YOILU 2
2
Na-panamu-nya na ruku tàkana napa na Loduna i MIRI
1Hapuiwa taropitu, palingu tanda hanggàmaru
la tandula Hiungu, ma-matua ngia pangiangu-na i Ala.
Kandàndaku-wa, ha mangia-nya la Yahunda!
Nadu ba lu tàka-nanya na Loduna i MIRI.
2Na Lodu nuna na-kapàtangu kanjidingu,
nambinu-nya hambongu ma-lamaru.
Danjungu da kabàba kabala
hama karumangu ma-panggàbalungu la palindi.
Na matuna nu ndedima nanjadi,
dàngu lundu nu - nu nda nahili pa-nduangu-apa.
3Hama tuna epi ma-pakehi dàngu ma-pakàrangu
ba da-pamànji-ha da ngara da pa-tondungu-ka.
Ba ndedipa, nuna na tana hamana la Endingu, na wokana i MIRI,
tàka la hambeli-na nu, hama maràda wara manda nggàra matumbu-nya.
Nda ana nggàrama marihi,
nda ninguma ma-hinggilu welingu la pa-kalulukungu-da.
4Na hadada hama njaraha;
hama njara pabera-ha na palaida.
5Ba punduhu - punduhu-da la pinu palindi,
nalingu-da hama kanggeriku kareta pabera-ha
dàngu hama kapàraku epi matunu kuwangu-ha.
Da-pajurungu hama tuna ha-pajuru ma-kaborangu-ha,
da ma-hawaritu pa-ndàharungu la ngia pa-panàhaku.
6Ba danjungu-ka, na-kandàndaku ndàba na tau,
mbuu ndàbana da-tawàla bara dàngu da-làmangu da matada.
7Hama tuna ma-kaborangu ba da-kaluluku,
dàngu da hei la kangeli hama tuna mini mbeni hanggangu.
Da-tàrihu ba da-pajuru hanggangu,
nda da-hiliru jàka ndia nda dawihu-aya na katiku halaku-da.
8Nda dapada - dàhiku-a,
la ànda nduma wiki-mada duda ba dalaku.
Handàka tarànjaku-da ba da-bàriku ngia pa-torungu,
nda pa-ngalangu-a papàtu-ya na pa-jurungu-da.
9Danjungu la paraingu,
hi dapalai la pinu kangeli-na.
Daheiha hu daa la uma - uma;
hama tuna ma-manganga-ha ba dali ningu la katonga.
10Ba dalaku hanggangu na-tandidu na tana,
dàngu dira kanggauhaku-ya na awangu.
Na mata lodu dàngu na wulangu da-kapàta wuruyila,
dàngu da kandunu nda da-handaraku-apa.
11Ndu - nduruna na talia liina i MIRI, ba na-wuangu lii pa-irungu,
la kanguhuru pabera-na.
Kanjupu danguha da tanatara-na!
Kanjupu kapingatu-ha da tanatara da ma-pahàra-nya na pareta-na!
Kanjupu pa-mangàdatungu dàngu ma-wirungu-ya na Loduna i MIRI!
Nda haàtu-a ma-ngalangu pa-padàdungu.
Na warangu ka pahàmu luri
12Napanii i MIRI, “Na nyuna nàhu,
beli weli etingu-wa lai Nyungga,
pa-kariangu puaha hii dàngu hawina.
13Bàriku-ya na etimu, àmbu jia niha da paki-ami,” wàna.
Pambeli belingu-wa la MIRI Alami.
Nyuna na-panamungu dàngu ma-paaïngu-ya.
Nyuna na-lerangu etina dàngu kanjupu mila etiya,
na-mbuhangu pa-jàmangu njala dàngu nda na-mbuhangu
pawunda-ya na hukungu.
14Raï-aiduna i MIRI Alamu na-panjilu-nya,
na bàndukungu-na, hi na-pabundu lànda-nggai kanyuru-na.
Tàka hi peku wotumi tanda maraku
angguru dàngu uhu nggàndumu lai MIRI, na Alami.
15Hapuiwa taropitu la Hiungu, na palindi-na i Ala,
pakada-nya na banjaru ka na-puaha,
pulu pamba bata bokulu-wa.
16Pauhi-nyawa na banjaru nggubulu-na,
dundilu-ya ka na-pamàtungu na banjaru.
Mai karia-njawa da ma-kaweda,
anakeda dàngu ana rarambu.
Jiapa da mabidi pakuru umangu lupangu-ma damaimbu.
Paràha-nja ka damàta-nja da kurungu-da.
17Paràha-nja ba hapajia-ha da ratu ma-lumungu la Umana i MIRI,
ka dahii la njongana na ngia pawotu maraku dàngu na hanamba,
ba dàngu paniida, “Nàmuya na banjaru-mu ou MIRI,
àmbu màtanya na mangumu pa-makia,” ka wàda.
Hi na-paakangu na banjaru hawiangu ba dapanii,
“Ka nggini-yaka na Alada nyuda?” ka àmbu wàda.
I Ala na-pakamboka beliya na tana
18Tàka i MIRI na-hamata-ya na tanana, dàngu namila-nya eti na banjaru-na.
19Tuna nu nahema-naha nyuda,
“Nàhu nyimi mbuu ndàbami kuwua-nggai:
uhu nggàndumu, da angguru, dàngu mina haitungu nduma pangangu,
ka pambihu ndàbakai.
Nda kumàta-anggai ka pawawa-kai
jàka ndia ka nariki-nggai paraï da banjaru.
20Da pamba kabala weli diangu kuwàngga-ha napa,
hawiangu kuweli-nja la maràda wara.
Da juruda da mangia ngaba ku-dàhiku-ha la Tehiku Meti,
da juruda da ma-malamiri ku-jukaru-nja la Tehiku Padua.
Napa dawau da metida.
Ku-patàlaru-ha ba mbàda pajàra-danggai nyimi.
21Àmbi mangàdatu dimi, ha woka, pambaha-ya na etimi;
namuya na ma-bokulu pa-patumbu-nanggau i MIRI!
22Ha dimi banda, àmbu na-hariwatu na kanandingu-mi.
Damuru-ka nàhu da maràda rumba.
Da-ràjingu-ka da wuada da pingi ai,
dira bundungu-ha dawua angguru dàngu da wua kapilitu.
23Ha rayatu la Hiungu hawola-wa!
Hayidi dàngu kayaka-wa!
ruku mbuu ndàbana na hàmu welingu lai MIRI Alami.
La pamunju ruu ai natoma na urangu pawua-nanggai.#La pamunju ruu ai ... nanggai; jàka ndia: nawua-nggai urangu la rehi pamunju ruu ai ma ba namola-du.
Na-papuru-nggai urangu la wula maringu,
dàngu la pa-kameli ruu ai hama tuna welingu.
24Napa ningu belika uhu nggàndumu la ngia pawari puruhu;
da angguru dàngu da mina haitungu dambinu lembaru la ngia papohu.
25Napa kuhilu ndàbaha da runggimi
la nda - ndaungu ngananja kabala da ihi wokami.
Ba Nyungga ma-paràha-nja da kabàba kabala lai nyimi.
26Napa na-patoma na pangami dàngu hi imbihu.
Napa kai pa-mangara-nya i MIRI Alami,
nadu ba nadangu na pa-hangàtarungu pawunda-na lai nyimi.
Na banjaru-nggu nda pa-paakangu wàngu-ayapa!
27Ka pi-dimi-nyaka, ha Ihirailu ba ningga lai nyimi,
dàngu Nyungga MIRI, ba Ala-mingga.
Nda hili ningu hili hau Ala, hinggilu-nggu Nyungga ba didi meha-aka.
Nda pahili pa-makia-ayapa na banjaru-nggu!” wàna.
Na Loduna i MIRI
28“Hàlaka nu napa kuwua padaanya Ngahunggu na tau mbuu ndàbana.
Napa da anami mini kawini da-patàka-nja da lii langunggu;
da ma-kaweda lai nyimi napa da-ngalangu manggadipangu
da bidi mini da bidi kawini pa-wuangu harii mataha.
29La rehi nu ku-papuru-mbunya na Ngahunggu
la matanggu paloku, ka miniya ka kawini-yakai,” wàna.
30Dadangu da pa-hangàtarungu pawunda-nggu napa la awangu dàngu la pinu tana. Napa natumbu na pameti dua wiki, na roka epi dàngu na kutu epi ma-kangutingu. 31Napa na kapàtangu na mata lodu dàngu narara hama wai riaya na wulangu. Nuda mbuu ndàbada napa danjadi ba ndedipa natàka na Loduna i MIRI, na lodu pa-mangàdatungu dàngu pa-maringgingu! 32Tàka na nyuna jàka nggamuya na ma-kamahi-nya na pa-ndulangu-na i MIRI, napa pa-pamara-ya. Napanii i MIRI, “La Yeruhali da tau papindi-nggu napa damara,” wàna.
Currently Selected:
YOILU 2: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
