YAHAYA 47
47
Ba patanda-nya ngera na Mbambilu
1Napanii i MIRI, “Ha Mbambilu puruwa welingu la kanjàka hanganji-mu,
dàngu mandapu-wa la kumburu tana.
Ndau hamela dàngu ndau manandangu-apa nyumu hama tuna àmangu.
2Nggihuwa kanguta wàngu watu;
pahàla-nya kàdi na tamalingu-mu,
jijiku-nya na laümu lundu dawuwa da ana tau wihimu,
dàngu pala-hawa da luku.#pala-hawa da luku; talànga wanguna jakaru-nanya na ngera tanawangu.
3Napa naita-kau tau bau kalulu,
da-paaka-nggau dàngu da-pamakia-kau.
Napa Nyungga kutungu kiringu lai nyumu,
dàngu nda haàtu-mbu papuli-nggu pamara,” wàna.
4I Ala matua Ihirailu na-pamara-ta nyuta,
na tamuna MIRI Mahupu-mbihaya.
5I MIRI napanii-nya na Mbambilu,
“Pàdi wàmuwa, kau tama la kapàta wuru yila.
‘Hanganji kawini-da da pa-hanganji-ya’
nda hili wàda-anggaupa.
6Àmangu kuhàngga-nya na banjaru-nggu,
nda kureki-ahapa nyuda ba mangu-nggunja.
Hàla ku-pakata-nja lai nyumu,
ba tuna nyumu ndau milanja eti,
jiapa da makawe-weda muwànja ma-mbàringu.
7Bau kakaya làbu hanganji kawini lundu nu - nuka napa wàmu bia,
tàka nda na-miripu-a la etimu jàka ndia, ndau kanandi-anya na injana la hupu njàpuna.
8Jia ba tuna ronguka Nyungga, ha
dumu makeha-nya na luri mànjaku!
Bau kakaya na-mambiru na lurimu,
dàngu nda ningu mahama-nggau.
Bau pangàda-nya nda jia njadi-amu kawini meti lei,
dàngu da wàla wuamu nda jia molungu-ada.
9Tàka napa ndedi mbàdiku-na, la dalu hau lodu,
handàka tarànjaku-mada nuda da madua ngiada.
Jiapa kau wàngu hiwaru dàngu lii mambiha,
na leimu dàngu anamu pa-hànditu-maaha.
10Mu-pàdangu wikimu bau mambiru la akatu-mu,
bau kakaya nda pa-hamata-aha da pawunda-mu.
Na-pahambala-kau manggàna-mu dàngu na pingumu,
bau rekiya nda ningua mahama-nggau nyumu.
11Tàka napa nyumu na-handauni-kau ura pàda,
na hiwaru-mu nda na-duluku pa-pahinggilu-kau.
Napa nyumu natàka-nggau manjurungu,
dàngu ndau duluku-a pa-tebuku-ya.
Napa natàka harabàndangu na molungu,
dàngu ndau mbuti-anya ba ndedipa.
12Pajàrungu bia dàngu mbuu ndàbada da hilu mbihamu dàngu da hiwaru-mu,
da ma-pakaramba-kau welingu ba anakeda kudukau.
Raï-ai duna hi ningu bia nu linguda lai nyumu,
ka pa-mangàdatu wànja da muhumu.
13Nawàngu pahoda bianggauka paraï padangu da lii kamahingu.
Paràha bianja da ngara ma-manyura
ka da-pamara-kau nyumu;
nu nyuda da ma-manginjiru-ya mbuu ndàba na kabihu awangu
dàngu da ma-patanda-nja da kandunu,
la nimbihu wula jiliku
danyura-ya jàka nggikina na uramu.#Da pa-haleli ndai da manda pirada: jàka nggikina na uramu; Imbarani: jàka nggi welina na ura dedimu.
14Tàngaru, nyuda hama rembi pahàla epiha;
nda da-ngalangu pa-pamara wikida!
Na epi nuna lalu mbana nda najaru-na lai nyuda,
nda mbana epi ngia padiru-aya.
15Nunaya na linguda da ngara ma-manyura lai nyumu
da ma-pakaramba-kau nyumu piti welingu ba anakeda-kau;
nimbihu-da dalaku wàrunggau nyumu;
nda ningu mamai la pandula-kau,” wàna.
Currently Selected:
YAHAYA 47: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
