YUHUA 4
4
Ba pahadangu hakambulu dàmbu watu pangàdangu
1Ba la hapapa ndàba-yaka na banjaru, napanii i MIRI lai Yuhua, 2“Pindiwa tau hakambulu madua, haàtu welingu la nimbihu kabihu. 3Wuanja pareta ka dapiti watu welingu la padua Luku Yorundangu, nu pàku la ngia pa-ndolaku-da ba hapajia-ha da ratu. Paràha-nja ka dangàndi-ha da watu la ngia patodu-mi taï la rudungu,” wàna.
4Ka paau-nanjaka paraïna i Yuhua nu da tau hakambulu madua da papindi, 5hi napanii, “Iluawa la padua Luku Yorundangu, la hanggana na Pàti Pa-ràndingu-na i Miri na Alami. Nimbihu-mi lupangu kai piti hau watu welingu lai nu – na danguda hakambulu dàmbu nunjuya na danguda da kabihu la banjaru Ihirailu. 6Napa nuda da watu da-panamu-nya na banjaru Ihirailu nu na pambàda wundana i MIRI. Jàka da-paàrangu da anami la lodu malamiri, nggàraya na ihina ndumami nyimi nuda da watu jàka wàda, 7màtawa kai pekanja ba na-manggàtahu na wai Luku Yorundangu la rehi pala ngàndiya la luku na Pàti Pa-njanjingu-na i Miri. Nuda da watu da-panamu mànunya napa na banjaru Ihirailu nu na mambàda njadi lai yiahu,” wàna.
8Ka pahàra-danyaka na hupu liina i Yuhua paraï da tau hakambulu madua. Dàngu pa-namatu-nya na papeka-na i MIRI lai Yuhua, dapiti hakambulu dàmbu watu welingu la padua Yorundangu – na danguda nunjuya na danguda da kabihu la banjaru Ihirailu – hi dangàndi-ha la pangia kalibaru uma terada. 9La padua-na na Yorundangu-mbu na-panunggulungu hakambulu dàmbu watu i Yuhua, nu pàku la ngia pa-ndolaku-da da ratu ba hapajia-ha da maduku-ya na Pàti Pa-ràndingu. (Nuda da watu ni-manjapa lai nu lundu nàhu.) 10Ba hapajia-ha nuda da ratu, pa-daingu ndolaku-mada la padua-na na Yorundangu, lundu da-pahàra ndàbanya paraï da nuda da tau na hupu liina i MIRI lai nyuda la ngaruna i Yuhua. Yiana na-patangangu-ma la lii kaloka pawua-na i Muha lai Yuhua.
Lu pala parenggangu-danyaka da tau Ihirailu. 11Ba datàka ndàbaka la hapapa, da ratu ba hapajia-ha da maduku-ya na Pàti Pa-ràndingu dalaku mangilu-nja nyuda. 12Nunjuya na hupu liina i Muha, mbàda pala mangilu-danyaka na luku da mini mbeni hanggangu welingu la kabihu Rumbingu, Nggàtu dàngu na beri mandua-na na kabihu Manahi. 13Nggubulu-da 40.000-ya na tau mini ma-kawanangu madàka ba dàngu hawaritu-da la pa-kabungu. Dapala la ma-ndidaru lihina la Yeriku ba la hanggana i MIRI-ha.
14La lodu nu nawunda-ha nuda da matumbu i MIRI na ma-pawiti-nya na banjaru Ihirailu la patembi-ya i Yuhua ba haàtu tau bokulu-ya. La ngala lurina datembi-ya nyuna hama tuna natembi-danya i Muha.
15Halaka nu, i MIRI na-paràha-nya i Yuhua 16ka nawua-nja pareta ba hapajia-ha da ratu da maduku-ya na Pàti Pa-ràndingu ka dadita-ha welingu la Yorundangu. 17Ka pahàra-nanyaka paraïna i Yuhua na hupu liina i MIRI lai nyuna. 18Ba datàka-kika la hingi luku nu da ratu ba hapajia-ha, pakiri belingu-nanyaka pa-lulungu na wai luku hama jiaya welingu hi nambinu lembaru hama tuna la mangilu-na.
19Na banjaru Ihirailu natàka la hapapa Luku Yorundangu la tànggalu hakambulu wulangu kawunga-na. Tunaka nu da-pahadangu uma tera la Ngginggalu la pahunga loduna na Yeriku. 20Lai nu na-panunggulu ninja da hakambulu dàmbu watu i Yuhua da papiti weli dalungu la Yorundangu. 21Hi napanii-nya na banjaru Ihirailu i Yuhua, “Jàka da-paàrangu da anami la lodu malamiri rukuda yiada da watu jàka nggàraya na ihina, 22màtawa kai pekanja nu na matumbu na ngera lida la mamàdu ba dapalaya na Luku Yorundangu da tau Ihirailu. 23Pekanja da anami ba na-pamàdu-nggainya na wai Luku Yorundangu paraïna i MIRI, lundu itàka ndàba nyimi la hapapa, hama tuna ba na-pamàdu nggamanya nyuma na Tehiku Tibuhala, 24màta mbuu ndàba na tau la pinu tana ka napinya nggi tuna bokulu-na na mbihana i MIRI. Nu ba tuna nu tembi-minyaka napa i MIRI na Alami lundu nu - nu,” wàna.
Currently Selected:
YUHUA 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)