyungguru, tàka na tandula Umana i MIRI nanjadi-ya jemi pa-wukungu.
Currently Selected:
MIKA 3: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
