YERIMIA 13
13
Na laü kababa tera linangu
1I MIRI na-paràha-ngga palua pakei laü kababa tera linangu, hi kuhauya; na nyuna nda ukua pahàbu-ya la wai. 2Ka lua-dunggu-nyaka pakeiya nuna na laü kababa hi kuhauya. 3Tunaka nu i MIRI nahili paningga nyungga, 4“Luawa la Luku Epuràtu, dàngu kau wininya nuna na laü la panga - panga watu,” wànangga. 5Nunjuya na pareta-na i MIRI lua-dunggu-nyaka pa-kawini-nya na laü kababa nuna la lihi Luku Epuràtu.
6Ndedi pira mandaina la rehi malamiri nahili paràha-ngga i MIRI palua la Luku Epuràtu papiti-ya na laü kababa nuna. 7Ka lua-nggunyaka, hi ku-paluhu-ya nuna na laü kababa welingu la ngia pawini-nggunya. Tàka mbàda mobu-naka duna nuna na laü nda hili ningu ndoku-apa linguna.
8Hàla i MIRI hili panii dànangga-ka, 9“Tuna nuduka na pawàngu ba ku-paluangu limanggu la tau Yahunda dàngu na ma-mandapu-nya na Yeruhali. Napa Nyungga ku-palàjaru-ya na ngambada na manda ningu hamangu. 10Na banjaru akatu yiana lalu mbana malihu katiku-ya dàngu nda dabihu pa-karadaku lai Nyungga. Nyuda dalumu-nja dàngu da-marubuku-nja da marapu hawiangu. Nuna-duya na kiringu napa hi hama laü kababa-ha nyuda na manda ningu ndoku lingungu. 11Hama tuna na laü kababa ba pahondu jàritu-ya bàdi la bànggi tau mapaki-ya, tuna nuduka na pawuku-nggu na banjaru Ihirailu dàngu Yahunda ba pahondu jàritu-ya lai Nyungga. Wàngu patuna nuduka nyuda hi banjaru-ngguha nyuda, hi kiri pa-wotungu dàngu patembi-ya na tamunggu. Tàka nyuda nda dabihu patundu-ngga Nyungga,” wàna.
Na kihi kanai angguru
12I MIRI Ala napanii dàngga nyungga, “Ha Yerimia, patàka-nya na lii langunggu la tau Ihirailu ba lupangu-ma ka pinu wànja angguru nimbihu-da da kihi kanai angguru. Napa dahema nyuda, ‘Nggikina hi nda mapinya nyuma nu da nimbihu kihi ba pinu wànja angguru bàdi?’ wàda. 13Pekanja nyuda, da tau la tana yiana, da hanganji wàlana i Ndautu, da ngara ratu, wunangu dàngu nggubulu-na na ma-mandapu-nya na Yeruhali napa ku-paihi pinu wànja angguru ka lupa da-maüku. 14Hàla napa hi patoka-nja nyuda dàngga anguda. Makaweda bidi tau napa tunggunja numa mbuu ndàbada, nda pa-jàmangu-aha. Nyuda napa ku-palàjaru-ha nda paaï-ahapa dàngu nda pamila-anjapa eti. Nyungga, MIRI, mambàda panii,” wàna.
Na pa-panamu hahana i Yerimia rukuna na ngamba
15Ha banjaru Ihirailu, i MIRI na-paniika!
Àmbi ngamba, patingi-nya Nyuna!
16Pa-bokulu-ya bàdi i MIRI Alamu
ba ndedi na-patàka-nya na kapàtangu,
dàngu ba ndedi da-hakimbatu da wihimu la ma-palindingu,
dàngu na hambila na pamonu-mu
ba ndedi na-pambeli-nya pa-kanjidingu.
17Jàka ndai bihu pa-patingingu,
napa hii kangunguhu-nggunyaka duku.
Wàngu mila mumuhu-na na etinggu
ba kuhiinya na ngambamu.
Da wai matanggu napa da-njànjaru
nadu na banjaru-na i MIRI pa-dundilu-ha ba pa-tanawangu-ha.
18Napanii-ngga i MIRI, “Paràha-nya na hanganji dàngu na tamu ràmbu ina ka dapuru welingu la kanjàka hanganji-da, nadu na tubuku manandangu ba mbàda kanabu-naka welingu la katiku-na. 19Da paraingu Yahunda mbara luru mbàda nggupulu-danjaka, nda ningu mamàka pa-pòluhu-ya nuna na nggupuluha. Mbuu ndàbada da tau Yahunda pa-palelingu-haka la ngia pa-wàrungu,” wàna.
20I MIRI na-paniinya na ma-mandapu-nya na Yeruhali, “Eti wànyawa! Nàmu-njaka weli diangu da muhumi! Nggini-haka da tau da-pakatindi-mi làti dàngu da-pambana hamela wàmi. 21Nggàra wàmika jàka nyuda-ma-aika da angunda ba wàmi làti da matalu-kai dàngu da ma-kuaha-kai? Jiangu-maka duna bai pàdangu makatiu hama tuna na kawini paana. 22Talànga wanguna nyimi mi-paàrangu, nggikina ihu nuna mbuu ndàbana hi na-handauni-ya na wikimi nyimi, nggikina da pakimi hi bàriku-ha dàngu hi rumbaku-kai. Kai pinya nuna hi tuna nu nadu ba lalu mbana bokulu-da da njalami. 23Peku-nakaka na tau mitingu ka na-panjilu-nya na hada manula-na, jàka ndia na meu rumba ka na-pamuna-nya na mbàlangu-na? Jiangu-ma ba ndia! Tuna numbu nyimi ma-ndàmangu patuu ma-akatu ba nda pekumi patuu mahàmu. 24Napa Nyungga ku-paiha - paiha-nggai hama tuna na uta na pa-hawuru ngàndi ngilu welingu la maràda telangu. 25Nuna ura-mami-nyaka na pambàda kawuku-nggu nadu ba mbàda maromba-minggaka, dàngu ba mbàda wai-minjaka da marapu. 26Napa Nyungga wikima duku ma-bàriku-ha da paki la ihimi ka peku kalulu-mi dàngu kai makia. 27Kuita-makaika bai wundaha da hangia - hangia da pa-paumbi-nggu. Kuita-makaika bai kehanja la palindi dàngu la woka da marapu hawiangu, hama tuna na haàtu tau mini na ma-katoba karia-nya na papaha tau hawiangu jàka ndia hama tuna mini njara na ma-itirungu bai njara. Ha ma-mandapu-nya na Yeruhali, ura dedi-minyaka! Pirangu-ka napa bai pahàla welingu la ma-akatu mbuu ndàbana?” wàna.
Currently Selected:
YERIMIA 13: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
