YAKOMBU 1
1
1Angu dedi banjaru-na i Ala hapaela-mi ma-tanyàlangu la pinu tana! Malangu-mi wànggu nyungga, Yakombu, atana i Ala dàngu atana i Miri Yehu Karitu.
Na pawai dàngu na manggàna
2Angu dedi hapaela-mi! Jàka era hunggumi màtu - màtu ma-pakamangu, màtawa kai pinya nuna ba wangu-manaka. 3Nadu nyimi kai pinya, jàka mi-padaingu la papawai lai Miri, nu bai hunggu ma-pakamangu, la njàpuna jia-duyaka hi mi-pajàrungu. 4Manggangu ka pekuna na pajàrungu etimi ka nabonja pangalangu ka lupa nalundu pa-langatàkangu dàngu ba nda ningu ma-yàmihu la hangia-hangia. 5Jàka ningu la hongami na manda tika pa-manggàna, màtawa ka nakarai lai Ala, napa nawua-manya duna manggàna paraïna i Ala; nadu i Ala ba na-màjangu dàngu namila eti-mana duna pawua juanya na tau haàtu-haàtu. 6Na nyuna na tau na makarai napawai bàdi; àmbu nali luadu na etina. Nadu na tau na mali lua etina, ngera hama tuna na ngalingu la tehiku na pa-puputu ngilu palua pamaingu. 7-8Na tau na matuna nu nda na-kadeningu-a na kanandingu-na; nyuna nda peku-ana la papiti botangu ngga - nggàra la hangia - hangia la mbuu ndàbana na papaloku-na. Na matuna nu, àmbu na-monungu-du pa-ngalangu ngga-nggàra welingu lai Miri.
Na mila dàngu na wulu
9Na tau Karitu na mamila màtawa ka na-nggaüru na etina jàka na-pajangga-ya paraïna i Ala. 10Tàka na tau Karitu na mawulu màta ka na-nggaüru-mbu na etina, jàka na-pawawa-ya paraïna i Ala. Nadu napa na tau wulu ba na-maromba hama tuna na wàla rumba. 11Ba nahunga-ka na lodu dàngu mbana hàritu-na, ka malaï-nanyaka duna na rumba ka lupa munju-nanyaka na wàlana dàngu mbulangu-nanyaka na manandangu-na. Tuna numbu na tau wulu; napa làjaru-nanyaka nu ba talànga paloku-nanya na paraï rukuna.
Na ma-pakamangu dàngu na ma-parunda
12Oha pàku-anaka na tau na ma-pajàrungu ba talànga hungguna ma-pakamangu. Nadu ba nahàla-ka pa-pajàrungu la ma-pakamangu, napa ba ngalangu-nanyaka wundana, nu na luri na pambàda ràndina i Ala la mbuu ndàbana na tau na mambuha-nya i Ala. 13Jàka ningu haàtu panggàna ma-pakamangu tungu nu, “Yiana na ma-pakamangu ma-pawelingu lai Alaya”, àmbu wànadu, nadu i Ala duna nda peku-ana ka nakama-nya ma-akatu, dàngu nyuna nda na-kamangu-mbu haàtu tau. 14Tàka na tau hi nanggàna-ya pa-kamangu, jiaya jàka nairu ngàndiya dàngu jàka nanggàna-ya itirungu wikina na ma-akatu. 15Tunaka nu, na itirungu-na na ma-akatu jàka natundu-nyaka, ka dedi-nanyaka na njala; dàngu nuna na njala jàka na-matua-ka, na injana jiaya na meti.
16Àmbu na-panyonga-dukai angu dedi pa-mbuhanggu! 17Nimbihu-na na pa-wuangu na mahàmu dàngu na pa-ngalangu na ma-lundungu ma-pawelingu la awangu-ya, na pa-papuru-na paraïna i Ala, na ma-padika-nja da maharii la awangu. Nyuna Ala manda pa-njilungu-ya, dàngu nda na-patikingu hawutu-mbu ma-kapàtangu. 18Ruku weli eti wikina nyunama hi nawulu-ta nyuta anana rukuna na liina na ma-deningu. Hi tuna nu ka pekuna nyuta ba ta-ngalangu pa-ngiangu mangia ngaba la honga mbuu ndàbana na pa-padikana.
Na pa-tingingu dàngu na paloku
19Hamata pahàmu-manya angu dedi pa-mbuhangu hapaelami! Haàtu-haàtu na tau màta ka narengga la pa-patingingu, tàka ka na-endapu la kareuku dàngu ka na-endapu la pambeni. 20Na tau na mambeni nda namàka-a pa-paloku mahàmu, na pahàmu wàna na etina i Ala. 21Jiaya nu wàru-njawa nimbihu-da da pa-ndàmangu da ma-iraku dàngu da ma-akatu. Kataku-yawa dàngu pa-wawangu-mi wikimi na pulungu na patuna i Ala la etimi, nadu na pulungu nuna ningu màkana la pa-pamàna-nggai nyimi mbuu ndàbami.
22Màtawa nyimi kai paloku-ya jàka nggàraya ba wàna i Ala, àmbu mbulungu biana bai patingingu, nu ba timi nu lupa panyonga-minya wiki dimika. 23Na tau na marongu-ya na puluna i Ala, tàka hi nda na-paloku-yai, beri hama tuna na tau na ma-kaninu ba naitaya na hadana daa la kaninu. 24Nahàla-ka pa-kanundaru pahàmu-nya, laku-nanyaka, ka hangu mbula-madua-nanyaka jàka nggikina na hadana na matana. 25Na ukuna i Ala na-lundungu dàngu na-kapànduku la pa-pamarandeka-ya na tau. Dàngu na tau na ma-manginjiru-ya dàngu na ma-hamata pahàmu-nya lupa na-paloku-ha da uku nuda, nda mbulungu biana ba na-patingingu tàka hi maromba-nanyai, na tau nuna napa na-pakanyuru-ya paraïna i Ala la hangia - hangia na pa-paloku-na.
26Jàka ninya na haàtu na tau na ma-pàdangu wikina ba na-manundu la anggama, tàka nda namangga-nya na làmana nyuna panyonga-nanya wikina; na lumungu-na nda ningu linguna. 27Na manundu la pa-paloku-ya na anggama na ma-yahangu dàngu na ma-langatàka tundunya na pangàda-na i Ala Ama, jiaya: ndulaha da analalu mila dàngu da kawini meti lei da ma-mayila, dàngu ka na-manggangu wikina ka àmbu na-paruha-ya pinu tana yiana.
Currently Selected:
YAKOMBU 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
