LUKAHU 7
7
I Miri Yehu ba na-pamàlaru-ya na atana na haàtu parawira Roma
(Mat. 8:5-13)
1Ba nahàla papeka-ya na hangia - hangia la tau dangu, beli-nanyaka i Yehu la Kapinaumu. 2Lai nu ninya na haàtu parawira Roma, na maningu atangu na pambana mbuhana. Na ata nuna hidu-nanya, natika pameti. 3Nu ba narongu-ka na parawira na rukuna i Yehu, na-paràhangu ba mapira-ha da amabokulu Yahundi palua lai nyuna ka namai àru pa-pamàlaru-ya na atana. 4Ba datàka-ka lai Yehu, nuda da tau da-kamahi pambana-ya ka nandula àruya na parawira ba wàda. “Na Parawira yiana ràkana jàka mundula-ya Umbu,” wàdanya i Yehu, 5“nadu nyuna ba nambuha-nya na banjaru-nda dàngu na-pahadangu-maka uma bungguru ndumama nyuma,” wàdanya.
6Ka lua-nanyaka i Yehu kariangu dàngu nyuda. Ba mareni tàka-ama-naka i Yehu la uma, na parawira na-paràha-nja da anguna papanii-nya, “Màtangu-ka duna pa-lundungu la uma, nggàra hi na-pajàrangu wikina pamai la uma. Nyungga nda ràka-ana panapa-ya i Umbu la umanggu. 7Jiaya nuna-maka hi kiri nda toru mbeninggu pamai wikinggu patoma-kau. Jia ba tuna tungu bia paniimu na-màlaru-ma duku na atanggu. 8Nadu nyunggambu ba ku-patundungu-madui duku la mangia ditangga dàngu la wawanggu nyungga nimbunja da panjuri dama-patundu-nya na pareta-nggu. ‘Lua!’, jàka wànggunya na haàtu na panjuri, nàhu-manya; dàngu ‘mai!’ jàka wànggunya na haàtu, nàmu-manya. Tàka na atanggu ‘ràmaya yiana!’ jàka wànggunya, naràma-maya,” wàna.
9Na-hangàtaru i Yehu ba narongu-ya nuna. Nambaili hi napanii dànya na tau dangu na matundu-nya, “Mambana-duya na tau yiana. Jiapa la honga tau Ihirailu-mbu ndedi kuhunggu ma-bokulu pawai tungu nu!” wàna.
10Ba dabeli-ka nuda da tau papalewa la umana na parawira, nuna na ata mbàda màlaru-naka.
I Miri Yehu ba na-paluri beliya na anana na kawini meti lei
11Ndedi nggi mandai#Ndedi nggi mandai: da lawiti ndai da manda pirada: hadangu harii. lua-nanyaka i Yehu la paraingu Naingu. Da makiku-nya dàngu na tau dangu laku karia-madanya. 12Ba natàka-ka i Yehu la lihi pindu paraingu, na tau talànga ngàndi-danya mameti la hambeli paraingu. Na mameti anakeda miniya, ana kamehangu-na na haàtu kawini meti lei. Nadangu na tau angu paraingu-na malaku karia-nya na inana. 13Ba naita-yaka nuna na inana paraïna i Yehu, mila-nanyaka eti, hi napanii dànya, “Àmbu hii, Ina!” wànanya. 14Tunaka nu i Yehu hi nalihi-nya na paduku wàngu mameti hi nadàma-ya. Ka ndàdiku-danyaka da maduku-ya na mameti. Hi napanii i Yehu, “Ha bidi mini, hadangu-wa wànggunggau!” wànanya. 15Nuna na bidi mini na mambàda meti hadangu-nanyaka hi na-mandapu, hi reu - reuna. Tàka i Yehu hi na-pakata-nya la inana.
16Na-mangàdatu hàla na tau, hi dawotu-nya i Ala. Dapanii, “Na haàtu na wunangu bokulu hunga-nanyaka la padua-nda nyuta! I Ala mai-nanyaka pa-pamàna-nya na banjaru-na!” wàda.
17Nu na rukuna i Yehu na-wewarungu-ka la nggubulu Yundia dàngu la ngaba weli winggiru-na.
Da papalewa-na i Yuhani Pa-runungu
(Mat. 11:2-19)
18Da makiku-nya i Yuhani da-patàka hàlanya i Yuhani mbuu ndàbada da matumbu-ka. Ka paau-nanjaka da makiku-nya da tau madua nyuna i Yuhani, 19hi napalewa-ha lai Miri Yehu la pa-paàra-nya, “Jia-kauka nu Umbu na matàka napa tundunya na paràndi-na i Ala, jàka ndia hi ma-patia-manyaipa bàdi na haàtu? wàna wàminya,” wànanja.
20Nu da tau madua papalewa-na i Yuhani lua-danyaka lai Yehu hi dapanii, “I Yuhani Parunungu na-palewa-kama la pa-paàra-nggau, jia-kauka nu Umbu na matàka napa tundunya na paràndi-na i Ala, jàka ndia hi ma-patiangu-maipa bàdi haàtu? wànanggau” wàdanya.
21Nu jia pàkuyai duna i Yehu ba na-pamàlaru tau dangu, dàngu ba nawàngga-ha da wàndi akatu, màlai ba hau danguda da tau poki da mangita. 22Ka hema-nanjaka paraïna i Yehu, “Beliwa lai Yuhani kai pekanya jàka nggàraha da parongu-mi dàngu da pangita-mi: da tau poki daita-ka, da tau kaliparu dapangga-ka, da tau hidu manula pa-mayitangu#hidu ... pa-mayitangu: Tàngaru-ya la 5:12. dalànga-ka, da tau kawanga darongu-ka, da tau meti daluri belika, tàka na Lii Mànangu welingu lai Ala pa-bobaru-yaka la tau milaka. 23Oha-anaka na tau na manda tuu pelu pakangu pa-jukaru-ngga nyungga,” wàna.
24Ba dalaku-ka da papalewa-na i Yuhani, wunda-nanyaka panii na tau dangu i Yehu rukuna i Yuhani, “Nu bai lua la maràda telangu nggàra pa-tàngaru-mi? Hawàla rumba pa-jiliru ngiluya? 25Nu bai lua nggàra paita-mi? Tau mawotu paki manandangu-ya? Da tau da mapakai tungu nu dàngu da maluri boraku ma-ngiangu la uma hanganji-ha duda! 26Jia ba tuna, bai luhu nu nggàra paita-mi? La paita-ya na haàtu na wunangu? Tubana, màlai narihi-pa welingu la haàtu wunangu. 27Nadu ba jiaya i Yuhani yiana-duka na patiki daa la Huratu Matua,
‘Yiana jiaya na papalewa-nggu,’ wàna i Ala;
‘Nyungga napa ku-palewa-ya la pamangilu-nggau Nyumu,
ka na-pakalongga-nggau ànda Nyumu!’ ” ba wàna.
28“Namuya,” hilu wàna i Yehu, “la pinu tana yiana ndedi handàkangu paningu tau marihi-nya la pa-bokulu i Yuhani Pa-runungu. Ba tuna na tau na marihi màrahu la honga banjaru-na i Ala, narihi-pa pa-bokulu welingu lai Yuhani Pa-runungu,” wàna.
29Mbuu ndàbana na tau – jia-mbuha da makei hilu katiku – darongu-ya i Yehu ba napanii tuna nu; nyudaka da tau da ma-patundu-nja mbuu ndàbada da pa-karuhi-na i Ala dàngu hi da-mbuhangu pa-parunu-nja paraïna i Yuhani. 30Tàka da tau Parihi dàngu da ngguru anggama nda dabihu-a duda pa-kataku-ya na pa-pakaka-na i Ala nduma wikida nyuda. Nyuda nda dabihu-a pa-parunu-nja paraïna i Yuhani.
31Hàla hi nahili panii i Yehu, “Nggàraka ihu bàdi pa-pangera wànggunya na tau la rehi nàhu? Hama nggàra-haka ihu nyuda? 32Nyuda hamada da anakeda da ma-mandapu la pahangu; da hau pauhi dawara-nja da pauhi hau, ‘Nyuma ma-paihinggai weliku hawola, tàka nyimi ndai bihu parenja! Nyuma mawunda-nggai ludu hawina, tàka nyimi ndai hii!’ wàda. 33I Yuhani Parunungu namai – nyuna na-puaha dàngu nda na-unungu angguru – tàka na paniimi nyimi, ‘Huruku-nanya wàndi kambàliku!’ wàmi. 34Namai na Ana Tau – nangangu na-ngunungu – napaya nyimi, ‘Tàngaru-ya na tau nuna! Na-malumbangu, na-maüku, angu tau kei hilu katiku dàngu angu tau njalaya’, wàmi. 35Jiapa ka tuna nu, na manggàna-na i Ala na-pajia-ya paraï da tau ma-kataku-ya,” wàna.
I Miri Yehu la umana i Himungu
36Na haàtu na tau Parihi, na ma-tamungu Himungu, nadunda-nya i Yehu pangangu. I Yehu nalua la umana hi na-mandapu pangangu. 37La paraingu lai nu ninya na haàtu na kawini, na maluri la manjala. Nu ba narongu-ya i Yehu ba talànga nganguna la umana na tau Parihi, mai-nanyaka ba nangàndi hau boti watu mina mbi kati. 38Na-ndolaku la kajia-na i Yehu la lihi wihina dàngu hiina hi nabaha wànja wai matana da wihina i Yehu. Tunaka nu da wihina i Yehu hi na-langora wànja lunggina hàla hi na-puduku-ha, hi naburi-nja mina mbi kati. 39Nu na tau Parihi na madunda-nya i Yehu pangangu, ba naita-yaka na matuna nu, pulungu-nanyaka la etina, “Na tau yiana jàka wunangu-ya làti napi-manyaka duna jàka nggamuya na kawini na ma-jonggaru-ya dàngu na kawini nina ba maluri la manjala-ya!” wàna.
40Hàla i Yehu hi napanii-nya i Himungu, “Ha Himungu, ninya na hangia ka ku-pekanya wànggunggau,” wànanya.
Nahema i Himungu, “Wua, Umbu Ngguru, pekaya nyuna,” wàna.
41Hi napanii i Yehu, “Ninja tau madua-ha da ma-wutangu la haàtu na mawua paruta-nja àmahu. Na haàtu lima ngahu àmahu bara tàka na haàtu lima kambulu àmahu bara. 42Nu da tau madua nda damàka pahiulu-ha da wutada, ka podahu-duna-haka da wutada. Màla welingu nu da tau madua nggamu na marihi mbuhanya nuna na tau na mawua parutangu àmahu?” wàna.
43“Ba kureki-ya na tau na pa-podahu padangu wutana!” wàna i Himungu.
“Tubana na palaamu,” hi wàna i Yehu. 44Hàla i Yehu hi na-tàngaru-ya nuna na kawini hi napanii-nya i Himungu, “Muita-ya yiana na tau kawini? Ba kutàka la umamu nyumu ndau pa-yemangu-a wai pabaha wànja da wihinggu; tàka na kawini yiana nabaha wànja wai mata da wihinggu dàngu hi na-langora wànja ru lunggina. 45Nyumu ndau nggepi wàngga puduku, tàka na kawini yiana nda na-pànjangu ndoku pa-puduku-ha da wihinggu piti welingu ba kutàka lai yiahu. 46Nyumu ndau buri-angga mina la katiku-nggu, tàka na kawini yiana naburi-njaka mina mbi kati da wihinggu. 47Langatàka: na-bokulu mbuhangu-na tandana da njalana da madangu ba pa-jàmangu-haka! Na tau na pa-jàmangu hawutu, jia hi hawutu-ana na mbuhangu-na,” wàna.
48Hàla i Yehu hi napanii-nya na tau kawini, “Da njalamu pa-jàmangu-haka,” wànanya.
49Da tau hawiangu da manga dànya i Yehu panii-danyaka dàngga anguda, “Nggamuya na tau yiana hi na-ngalangu pa-jàmangu njala?” wàda.
50Tàka i Yehu hi napanii-nya na tau kawini, “Ruku pawaimu lai Nyungga, nyumu papamànangu-kauka. Laku mànjaku-wa!” wànanya.
Currently Selected:
LUKAHU 7: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)