YERIMIA 34

Na lii langu tunguna i Hendikia

1La rehi hadangu-na i Nembukatunehàru hanganji Mbambilu dàngu na kanguhuru pabera-na, da pa-pakipingatu-na paraï da pamba welingu la mbuu ndàbana na banjaru dàngu da nanggara da mambàda nyàku lai nyuna, ba namai pa-hànjalu-ya na Yeruhali dàngu da paraingu la winggiru-na, napanii dàngga nyungga i MIRI. 2Na-palewa-ka Nyuna palua lai Hendikia hanganji Yahunda, la papanii tungu yia, “Nyungga, MIRI Ala Ihirailu, napa pakata-nggunya na paraingu yiana la hanganji Mbambilu tàka hi natunu-ya napa. 3Nda peku luhu-amu nyumu napa, tàka payàpa-kau dàngu pa-pakata-nggau lai nyuna. Mupahàmburu dànya nyumu napa dàngu hiu panii daa wiki-munya, hàla laku-munyaka nyumu napa la Mbambilu. 4Na nyuna patingi-nya na paniinggu yiana na ngeramu nyumu, Hendikia! Nda jia yàmihu-amu napa la pa-hànjalangu, 5tàka mumeti dàngu hàmungu. Dàngu hama tuna ba datunu karanu na rayatu nu ba taninja da boku la mangilu-mu da ma-pareta ba ndedi nyumu, tuna numbu na rayatu ba natunu-nggau karanu nyumu. Napa nyuda da-hawina dàngu dapanii, ‘Hai a-ai! Na hanganji-nda nda ninyapa!’ wàdanggau. Nyungga, MIRI, mambàda panii,” wàna.

6Ka patàka-nggunyaka na lii languna i MIRI lai Hanganji Hendikia la Yeruhali, 7nu ba talànga làndahu-danya nuna na paraingu paraï da pambana na hanganji Mbambilu. Na paraingu Lakihu dàngu na Aheka nu da dàmbu paraingu maningu tindingu-da da ma-torungu ipa la Yahunda, da làndahu-mbunja.

Na huri na ma-palapingu hangganja da tau ata

8I Hanganji Hendikia dàngu na ma-mandapu-nya na Yeruhali datura lii pa-ràndingu la pa-pahàla-ha 9da ata Imbarani-da nyuda, ka miniya ka kawini-yakai ka àmbu haàtu-du welingu la banjaru Ihirailu ma-paata-ya na angu banjaru-na. 10Nggubulu-na na rayatu dàngu ba hapajia-ha da mapawi ngaba la pareta da mambàda pa-ràndingu la pa-pahàla-ha da atada dàngu ba nda dahilu atanja napa, pahàla langata - tàka-madaha da atada. 11Tàka la malamiri panjilu-danyai na kanandingu-da, hi dapiti beliha nuda da atada, dàngu hi da-dàhiku-ha la pahilu ata beli.

12-13Ka paràha-nangga i MIRI, Ala Ihirailu papanii tunggu yia la tau nuda, “Ba jiaya na karia-nggunja da boku la mangilu-mi paluhu welingu la Mehiru dàngu ba ku-pahàla-ha welingu la paata, mbàda tura-ngguka Nyungga pa-ràndingu dàngu nyuda. 14Mbàda panii-mangguka ba pahàla-maha bàdi mbuu ndàbada da ata Imbarani la njàpuna na ndaungu papihu wàna, nu da ata da mambàda nomu mbua ndauda pa-paloku. Tàka da boku la mangilu-mi nda dabihu pa-patingingu jàka ndia parongu jàka nggàraya na papanii-nggu.

15La pira mbua lodu na ma-làpahu mi-panjilu-nyaka nyimi na hurimi tàka hi miwunda-ya na maliya na etinggu. Mi-patunju nyimi mbuu ndàbami la pa-pahàla-ha da ata da angu banjaru-mi, dàngu hi mi-paràndi dàngga Nyungga daa la Umanggu. 16-19Da mapawai ngaba la pareta Yahunda dàngu Yeruhali anguda ba hapajia-ha da panggawi uma hanganji, da ratu dàngu mbuu ndàbada da ma-hamata-ya na tanami mbàda pa-karàngi-danyaka nuna na pa-ràndingu ba wàngu parupu hapi, hi bika padua-ya, hi laku ningu la njongada nuda da madua bikada. Tàka, hàlaka nu hili panjilu-minyai na kanandingu-mi hi mi-paaka-ngga Nyungga. Da ata da pambàda pahàla-mi pa-jàngapu-nya na pambuha-da, hili piti-minjai nyimi tàka hi mihàni-ha la pahili ata beli. Jia-duyaka nu, Nyungga, MIRI, hi kupanii ba pangga-minyaka na pareta-nggu, dàngu ndai karadaku-anja da pawàngu, nadu ba ndai pahàla-ha da angumi pa-banjaru Ihirailu. Na, nàhu, màta ka kupuli-nggai la pawàngu etimi: ka wàngu etimi pa-yàmihu la pabera, jàka ndia paraï panyaki pa-nggàbalungu, jàka ndia paraï pa-rimbangu. Napa ku-palua-nggai lima hama tuna bai paluangu limami la hapi na parupu-mi. Napa ku-pawiti-nya ka na-mangginggitu mbuu ndàbana na banjaru la pinu tana ba daita-ya na pawunda-nggu lai nyimi. 20Napa ku-pakata-nggai la lima muhu da ma-rinjungu pa-pameti-kai. Napa da metimi nanganja ma-hawurungu dàngu banda bohu. 21I Hendikia hanganji Yahunda dàngu ba hapajia-ha da mapawai ngaba la pareta ku-pakata-nja napa la lima tau da ma-rinjungu pa-pameti-ha. Napa ku-pakata-nja la tanatara Mbambilu da ma-dunjaku-nggai nàhu. 22Napa ku-pawolakungu lii pa-irungu ka dabeli-ha la paraingu yiana, hi da làndahu-nya, hi dawàhi-ya, dàngu hi datunu-ya. Da paraingu Yahunda napa ku-panjadi-ha hama tuna na maràda telangu panda ngiangu tau. Nyungga, MIRI, mambàda panii,” wàna.

Currently Selected:

YERIMIA 34: KAM

Highlight

Copy

Compare