YERIMIA 21
21
Na nyuraya na kàkuna la Yeruhali
1I Hendikia hanganji Yahunda na-palewa-ya lai nyungga i Ratu Pàhuru anana i Màlakia dàngu i Ratu Hapanya anana i Maaheya. Na-palewa-ha pa-patàka-ngganya yiana na pakarai-na, 2“Karaiwa lai MIRI lii pa-irungu ndumanda nyuta, nadu i Nembukatunehàru hanganji Mbambilu dàngu da pambana ba nggupulu-danyaka na paraingu-nda. Raï aï duna i MIRI na-patumbu pa-hangàtarungu napa ndumanda nyuta, ka na-dàhiku-ya i Nembukatunehàru dàngu da pambana la pa-kandulingu beli,” wàna.
3Hàla i MIRI hi napanii-ngga nyungga, ka paràha-nggunjaka nuda da tau papalewa 4papeka-nya i Hendikia ba tuna yia na paniina i MIRI, Ala Ihirailu, “Ha Hendikia, napa Nyungga ku-pakàku-ha da pambamu da ma-talànga pabera lawanya na hanganji Mbambilu dàngu pambana. Da madàka-da da tanatara-mu napa ku-pabundu-nja la padua paraingu. 5Nyungga wikima duku mabera-kai nyimi ba kuwàngu àtalu kapàru-nggu dàngu ba kuwàngu hàngganggu na mahambu - mbumbatu. 6Na ma-mandapu-nya yiana na paraingu ku-pameti-ha napa; ka tauya ka banda-yakai napa dameti wàngu hidu pa-nggàbalungu manda najaru. 7Nyumu dàngu ba hapajia-ha da panggawi-mu lupa da tau da mamara la pabera, rimbangu dàngu hidu pa-nggàbalungu, mbuu ndàbada napa kumàta-nja ka nayàpa-ha paraïna i Hanganji Nembukatunehàru dàngu paraï da muhu - muhumu da ma-mbuhangu pa-pameti-kau. Napa i Nembukatunehàru na-pameti hàlakai dàngu nda na-pajàmangu dàngu nda napaaï. Nyungga, MIRI, mambàda panii,” wàna.
8Hàla i MIRI na-palewa-ka papanii tunggu yia la banjaru-na, “Patingingu! Nyungga, MIRI, kuwua-nggai dua ngia kai pindi: na ànda na ma-hanggangu la paluri wàngu, jàka ndia na ànda na ma-hanggangu la pameti wàngu. 9Nimbihu-na na tau na ma-engangu la paraingu napa nameti wàngu pabera, rimbangu jàka ndia hidu pa-nggàbalungu. Tàka nyuda da maluhu pa-pajàmangu wikida la tau Mbambilu na ma-nàhaku-ya na paraingu yiana, napa namara dàngu nda pa-pameti-aya. 10Mbàda bota-nggunyaka Nyungga la pa-palàjaru-ya yiana na paraingu, dàngu nda pamila-anya eti. Na paraingu yiana napa pa-pakatangu-ya la hanganji Mbambilu; napa natunu-ya lundu nanjàpu ailulu. Nyungga, MIRI, mambàda panii,” wàna.
Na hukungu-da da kuru uma hanganji Yahunda
11-12I MIRI na-palewa-ka pa-patàka-nya na lii pa-patàkangu yiana la kuru uma hanganji Yahunda, wàla wuana i Ndautu: “Patingingu jàka nggàraya na papanii-nggu Nyungga, MIRI. Pamukarungu ka wànya na mamola nimbihu lodu. Pahàla-ya na tau pa-lamuji welingu la kuaha tau ma-lamuji-ya. Jàka ndia, napa na akatu na pawunda-mu jiaya-ka na ma-pakandula-nya na hàngganggu hama tuna na epi na panda peku pàda,” wàna.
13Tunaka nu i MIRI napanii-nya na Yeruhali, “Ha Yeruhali! Na pangia-mu najangga-pa welingu la lo - lolangu la winggiru-mu. Nyumu hama tandula watukau na ma-kahuluku la maràda linjaku, ba tuna napa Nyungga kulawa-nggau. Na paniimu nyumu, nda ningua haàtu mamàka pa-làndahu-kau jàka ndia ma-tumbuku-ha da tindi - tindingu-mu, 14ba tuna napa Nyungga kuhuku-nggau rukuna na paraï rukumu. Na uma hanganji-mu napa kutunu-ya, dàngu mbuu ndàbada da maninja la winggiru-na napa da-mutungu-mbu. Nyungga, MIRI, mambàda panii,” wàna.
Currently Selected:
YERIMIA 21: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
