YERIMIA 33
33
Na hili hau ràndi na pa-monungu
1Ba jia-yapa na pàtu dangga nyungga la talora, ku-ngalangu hili haui lii langu welingu lai MIRI 2na mawulu-ya na pinu tana dàngu na ma-unggulu-ya hi na na-bànjalu-ya la pangia-na. Tuna yia na paniina, 3“Warawa lai Nyungga, napa ka kuhema; napa kupeka-nggauha nyumu da ma-manandangu dàngu da pa-bànarungu da pandedi pimu. 4Na uma hanganji Yahunda dàngu da uma la paraingu Yeruhali pa-nyànggaru-haka ka pa-kapingatu wànja da ngia pa-torungu ba hangganya na pa-nggupulu-na dàngu na-tàndalungu-na na muhu. Tàka na nyuna, Nyungga, MIRI, Ala Ihirailu, kupanii ba, 5parahumangu-maana jàka lawanya na tau Mbambilu, nadu na matuna nu napa jia-yaka hi nambinu na paraingu wàngu metida da tau pa-pameti-nggu la dalu hàngganggu dàngu karaü etinggu lai nyuda. Nda kubihu-apa Nyungga paita-ya na paraingu yiana, nadu da tauna ba dawunda-ka ma-akatu. 6Na nyuna napa ku-palànyapu beliya na hadana na paraingu yiana dàngu na ma-mandapu-nya; napa nyuda da-àtalu beli. Napa Nyungga kuwua-nja mànjaku dàngu hi kanjupu mandanguha. 7Na Yahunda dàngu Ihirailu napa ku-palua-ya la talu meha hama tuna àmangu tàka hi jia beliha ba banjaru-ngguha nyuda. 8Napa ku-payaha-nja welingu la nja - njalada da pawunda-da hanggangu lai Nyungga; da njalada dàngu katadaku-da napa kujàma-nja. 9Na Yeruhali jia-yaka napa na pa-hawola wànggu dàngu na pa-hamemu wànggu. Mbuu ndàbana na banjaru la pinu tana napa da-mangàdatu dàngu da-kandàndaku dàngu datembi-ka Nyungga, jàka darongu-ya rukuna mbuu ndàbana na mahàmu na pawunda-nggu la ma-mandapu-nya na Yeruhali, dàngu rukuna na mbokaru na pawua-nggunya nuna na paraingu,” wàna.
10Napanii i MIRI, “Na panii tau, na pangiangu yiana hama maràda telangu-ya, nda ningu tau jàka ndia banda ma-ngiangu lai nu. Na paniida nyuda ma-tubangu-maya, nadu da paraingu Yahunda dàngu da ànda la Yeruhali ba mbàda nda nggàrapa maningu-da mbuu ndàbada; nda ningu tau dàngu banda ma-ngiangu lai nu. 11Ba tuna la pa-ngiangu nuda napa pahilu rongu-yaka na hanggela hawola hamanai na remi lii lalei lii mangoma. Napa pahilu rongu-yaka na lududa da tau da mangàndi kameti maraku pa-malangungu la Umanggu. Napa panii-danyaka,
‘Pamalangu-nyawa i MIRI Mahupu-mbiha,
nadu ba nahàmu dàngu na pa-namungu-na na-palupangu,’ wàda.
Na tana yiana napa ku-pambokaru-ya hama tuna la wungana. Nyungga, MIRI, mambàda panii,” wàna.
12I MIRI Mahupu-mbiha napanii, “Yiana na tana dàngu da paraingu-na na mahama tuna maràda telangu-ya ba nda nangia-nya tau dàngu banda. Na nyuna jiapa-kai ba tuna, napa la lodu malamiri hili ninguka maràda - maràda ma-parumbangu ngia papawa-nanja da mbimbina na tau. 13La parai - paraingu la ngaba ma-palindingu, la kambu ma-palindingu, la ngaba Yahunda luru, dàngu la ngaba Mbanyamingu hamanai la ndeha - ndeha winggiru-na la Yeruhali, dàngu la parai - paraingu Yahunda, da ma-pawangu hilu diha-danjaka da mbimbida. Nyungga, MIRI, mambàda panii,” wàna.
14Napanii i MIRI, “Napa natàka na rehina ku-patutu-nya Nyungga na paràndi-nggu na pambàda turanggu dàngu Ihirailu lupa Yahunda. 15La rehi nuna na haàtu na mamola welingu la wàla wuana i Ndautu napa kupindi-ya la pa-hanganji. Na hanganji nuna jia-yaka na mawàngu mamola dàngu ma-tubangu la nggubulu tana. 16Na tau Yahunda dàngu na ma-mandapu la Yeruhali napa pa-pamara-ha hi daluri mandangu. Na paraingu Yeruhali napa pa-patamungu-ya ‘I MIRI Ma-pamàna-nda’. 17Nyungga, MIRI, ku-paràndingu ba ningu mànuma napa haàtu welingu la wàla wuana i Ndautu ma-hanganji la Ihirailu; 18ba ningu manuma napa ratu - ratu welingu la kabihu Lewi malumu-ngga Nyungga dàngu mawotu kameti maraku banda, uhu nggàndumu, dàngu maraku patunu,” wàna.
19I MIRI napanii-ngga nyungga, 20“Nyungga ku-jàritu-yaka na pa-ràndingu dàngu na lodu na rudungu ka natàka mànu la rehina; na pa-ràndingu nuna nda peku-ana la pa-pambula-nya. 21Tuna numbuka ba ku-jàritu-ya na pa-ràndingu dàngu na atanggu i Ndautu, nu welingu la wàla wuana napa ba ningu mànuma haàtu ma-hanganji; dàngu ku-jàritu-yaka na pa-ràndingu dàngu da ratu wàla wuana i Lewi, ba naingu-mana napa nalumu-dangga Nyungga. Nuda da pa-ràndingu nda peku-ana la pa-podahu-ha. 22Napa kubonja-ha da wàla wuana na atanggu i Ndautu dàngu da ratu kabihu Lewi hi lupa na danguda hama tuna wara la hingi tehiku dàngu kandunu la awangu da panda peku diha,” wàna.
23I MIRI napanii-ngga nyungga, 24“Màla mu-patingi-nyaka nyumu jàka nggàra wàna na tau hanggangu la Ihirailu dàngu Yahunda? Dapanii ba mbàda wàru-nggunjaka da madua banjaru-da nuda da pambàda pindinggu. Tuna nuduka hi dailu-ha pa-màrahu na banjaru-nggu, dàngu ba nda dareki-ahapa ba hau banjaru-ha. 25Tàka hama tuna Nyungga, MIRI, ba mbàda tungguka hau pa-ràndingu dàngu na lodu na rudungu, dàngu ba kutuya na uku na ma-ulinya na awangu dàngu na tana, 26tuna numbu Nyungga napa ba ku-padaingu pa-pamàndu-nya na pa-ràndingu-nggu la wàla wuana i Yakupu dàngu na atanggu i Ndautu. Na haàtu welingu la wàla wuana i Ndautu napa kupindi-ya la pa-pareta-ya na wàla wuana i Ambarahàmu, i Ihàku dàngu i Yakupu. Nyungga napa kumila-nya eti na banjaru-nggu, dàngu hi ka-pambokaru beliha,” wàna.
Currently Selected:
YERIMIA 33: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
