YERIMIA 8
8
1La rehi nuna da rinada da hanganji dàngu da makata - makatangu pareta la Yahunda, màlambu da rinada da ngara ratu, wunangu, dàngu hawiangu-ka na ma-mandapu la Yeruhali, napa pa-paluhu hàlaha welingu la retida, 2nda pa-pauhingu-aha ka tani belinja, tàka pa-màtangu-maaha hu lua la tana hama tuna na kangudu. Da rinada nuda da tau napa taneparu-danyaka la hangga mata lodu, wulangu dàngu da kandunu da pa-marapu-da, da pambuha-da, da palumu-da, da pa-marubuku-da, dàngu na ngia pakarai-da panaungu. 3Da tau da maluri-kipa welingu la banjaru akatu yiana da pambàda pai - ihanggu la nggi - nggini, da-mbuhangu-pa pameti welingu la paluri. Nyungga, MIRI Mahupu-mbiha, mambàda panii,” wàna.
Na njala dàngu na hukungu
4I MIRI na-palewa-ka papanii-ya na pulungu yiana la banjaru-na, “Jàka nanjoru na tau, napa nahili hadangu beli, dàngu jàka na-njàrangu la ànda, napa nahili tu kabeli. 5Tàka nggikina nyimi, banjaru-nggu, pa-nutakungu bia-minya pa-hiliru dàngu hi mi-dunjaku-ngga Nyungga? Pa-undungu-maminya la marapu-mi, tàka hi ndai bihu pabeli lai Nyungga! 6Patingi pa-hàmungu-manggu-nyaka làti, tàka ndai paniia hama tuna na pawàngu. Nda haàtu-ma lai nyimi ma-pahala eraya na paruku-na na ma-akatu. Nda ningua mapanii, ‘Nggàraya na njalanggu?’ na mawàna. Nyimi mbuu ndàbami ka-tundungu-minya ànda wiki-maami, hama tuna na njara ma-talanjiru daa la pa-kabungu. 7Da nggokaria dapingu-mbu rehida la pabeli, da mbàra, da mbera wurungu dàngu da koka dapi-mbunya na rehi haleli-da pangia-da. Tàka nyimi, banjaru-nggu, ndai tanda-aha da uku da pawua-nggunggai. 8Mitoru mbeni pàku papanii ba tau manggàna-kai nyimi dàngu ba tau pingu ukukai! Tàngaru jàka nggikina da uku - ukunggu ba da-panjilu-nja paraï da mahupu pingu la anggama da manda patutungu! 9Ba hapajia-ha da mamàhi dàngu mapingu la padua-mi nyimi napa pa-pamakia-ha. Na-mbulangu na wulu akada dàngu hi da-handànga. Nda dabihu-apa nyuda pa-kataku-ya na pa-pekangu-nggu; nàhu nggàra manggàna-kiyaka na mani-kinyapa lai nyuda? 10Jia-duyaka napa kuwua-ha da wokada la mangu tanangu hawiangu, dàngu da papaha-da la tau hawiangu. Nyuda mbuu ndàbada, ma-bokulu makudu, himbu-danya utu pàkuda dàngu nda wànguda ma-patutungu. Jiapa da wunangu dàngu da ratumbu da-panyonga tau. 11Da manua-na na banjaru-nggu ba dareki-ya ana manua kudu-aha. ‘Ai, nda nggàra ehia dumu,’ wàda, ‘mbuu ndàbada dahàmu da-mandangu-ka,’ wàda. Làti duna ndia ndoku. 12Ha banjaru-nggu, làti duna mi-makia bàdi bai wundaha mbuu ndàbada da manda palingu! Ba tuna nyimi mitimbi kaba matami dàngu ndai pingu pa-makia. Jia-duya napa nyimi minjoru hama tuna hawiangu na mambàda njoru; njàpu-duna-nyaka na rukumi jàka kuhuku-nggaika.
13Lalu rinjungu-ka pa-pauhi-nya na banjaru-nggu, hama tuna na tau na ma-pauhingu ihi paraï-na. Tàka na banjaru-nggu hama pingi angguru dàngu pingi kapilitu manda wua, màlai da ruuna ba mbàda malaï-daka. Jia-mbuya mangu kiringu hi ku-pahia-nya na tau hangàdangu pamai dàngu pa-kuaha-ya na paraida. Nyungga, MIRI, mambàda panii,” wàna.
14“Nggikina hi nda ana nggàra pawunda-nda?” wàna na banjaru-na i Ala. “Màlawa ka ta-lelingu la parai - paraingu maningu tindingu, màta ka tameti ningu lai nu. I MIRI Alanda mbàda bota-nanyaka ba lupangu ta - tàlaru. Mbàda wua-nandaka muru pameti wàngu la pa-unungu nadu ba tanjala-ka lai Nyuna. 15Kahewa-ana ba ta-monungu mànjaku dàngu rehi hàmu beli, tàka na maninya ba jiaya na pa-janggilu-ma-a. 16Na muhu mbàda ninyaka la paraingu Ndàngu; da kangika njarada parongu-mahaka, dàngu la nggubulu tana mangàdatu-nanyaka. Na muhu maina pa-pakabu hàlaya na tananda, hamanai da paraingu-nda dàngu mbuu ndàbana na ma-mandapu-nya,” wàda.
17“Tanara-ya!” wàna i MIRI. “Nàhu Nyungga pangàndi-nggunggaika kataru la hongami la pakati-kai nyimi, kataru pa-upahungu na panda nggàna lawiti mbiha,” wàna.
I Yerimia na-hawina ba na-patanda-nya na banjaru-na
18Na haruka dàngu na-kahàdiku
na etinggu, na handuka-nggu nda ningu muruna.
19Rongu! La nggubulu tana nawàngu patalia
na kaladaku hiina na banjaru-nggu na ma-paàrangu,
“Nda hilu ninyapa i MIRI la Hiungu?
Nggiyaka nàhu na hanganji-na?” wàda.
Nahema i MIRI, na hanganji-da,
“Nggikina hiu marubuku la marapu - marapu
na manda ningu ndoku lingungu?
Nggiki hiu pahidu-ya na etinggu
bau maraku-nja da marapu?” wàna.
20Na banjaru Ihirailu nawara,
“Na ndau muti dàngu na ndau wandu
nàhu làpahu-nanyaka,
ba tuna nyuta ndedi-mapa tamara,” wàda.
21Na etinggu na-muburu ba nahidu mbotu na banjaru-nggu;
nyungga ku-hawina dàngu nda nangudu na etinggu.
22Nggàraya ihu na ma-pawitingu
hi lupa lundu nàhu ndedi na-mandangu na banjaru-nggu?
Màla la nggubulu Nggiliatu,#Nggiliatu; Jiaya na ngaba tana la pahunga loduna na Luku Yorundangu, na ma-kawulangu rukuna da matumbu lai nu da ma-hàritu ba tàda aiha.
nda ningu-mapa ndotiru dàngu muru?
Currently Selected:
YERIMIA 8: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
