LUKAHU 6
6
Na paàrangu rukuna na lodu Hangahu
(Mat. 12:1-8; Mrk. 2:23-28)
1La hau lodu Hangahu, ba talànga lina i Yehu la hau woka uhu nggàndumu, da makiku-nya da muti uhu nggàndumu. Dakuhi wànja limada da uhu nggàndumu, hi danganja. 2Ba mapira-ha da tau Parihi dapanii, “Nggikina nyimi hi mipangga-ha da uku anggama-nda bai wunda biaya na pa-hiringu la lodu Hangahu?” wàda.
3Nahema i Yehu, “Ndedi mi-handàkangu-ma ihi nyimi pambahaya na rukuna i Ndautu, ba jiaya na rimbangu-na nyuna dàngu da karia-na? 4Ba natama la Umana i Miri hi napiti-ha da roti da pambàda marakungu lai Ala, hi nanganja. Tunaka nu hi nawua-mbunja roti da tau karia-na. Làti duna na uku anggama-nda, mbulungu da ratua duda da mapeku la panganja da roti nuda,” hi wàna.
5Hàla hi napanii i Yehu, “Na Ana Tau na-kuaha-ya na lodu Hangahu!” wànanja.
Na tau na mameti lima hapapa-na
(Mat. 12:9-14; Mrk. 3:1-6)
6La hilu hau lodu Hangahu, lua-nanyaka i Yehu pa-ajaru la uma bungguru. Lai nu ninya na haàtu na tau na mameti lima hapapa-na. 7Ba mapira-ha da ngguru anggama dàngu tau Parihi da-patikingu pahimbu-ya na njalana i Yehu ka peku kàla-ndanya wàda. Jia-duyaka hi da-hamata mànuya jàka jia pamàlaru biana tau la lodu Hangahu. 8Tàka i Yehu napi-manya na pa-pangàda-da. Jia-duyaka hi napanii-nya na tau na mameti lima hapapa-na, “Mai kau ndolaku yiahu la hangga!” wànanya. Na tau nuna na-hadangu, hi na-ndolaku lai nu. 9Tunaka nu i Yehu hi na-paàranja da tau da maninja lai nu, “Tundunya na anggama, nggàra mapeku paràma-nda la lodu Hangahu? Taràma mahàmu jàka ndia ma-akatu? Pahàmu-ya na tau jàka ndia pa-hanggàmaru-ya?” wàna. 10I Yehu na-pawiliku-nja mata nyuda mbuu ndàbada, hàla hi napanii dànya#napanii dànya: da lawiti ndai da manda pirada: napanii dàngu mbenina. nuna na tau, “Pajola-ya na limamu,” wànanya. Na tau nuna na-pajola-ya na limana, ka màlaru-nanyaka.
11Tàka da ngguru anggama dàngu da tau Parihi mbeni nda ukuha, hi da-batangu jàka nggikina wàdaka hangganya i Yehu.
I Miri Yehu ba napindi pa-pahurungu tau hakambulu madua
(Mat. 10:1-4; Mrk. 3:13-19)
12La rehi nuna hei-nanyaka i Yehu la hau tandula pa-hamayangu. Lai nu na-hamayangu lai Ala napinja-ya na rudungu. 13Ba naharii-ka na lodu, paau-nanjaka da makiku-nya, hi napindi tau hakambulu madua welingu lai nyuda. Natunja ngarada nuda da ma-hakambulu madua-da, pa-pahurungu, wànanja. Nyuda jia-duhaka: 14i Himungu (i Peturu ba wàna-mbunya) dàngu i Andaria angu dedina i Himungu; i Yakombu dàngu i Yuhani, i Pilipu dàngu Mbàratolumiu, 15i Matiu dàngu i Tomahu, i Yakombu anana i Àlapiu, dàngu i Himungu (Ma-kaborangu, ba wàdanya), 16i Yundahu anana i Yakombu dàngu i Yundahu Ihikariu, na ma-kaleka-nya i Yehu ngeru.
I Miri Yehu ba na-ajaru dàngu ba na-pamàlaru tau
(Mat. 4:23-25)
17Tunaka nu puru-nanyaka i Yehu welingu la tandula karia-da da pa-pahurungu, hi da-pànjangu dàngu hi da-ndolaku la hau pangia ma-linjaku. Lai nu nimbunja da tau ba hau danguda da makiku-nya hawiangu dàngu dadangu-mbu da tau mamai welingu la nggi - nggi la nggubulu Yundia dàngu Yeruhali, dàngu welingu la parai - paraingu Tiruhu dàngu Hindungu la hingi tehiku. 18Maidanya la parongu-ya i Yehu dàngu la pa-pamàlaru-ha da hidu - hidu-daka. Da tau pa-huruku wàndi akatu damaimbu hi pamàlaru-ha. 19Mbuu ndàbana na tau da-pamukarungu paràma-ya i Yehu, nadu ba ningu patahu-na maluhu welingu la ihina na ma-pamàlaru-ha nyuda mbuu ndàbada.
Na nggaüru dàngu na hawina
(Mat. 5:1-12)
20I Yehu na-panau-ha da makiku-nya hi napanii,
“Oha-amika nyimi tau mila,
nadu nyimi napa angu banjaru-na i Alakai!
21Oha-amika nyimi mamanjuu nàhu;
nyimi napa pa-pambihu-kai!
Oha-amika nyimi mahii nàhu;
napa nyimi riki-minyaka!
22Oha-amika nyimi jàka da-paumbinggai, jàka da-tulaku-kai, jàka da-paakanggai dàngu jàka dapulu-nggai rukuna na Ana Tau! 23Da wunangu la àmangu tudanja numai. Jàka tomaka patuna nu, màtawa kai mbaha eti dàngu kai renja hawola, nadu ba na-bokulu taï na wundami na pa-payemangu-kai la awangu.
24Ba tuna ura pàku-minyaka nyimi mawulu nàhu;
nàdu ba mbàda pàda haha-minyaka na hàmuna!
25Ura pàku-minyaka mambihu hahangu nàhu;
nadu nyimi napa ba rimbangu-minyaka!
Ura pàku-minyaka mariki hahangu nàhu;
nadu napa ba hawina dàngu ba hii-minyaka!
26Ura pàku-minyaka nyimi, ba nawotu hàlanggai tau; nadu ba tuna numaka àmangu da bokumi ba dawotu-nja da wunangu kabàli àmangu,” wàna.
Na aïya na muhu
(Mat. 5:38-48, 7:12a)
27“Tàka nyimi marongu-ka nyungga nàhu, kupeka hahanggai-nya yiana: Aïha da muhumi, dàngu hàmu bia la tau na ma-paumbi-nggai. 28Pa-kanyuru-nya na tau na maràtu-nggai, dàngu hamaya-nya ndumana na tau na ma-akatu lai nyimi. 29Jàka natàba-ya tau na papumu na hapapa, pajàma-kinya ka natàba-ya na papumu na hapapa-mbu. Jàka naramba-nya na kalembi liumu, wua-mbunya na kalembi dalumu. 30Jàka nakarai-kau ngga - nggàra paraï tau, wua bianya; tàka jàka naramba-nya na mangumu, àmbu hili karai beli-duya. 31Timinya numai bàdi na tau hawiangu, màta ka tuna-nggama nu tau jàka wàmi.
32Jàka imbuhanya na tau na mambuha-nggai nyimia, nggàraka lingumi? Na tau njalambu dambuha-nja da tau da mambuha-nja nyuda! 33Jàkai tuu mahàmu la tau na matunggai mahàmu-a, nggàra lingu-mika? Da tau njalambu tuda numbu! 34Dàngu jàkai wua parutangu àmahu la tau na mamàka pa-pabelingu-a, nggàra lingu-mika? Da tau njalambu dawua parutangu àmahu la tau njala, hi da-pahuru belinja! 35Àmbu tuna nu bàdi! Nyimi màta kai wànya na njàngana, miaï-ya bàdi na muhumi dàngu kai tuu mahàmu lai nyuda. Nyimi miwua parutangu bàdi, dàngu àmbi monungu-du pangala belinja. Jàka timi nu-maduka, nabokulu-ka napa na wundami, dàngu nyimi napa anana i Ala Hupu Majangga-kaika. Nadu i Ala ba nahàmu la tau manda pingu pamalangungu, dàngu la tau akatu-mbu. 36Màtawa kai mila etimi hama tuna na Amami ba namila etina!” wànanja.
Na patandangu ngera tau hawiangu
(Mat. 7:1-5)
37“Àmbi patandangu-du ngera tau hawiangu, ka àmbu patanda-mbunggai ngera nyimi paraïna i Ala. Àmbi hukungu-du tau hawiangu, ka àmbu nahuku-mbunggai nyimi paraïna i Ala. Jàmanya na tau hawiangu, ka najàma-mbunggai nyimi paraïna i Ala. 38Wuanya na tau hawiangu, ka nawua-mbunggai nyimi paraïna i Ala; napa ingalanya na pawua-nggai na mabundu làndangu na pambàda takaru pano - nokungu ndumami nyimi. Nadu na hukutu na pa-hukutu wàminya na tau hawiangu napa nawa-manyai duna i Ala lai nyimi,” wàna.
39Tunaka nu i Yehu hi napeka-nja yiana na pangerangu, “Jàka tau poki malonda-ya na tau poki haàtu, jiangu-maka duna ba handàka kanabu-da la lambongu. 40Nda ningua tau pa-ajaru marihi-nya na ngguruna. Tàka na tau pa-ajaru na ma-panjàpu-ya na pa-ajaru-na, jia hi nahama-nya na ngguruna.
41Nggikina nyimi hi mi-ita ni biaya na kawita ai la mata angumi, tàka na patengangu la mata wikimi hi ndai pàdanyai? 42Nggiki peku-naka nyimi papanii-nya na angumi, ‘Màla ka ku-àlinya na kawita ai la matamu,’ ba wàminya na angumi, tàka na patengangu la mata wikimi ndai itayai? Ha ma-kapelu! Àli pàkunya bàdi na patengangu la mata wikimi. Hinaka duna hi peku ita hàmu-minya dàngu hi peku àli-minya na kawita ai la mata angumi,” wànanja.
Na pingi ai dàngu na wuana
(Mat. 7:16-20, 12:33-35)
43“Na pingi ai na ma-kamboka nda natuu-a wua nda hàmu. Tuna numbu na pingi ai nda kamboka nda natuu-a wua hàmuna. 44Hareti - hareti na pingi ai patanda weli wuanya. Da ai riipaketu nda datuu-a wua kapilitu, dàngu da lulu tara manu nda tuu-a wua angguru. 45Na tau na mahàmu na-paluhu-ma hangia - hangia mahàmu, nadu na etina ba mbinu wàngu-nanya mahàmu. Na tau na ma-akatu na-paluhu-ma duna ma-akatu, nadu na etina ba mbinu wàngu-nanya ma-akatu. Nadu jàka nggàraya na maluhu welingu la ngaru ba ma-lembaru-duya welingu la eti,” wàna.
Na mawulu uma na mapingu dàngu na mawulu uma na manduba
(Mat. 7:24-27)
46“Nggikina nyimi ‘Miri, Miri’ hi wàmingga, tàka hi ndai wànyai jàka nggàra wànggunggai? 47Nggamu-yaka na pa-pahama wàndanya na tau na mamai lai Nyungga, dàngu na marongu-ya na pulunggu, tàka hi nawa-manyai? – Màta ka ku-paita-nggainya –. 48Nyuna hama tuna na tau ba na-pahada-nya na umana ba naàki pamanjo - njolu-manya, hi na-palata-nya la watu na watu umana. Ba na-làndahu-nyaka iwa dàngu wai luku nuna na uma, nda jia koda-ananya nuna na uma, nadu ba pa-pahadangu la watu uma mahàmu-mayaka. 49Tàka na tau na marongu-ya na pulunggu hàla hi nda nawànya, nyuna beri hama tuna na tau na ma-pahadangu uma dàngu nda ningu lata watu umana. Jàka na-làndahu-nyaka iwa, njoru pa-renggangu-mana-nyaka duna; dàngu ruha halawàla-nanyaka!” wàna.
Currently Selected:
LUKAHU 6: KAM
Highlight
Share
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)