YERIMIA 9
9
1Ai, kanjupu hàmuya làti jàka hama humuru mambinu wainaya na katiku-nggu,
dàngu da matanggu ka panjiru ma-lulungu mànuya!
Peku hii-ngguka lodu rudungu,
kuhiinja da angu banjaru-nggu da pa-pameti muhu.
2Làti jàka kuhunggu la maràda telangu
ngia patodu-na na tau maningu ngia palua-na!
Ku-dunjaku-nya na banjaru-nggu, hi kupalai lai nàhu
la pamarau welingu lai nyuda.
Nyuda tau kaleka juaha,
hau kapuli tau nda tuturu,
3rimangu mànu-madanya la pa-kambàliku.
La nggubulu tana, nda ningua kuaha-na na ma-deningu,
dàngu na nda patutungu na-pangia ditangu.
Napanii i MIRI,
“Na banjaru-nggu nda ana pànjangu-na pawunda ma-akatu,
nda dapeka-aka ba Ala-dangga Nyungga,” wàna.
4Hanggangu la angu, kawàra rimangu-ma bàdi
da angu dedi hau ina nda palalu waimbuha.
Nadu hama tuna i Yakupu, tuda numbu nyuda,
da-kawàra panyonga dàngu angu dedida.
Nimbihu-na na tau nalaku lai nu - lai nu
pa-wewaru-nya na pa-pulungu dàngu na kambàliku.
5-6Mbuu ndàbada da-kawàra panyonga,
nda ningu mapanii patutungu.
Da ngaruda ndàmangu-mada pa-kambàliku,
nyuda nda da-duluku pa-dunjaku-nja da njalada.
Na pa-janggilu nandutu-ya pa-janggilu,
na panyonga nandutu-ya panyonga
nua naingu-mana duda na wunda-daha nuda,
jukaru ailulu-mada-nyaka i MIRI.
7Jia-duya napanii i MIRI Mahupu-mbiha,
“Napa kukama-nya na banjaru-nggu hama tuna na àmahu
ka peku yahangu da nyuda.
Hili nggàra-yaipa bàdi naràka pawunda-nggu la banjaru-nggu
na mambàda wunda ma-akatu?
8Na panii - paniida lalu pa-hanggàmaru wànguha,
damàka pa-pameti hama pana pa-upahungu.
Na patiki - patiki-da kambàliku juaya.
Na panii - paniida da-malijangu payila eti,
tàka na ma-langatàka batangu-danya hiru duda.
9Nggiki-naika hi nda ku-pahandauni-nya
hukungu ma-pajàngapungu na banjaru tungu nu?
Napa kutunja himbalu-da da paraï rukuda nyuda;
Nyungga, MIRI, mambàda panii!” wàna.
10Kupanii nyungga Yerimia,
“Ka kuhii dàngu ka ku-hawina wàngguka
lumuda da maràda pa-rumbangu dàngu da palindi
da mamàdu marokutu
dàngu nda nali-ayapa tau.
Nda parongu-mbu banda ma-kamua,
da ma-hawurungu dàngu da banda hawiangu dapalai hàlaka,” wànggu.
11Napanii i MIRI,
“Na Yeruhali napa kutuya kanànda
ngia pa-kapàndi-da da ahu rumba.
Da paraingu la Yahunda napa da-malinggitu,
ba pangia panda ngiangu-yaka,” wàna.
12Ku-paàrangu nyungga, “MIRI, nggikina na tana yiana hi puli bianya pambila dàngu pamàdu hama tuna na maràda telangu hi lupa nda ningu maliya? Ningu-ihu matoma na pinguna la pa-jàngapu-ha yiada mbuu ndàbada? Lai nggamuka na pambàda wuamu lii kaloka Nyumu, ka peku pakei pangala-nanya nuna la tau hawiangu?” wànggu.
13Nahema i MIRI, “Nuna hi tuna nu nadu na banjaru-nggu ba nda da-patingi-anjapa da lii papekangu da pambàda wua-nggunja nyuda. Nda da-karadaku-a nyuda lai Nyungga, dàngu nda dabihu pakiku-nya na pareta-nggu. 14Da-malihu katiku-da nyuda dàngu da-marubuku-nja da marapu Mbaàlu hama tuna ba da-papeka-nja boku la mangilu-da. 15Jia-duya nu, patingi-nya jàka nggàraya napa na pawunda-nggu Nyungga, MIRI Mahupu-mbiha, Ala Ihirailu, napa kuwua-nya matumbu ma-paita ka nangangu dàngu muru pameti wàngu ka na-unungu na banjaru-nggu. 16Napa ku-paiha-nja nyuda la honga ba - banjaru na panda tandada nyuda jàka ndia da boku la mangilu-da. Napa ku-pangàndi-nja tanatara ma-nàhaku-ha hi lupa ku-patàlaru ailulu-ha nyuda,” wàna.
Da ma-mandapu-nya na Yeruhali dawara karai pa-ndulangu
17I MIRI Mahupu-mbiha napanii la banjaru-na,
“Panauya jàka nggàraya na manjadi la tana yiana,
dàngu lu paaungu-wa matanggu padudurungu.
Paràha-nja ka damai
pawunda ludu hawina,” wàna.
18Da tau Yahunda dapanii,
“Paràha-nja ka da-parenggangu pa-ludungu
ludu hawina ndumanda nyuta mbuu ndàbanda,
ka peku njànjaru-da da wai mata
ma-pambaha-ha da papunda,” wàda.
19La Hiungu parongu lii mahii,
“Tàlaru-ndanyaka dàngu kanjupu makia-ta.
Na tananda ta-dunjaku-manyaka bàdi,
da umanda taweharu tanyalangu-danyaka,” wàda.
20Kupanii nyungga, “Ronguya na puluna i MIRI,
ha kawini mbuu ndàbami!
Papeka-nja ludu padudurungu da anami kawini,
dàngu da angumi wiliku hawina.
21Na meti natama lika la katonga,
na-paràpangu daa la uma hanganji;
na-nyàkapu-ha da anakeda la ànda
dàngu da bidi tau la mambila.
22Da meti tau da-taneparu la nggi - nggini
hama tuna kangudu hu lua la tana;
hama uhu nggàndumu pambàda muti
hàla hi dunjaku-nja dàngu nda pa-pauhi-anjapa.
Nunaya na hupu liina i MIRI
ba lupangu bàdi ku-bobaru-ya,” wànggu.
23Napanii i MIRI,
“Na tau pingu àmbu na-hamemu wànya rukuna ba na-manggàna,
na tau kapàru rukuna ba na-kapàru,
na tau wulu rukuna ba nawulu.
24Nggamu ma-mbuhangu pa-hamemu wànya jàka nggàraya,
màta ka na-hamemu wànya ba natanda-ka dàngu ba na-jàngapu-ka Nyungga la kanandingu-na;
dàngu ba napinya ba lundu nu - nuya na mbuhangu-nggu
dàngu ba ku-pakapànduku-ya na uku dàngu na mola la pinu tana.
Mbuu ndàbada nuda naliya na etinggu.
Nyungga, MIRI, matiki-ha nuda,” wàna.
25-26Napanii i MIRI, “Napa natàka na rehina ba kuhuku-nya na tau Mehiru, Yahunda, Endumu, Amungu, Muapu, dàngu na ma-mandapu-nya na maràda telangu na ma-kàtahu pa-kababa lunggina.#ma-kàtahu pa-kababa lunggina; da ma-mandapu-nya na maràda telangu dakàli kàtahu pa-kababa-ha da lunggida la patembi wànja da marapu-da; pa-hiringu-ya na tau Ihirailu pakiku-nya na matungu nu. Mbuu ndàbada nyuda pakàri-ha hama tuna na tau Ihirailu, tàka na nyuna nyuda hamanai na tau Ihirailu-kai hama tuna tau manda kàri biaha ba itaya na lurida,” wàna.
Currently Selected:
YERIMIA 9: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
