YAHAYA 27

1La rehi nu i MIRI napa nawànya na hapanda-na na matara dàngu na madàka la pahuku-nya na Lewiatangu,#Lewiatangu: Banda pa-mangàdatungu da papeka la lii pangerangu ndai dàngu pa-paninu maünja da banjaru da ma-kapidihu-ya na Ihirailu. na ularu na makawe - wenggalu dàngu na makale - lenggaru, dàngu ka pameti wànya na nggarihu la tehiku.

2La rehi nu napa i MIRI napanii,

“Luduwa ngerana na woka angguru-nggu na ma-manandangu.

3Nyungga, MIRI, madaiya;

ku-mangahu mànu-manya,

rudungu lodu ba kudaiya,

ka àmbu ningu ma-kuhiku-ya.

4Nda na-miripu-apa na mbeninggu.

Jàka era ningu rumba, jàka ndia rii madàka,

Nyunggama napa ma-pamànji-ha,

hi kutunu pambuta-ha mbuu ndàbada.

5Tàka jàka lai Nyungga ngia pahimbu-da pamara da muhu banjaru-nggu,

màta ka da-papeku daa pàkungga Nyungga,

papeku daa-mangga bàdi Nyungga,” wàna.

6Napa la rehi na manàmu-nya na banjaru Ihirailu hama tuna pingi ai ma-paamu-ya,

dàngu ma-hanggebaru, hi napinu wànya wuana na pinu tana.

I MIRI nahuku-nya na banjaru-na

7I MIRI ba nahuku-nya na banjaru-na nda hama mbotu-ana ba nahuku-nya na ba - banjaru na mamuhu-nja nyuda. Nda na-pameti-a banjaru-na hama tuna ba na-pameti muhuna Nyuna. 8I MIRI nahuku-nya na banjaru-na ba nawàngu pawàru-nja la parai tau hangàdangu. Nyuna nayaulu-ha nyuda nawànja ngilu akatu welingu la pahunga lodu.#La lawiti Imbarani-na nda na-lohangu-a jàka nggàra wàna na ndalaru yiana. 9Ba tuna da njala tau Ihirailu hi jàmanja mbulungu da ngia pawotu maraku la marapu - marapu ka nggihu pamija-ha hama tuna na kapu. Mbuu ndàbada da ngia patunu dupa dàngu da ninu maüna na ratu Ahera ka pa-làjaru-mbuha bàdi.

10Na paraingu ma-patindingu nuna na-malinggitu-ka dàngu pa-dunjakungu-yaka hama tuna na maràda mbila na mabulu. Da kabàba banda niti-danyaka rumba hi damaü ningu lai nu ba da-pambuta-ha da ruu ai welingu la kahanga - kahanga-da da pingi ai. 11Jàka damàdu dàngu dambata-ka da karànggada, mai-danyaka da kawini paohu-ha hi datuha ai mutungu.

Na banjaru nuna nda nggàra ndoku papina, jia-duyaka hi nda namila-nya eti jàka ndia hi nda nambuha-nya paraïna i Ala Ma-padika-nya.

I MIRI na-pahàmu beliya na banjaru-na

12La rehi nu i MIRI napa na-pauhi mara haàtu-nya na banjaru-na welingu la Luku Epuràtu lundu la padira Mehiru. Nyuna napa na-paiha-nja hama tuna na tau na ma-paihangu karohu uhu nggàndumu welingu la tàdana.

13La rehi nu napa pa-palingu taropitu bokulu la papaau belinja mbuu ndàbada da tau Ihirailu da pa-wàrungu la Ahuru dàngu la Mehiru. Nyuda napa damai la Yeruhali la pa-maraku-nya i MIRI la tandula matua-na.#tandula matua-na; Tàngaru-ya la 2:3.

Currently Selected:

YAHAYA 27: KAM

Highlight

Copy

Compare