YAHAYA 33

Hamayangu karai pa-ndulangu

1Ura pàku-adaka da muhunda! Nyuda da-rambangu jiapa-kai ka nda paramba-nja nyuda, dàngu da kaleka jiapa-kai nda pa-kaleka-nja nyuda. Na nyuna ba dahàla-ka pa-rambangu dàngu pa-kaleka, nyuda wiki da-pàdaya ba rambanja dàngu ba kaleka-nja.

2Ou MIRI, mila àru-nggama eti, Nyumu pamonu-ma nyuma. Katindi àru-kama hau lodu - hau lodu dàngu pamara àru-kama la rapa handuka. 3Jàkau hada lumbatu tàka hiu pa-rongungu-ya na talia nggorumu na ma-kangguruku, dapalai pai - ihangu da banjaru. 4Hama tuna kabala ma-tanyumbalu-ya na tau na manjungu-nja paramba-nja da banda da malanja-da.

5Kanjupu bokulu-ya i MIRI; Nyuna na-kuaha-ya mbuu ndàbana. Napa Nyuna na-pahada-nya na uku dàngu na ma-padeningu la Yeruhali 6dàngu napa nawua-nya mànjaku na banjaru-na. Na pawulu wàngu na ma-pamara-ha jiaya na manggàna dàngu na papingu wàngu pa-kariangu tembiya i MIRI.

7Da mini pangarangu kaborangu dawara karai pa-ndulangu; da ngara papalewa da ma-pamukarungu la pa papeku ngi - ngibada pahii. 8Da ànda bokulu lalu mbana manjurangu-da, hi lupa da-malinggitu; nda ningu tau mali lai nu. Na pa-ràndingu da-tambaihaku-maanya dàngu na pa-pahamangu dapangga-maaya. Nda ningu-apa pa-kawelangu. 9Na paraingu dunjaku-maanya hi na-mahàna. Da omangu la Limbanongu da-kariku, na Lolangu Harungu na ma-kamboka tu-maana-ka na maràda telangu. La Mbahàngu dàngu la Palindi Kàramilu da-panutakungu pamunju da ruu ai.

I MIRI ba na-panamu-nja da muhuna

10I MIRI napanii-nja da banjaru nuda, “Nàhu napa kuhada lumbatu dàngu ku-paluangu limanggu pa-pajiliku-nya na kuaha-nggu. 11Na pa-pakaka-mu kahewa-ana, dàngu mbuu ndàbada da palaku-mu nda ningu linguda. Na mbenimu ba hama epiya napa na-pamolu-nya na wikimu. 12Nyimi napa mi-làjaru hama tuna na watu langàdi na patunu tu kapu, hama tuna na rii madàka papunggu hi tunuya la epi. 13Màtawa mbuu ndàbada da tau la ma-mareni dàngu la mamarau ka darongu-ya na paraï rukunggu dàngu ka dawaiya na kuaha-nggu,” wàna.

14Da tau da manjala la Hiungu danggai ridu pa-mangàdatu. Dapanii, “Na botangu-na i Ala hama epi rokaya lundu nu - nu. Pekuna nu ka ningu mamàka pa-patorungu la epi ma-palàpu tungu nu?” wàda. 15Pekuna nyimi pa-torungu jàka mipanii-ya dàngu jàka milaku-nya na ma-deningu. Àmbi himbu utumi ba wàngu pa-kapidihu tau mamila, dàngu àmbi kei li hambeli-du àmahu. Àmbi kikungu-du la tau na ma-patikingu pa-pameti tau jàka ndia la ma-akatu hangia-kai. 16Nyimi napa papahangindingu-kai dàngu imànjaku, hama tuna ba ninggai daa la tindingu kapingatu. Pangangu dàngu pa-ngunungu napa ningu-padua dimi.

Na rehi na manàmu-nya na ma-mbokaru

17Napa natàka na rehina bai itaya napa na haàtu na hanganji na ma-pareta wàngu pangarangu la paraingu na ma-tayilingu la nggi - nggini. 18Na pa-mangàdatu-mi na mala - làpahu hangganja da makei hilu katiku da maningu wai ngabangu da tau hangàdangu jia na namu-ahaka. 19Nyimi ndai hili itangu-apa tau ahu tau hangàdangu da mapanii wàngu hilu panda pimi. 20Tàngaru-wa la paraingu Hiungu, na ngia paremi-ndanja da mbabu anggama. Tàngaru-wa la Yeruhali! Kanjupu mànjaku-yaka na pa-ngiangu nuna la pangia-nya, hama tuna na maü tera na panda ana pa-lelingu, da kandutuku-na da panda ana butuhu dàngu da likuna da manda ana mbota. 21I MIRI napa na-paita-ndanya na bunjuku-na lai nyuta. Nyuta napa taluri la hingi luku lerangu, na panda li kapalu muhu.#La lawiti Imbarani-na nda na-lohangu-a jàka nggàra wàna na ndalaru yiana. 22-23Mbuu ndàbada da pa-pamàtu-da la kapalu-da nyuda nda ningu linguda; da liruna nda peku wàlahu-ha! Mbuu ndàbada da pawulu-da da pamba muhu napa taramba-nja, dàngu nggubulu-da kanjupu danguha, hi lupa na tau kaliparu napa na-ngalangu-mbu tangguna. I MIRI wiki jiaya na Hanganji-nda, Nyuna napa na-pareta-ta, na-pahada-nya na uku dàngu hi na-pamara-ta welingu la muhu. 24Nda haàtu ndoku-apa la tananda nyuta napa ma-kaihiku ruku hidu, dàngu mbuu ndàbada da njala pa-jàmangu-haka napa.

Currently Selected:

YAHAYA 33: KAM

Highlight

Copy

Compare