YERIMIA 22

Na panaungu-na i Yerimia nduma kuru umana na hanganji Yahunda

1-2I MIRI na-palewa-ka palua la uma hanganji Yahunda, wàla wuana i Ndautu, la pa-patàka-nya na lii pa-patàkangu welingu lai MIRI la hanganji, dàngu ba hapajia-ha da panggawi-na, dàngu na ma-mandapu-nya na Yeruhali. Yiada-haka da papanii-na i MIRI lai nyuda, 3“Miwàngu-wa mamola dàngu ma-tutungu. Pahàla-ha da tau pa-lamuji welingu la kuaha tau ma-lamuji-ha. Àmbi kapidihu-ha jàka ndia àmbi wunda ma-akatu la tau hangàdangu, da ana mamila, jàka ndia da kawini meti lei. Àmbi pameti-du tau manda njala la pa-ngiangu yiana. 4Jàka weli eti langatàka-mi pawànja da pareta-nggu, napa da hanganji da ma-pareta hama tuna i Ndautu datama-nja da pindu bokulu-na yiana na uma hanganji. Nyuda dàngu ba hapajia-ha da panggawi dàngu na rayatu napa da-kaliti kareta dàngu njara. 5Tàka jàka ndai karadaku-nja da pareta-nggu, napa Nyungga ku-harangu ba nanjadi-ya kanànda napa yiana na uma hanganji. Nyungga, MIRI, mambàda panii.

6Lai Nyungga duku na uma hanganji Yahunda manandangu nda ukuya, hama manandanguna na tana Nggiliatu dàngu da palindi la Limbanongu; tàka da pa-ngiangu nuda napa kutuha maràda telangu na panda ngia tau. 7Napa ku-pangàndingu tau la pa-palàjaru-ya. Napa nyuda dangàndi kataka, dàngu hi da-panjoru-ha da kambaniru-na da ma-manandangu da pa-pandoi welingu la ai kajuu Limbanongu. Hàla hi da-patàda-nja daa la epi.

8Hàlaka nu dangu tau hangàdangu napa da mali lai nu hi da-paàrangu dàngga anguda, jàka nggikina Nyungga, MIRI, hi mbàda tunggunya nu na paraingu manandangu. 9Hàla napa nahema na tau, nuna mbuu ndàbana hi tuna nu jiaya bai kanduli-nya na pa-ràndingu-mi dàngu Nyungga, Alami, dàngu ba mbàda marubuku-minja dàngu lumu-minja da marapu hawiangu,” wàna.

Na lii welingu lai Yerimia ngerana i Yuawàhu

10Ha tau Yahunda, àmbi handuka-du

la metina i Hanganji Yuhia.

Hiinyaka i Yuawàhu anana

nadu nyuna ba pangàndi-yaka dàngu ba nda nahilu beli-apa.

Na tana ngia padedi-na ba nda nahilu ita-ayapa.

11Jàka jiaya i Yuawàhu, anana i Yuhia, na ma-hanganji la Yahunda hiluya na amana, tuna yia napanii-na i MIRI, “Mbàda laku-naka duna welingu lai yiahu, nda nahilu beli-apa. 12Napa nyuna nameti la ngia pa-wàrungu-ya, dàngu nda nahilu ita-ayapa na tana yiana,” wàna.

Na lii welingu lai Yerimia ngerana i Yuyakimu

13Ura pàku-ana-nyaka na tau na mapahadangu umana dàngu nda wànguna mamola, dàngu ba na-palera-nya dàngu nda patutungu-na. Ura pàku-ana-nyaka nyuna na-maparàhangu tau paràma dàngu nda ningu wundangu. 14Ura-mbunaka na tau na mapanii, “Napa ku-pahadangu uma hanganji bokulu dàngu da kurungu-na da ma-lerangu la handàdiku dita,” wàna. Hàla na uma hanganji nuna na-pandoi-nya katonga patungu halinggi ai kajuu Limbanongu, hi naperi-nya apihu rara. 15-16Patingingu dumu, ha Hanganji Yuyakimu! Nyumu jàka muwulu uma hanganji wàngu ai kajuu Limbanongu marihi manandangu, jia-yaka nu na tandana nyumu ba hanganji marihi hàmukau welingu la hanganji - hanganji hawiangu? Kamangu kau pangàda-nya na amamu: Nyuna napàda-nya na luri mànjaku dàngu ba nangala hàlanja da pa-paloku-naka, nadu nyuna ba naingu pa-tànjingu-na dàngu patutungu-na hamanai ba natimba-nya na palakara tau mila ba nawàngu mamola. Tuna numaka bàdi duna na pawàna na tau na matanda-ya i MIRI. 17Tàka nyumu, Yuyakimu, hau-kau. Nyumu jiaya la pahimbu utu wiki-maamu. Nyumu mu-pameti-ya na tau nda njala, dàngu bau roduku-nya na rayatu-mu wàngu mbana eti.

18Kirina nuna na ngerana i Yuyakimu hanganji Yahunda, anana i Yuhia, tuna yia na paniina i MIRI, “Na metina nda pahii-anya; nda ningu mapanii, ‘Hai aai, na angunggu, ha aai,’ mawàna. Nda ningu ma-handuka jàka ndia mawara, ‘Na ana tau-aka duna i tamu umbu hanganji!’ na mawàna. 19I Yuyakimu napa pa-ruruhu-ya dàngu hi kawuka-nya la hambeli pindu bokulu Yeruhali, hama tuna ba tudanja nu tau da meti kalandai,” wàna.

Na lii ngerana na urana na Yeruhali

20Napanii i MIRI, “Ha ma-mandapu-nya na Yeruhali, lakuwa la Limbanongu dàngu la Mbahàngu, dàngu kaladaku-wa lai nu. Kanjaïku-wa la palindi Muapu, nadu ba mbàda kàku-daka mbuu ndàbada da angu pakuhingu-mi. 21Nyungga mbàda panii-manggu-nggaika ba ndedi nggàra ehimi, tàka nyimi ndai bihu pa-patingingu. Maa ba tuna numaka na nggoda nggàduku-mi weli àmangu lundu nàhu; ndai handàkangu-ma dimi pabihu pa-karadaku lai Nyungga. 22Tuna nuduka, hi da-molungu napa ba hapajia-ha da liku urumi hama tuna pa-jiliru ngilu. Da angu pa-kuhingu-mi napa pa-palaüngu-ha la pa-tanawangu, dàngu na paraingu-mi napa pa-pawawa-ya dàngu pa-pamakia-ya rukuna mbuu ndàbada da akatu-mi. 23Nyimi mandapu mànjaku-minyaka ba na-winggiru-nggai kambaniru kajuu Limbanongu, tàka napa jàka nanggàna-kai pahidu wàngu, mayila-minyaka hama tuna na kawini na ma-habola,” wàna.

Na hukungu-na i Ala lai Yuyakingu

24I MIRI napanii-nya i Hanganji Yuyakingu, anana i Yuyakimu hanganji Yahunda, “Lumunggu Nyungga, Ala maluri, Nyungga ku-paloha-nya nu nyumu ka jiapa-kai beri tawuru matarai-kau lai Nyungga la lima kawana-nggu, ba tuna nyumu napa ku-butuhu-kau 25dàngu ku-pakata-nggau la tau da pa-mangàdatu-mu dàngu da ma-mbuhangu pa-pameti-kau. Nyumu napa ku-pakata-nggau lai Nembukatunehàru hanganji Mbambilu, dàngu tau la hanggana. 26Nyumu dàngu na inamu napa kuwàngga-kai dàngu hi kuwàru-nggai la paraingu na tana nda ngia padedi-mu, dàngu napa mimeti lai nu. 27Lalu mbana rinju-aminya napa na paraingu yiana, tàka nda jia hili beli-amipa,” wàna.

28Hi kupanii nyungga Yerimia, “Màla mbàda hama wuru mbera pa-wàrungu-yaka ihu i Hanganji Yuyakingu dàngu ba nda pahilu mbuhanya? Nuna-yaka ihu na kiringu tàka hi wànggaya nyuna dàngu da anana tàka hi wàrunja la paraingu na mahauya lai nyuda?” wànggu.

29Hai aai na parainggu, patingi-nya jàka nggàra wàna i MIRI, 30“Na tau nuna pa-kawuku-mayaka la pa-mbulangu da anana dàngu ba nuangu-mana pa-palorutu la lurina. Welingu la wàla wuana napa nda ninguma ma-ngalangu la pa-pareta la Yahunda ba hanganji wàlana i Ndautu. Nyungga, MIRI, mambàda panii,” wàna.

Currently Selected:

YERIMIA 22: KAM

Highlight

Copy

Compare