Popular Bible Verses from YAKOMBU 1

Share

Angu dedi hapaela-mi! Jàka era hunggumi màtu - màtu ma-pakamangu, màtawa kai pinya nuna ba wangu-manaka. Nadu nyimi kai pinya, jàka mi-padaingu la papawai lai Miri, nu bai hunggu ma-pakamangu, la njàpuna jia-duyaka hi mi-pajàrungu.

Jàka ningu la hongami na manda tika pa-manggàna, màtawa ka nakarai lai Ala, napa nawua-manya duna manggàna paraïna i Ala; nadu i Ala ba na-màjangu dàngu namila eti-mana duna pawua juanya na tau haàtu-haàtu.

Hamata pahàmu-manya angu dedi pa-mbuhangu hapaelami! Haàtu-haàtu na tau màta ka narengga la pa-patingingu, tàka ka na-endapu la kareuku dàngu ka na-endapu la pambeni.

Manggangu ka pekuna na pajàrungu etimi ka nabonja pangalangu ka lupa nalundu pa-langatàkangu dàngu ba nda ningu ma-yàmihu la hangia-hangia.

Màtawa nyimi kai paloku-ya jàka nggàraya ba wàna i Ala, àmbu mbulungu biana bai patingingu, nu ba timi nu lupa panyonga-minya wiki dimika.

Oha pàku-anaka na tau na ma-pajàrungu ba talànga hungguna ma-pakamangu. Nadu ba nahàla-ka pa-pajàrungu la ma-pakamangu, napa ba ngalangu-nanyaka wundana, nu na luri na pambàda ràndina i Ala la mbuu ndàbana na tau na mambuha-nya i Ala.

Nimbihu-na na pa-wuangu na mahàmu dàngu na pa-ngalangu na ma-lundungu ma-pawelingu la awangu-ya, na pa-papuru-na paraïna i Ala, na ma-padika-nja da maharii la awangu. Nyuna Ala manda pa-njilungu-ya, dàngu nda na-patikingu hawutu-mbu ma-kapàtangu.

Na tau na marongu-ya na puluna i Ala, tàka hi nda na-paloku-yai, beri hama tuna na tau na ma-kaninu ba naitaya na hadana daa la kaninu. Nahàla-ka pa-kanundaru pahàmu-nya, laku-nanyaka, ka hangu mbula-madua-nanyaka jàka nggikina na hadana na matana.

Na manundu la pa-paloku-ya na anggama na ma-yahangu dàngu na ma-langatàka tundunya na pangàda-na i Ala Ama, jiaya: ndulaha da analalu mila dàngu da kawini meti lei da ma-mayila, dàngu ka na-manggangu wikina ka àmbu na-paruha-ya pinu tana yiana.

Jàka ningu haàtu panggàna ma-pakamangu tungu nu, “Yiana na ma-pakamangu ma-pawelingu lai Alaya”, àmbu wànadu, nadu i Ala duna nda peku-ana ka nakama-nya ma-akatu, dàngu nyuna nda na-kamangu-mbu haàtu tau. Tàka na tau hi nanggàna-ya pa-kamangu, jiaya jàka nairu ngàndiya dàngu jàka nanggàna-ya itirungu wikina na ma-akatu.

Na tau Karitu na mamila màtawa ka na-nggaüru na etina jàka na-pajangga-ya paraïna i Ala.